mercoledì 20 ottobre 2010

Ispirazions: La gnot de vilie dai Sants

Come prin teme par movi i estris dai nestris Contecurtârs, o di chei che a àn voie di deventâlu, o sielzìn un argoment che o vin doprât za l'an passât e che, a viodi dal numar di contis che nus jere rivât, al veve stiçât une vore lis tastieris.
O stin cjacarant de gnot de vilie dal dì dai Sants, chê che il mont plui merecanizât e consumistic al clame, cun buine pâs storiche e de tradizion, la gnot di Halloween.
Nô di Contecurte, tal dâus chest teme, i tignìn a marcâ che jenfri chei popui che a àn il dirit di celebrâ cheste ricorence al è cence dubi chel dai Furlans.
Se o nin a viodi ce che al è daûr de festivitât cristiane che e cjape dentri ducj i Sants, o scuvierzìn che cheste date e je stade sielte par platâ une ricorence dai popui di riunde celtiche, che a vignivin ben prime dai romans e che a viodevin intal prin di Novembar l'inizi dal an.
Il 31 di Otubar, par chescj nestris antighissims vons, al rapresentave la vignude dal Princip dal scûr "Samhain", ven a stâi la fin de stagjon cjalde e il començâ di chê frede. Chest il motîf par che si diseve gracie, in chê gnot, a ce che si veve vût dilunc il an.
In bande di chest al jere però ancje il cult dai muarts. I Celts, di fat, a pensavin che in cheste gnot i spirts dai muarts a cirissin di tornâ indaûr a cjolisi une gnove anime, e par fâiu scjampâ a dopravin i stravistiments plui orents e a rindevin lis lôr cjasis fredis e inospitâls. 
Ca di no, invezit, 'nd è une vore di altris usancis, di spes ladis pierdudis, che a ricuardin la gnot di Ognissants. La plui cognossude e je di sigûr che de coce di svuedâ e taiâ par fâi la musate, come chê inte imagjine che o vin metude, e che dopo e vignive lassade sul barcon, cun dentri une cjandele impiade. Ma no si puès dismenteâsi, simpri in teme di muarts che a tornin, la lûs di lassâ impiade fûr di cjase, par che i parincj a cjatin subite la strade, o il puest in taule parecjât, magari cu lis cjastinis, par cui che al torne a cjatânus in cheste gnot,  in procession, par che al cjati il bon acet (visantsi, stêt atents, di lassâ un seglot di aghe, che i muarts a àn simpri une vore di sêt).
A dimostrazion di dut ce che us vin pene dit, us visìn ancje di dutis lis sagris e lis fiestis che a vegnin immaneadis in chescj dîs, ator pe nestre regjon.
Insome, nus pâr che lis ispirazions par scrivi cualchi buine conte di ande gotiche o tenebrose a no si sedin esauridis cun chês scrivudis l'an passât. Par chei che no jerin o che a àn voie di tornâ a leilis us ricuardin che a jerin: Sium de vilie dai Sants, Il Pipinot, La procession e Picjâts.
Se us è restade ancjemò cualchi idee... la direzion di pueste e je lassù, a man çampe.

6 coments:

Jaio Furlanâr ha detto...

OK, so m'impensi, o vin bielzà fat alc li parsôre l'an passât, ma parcé no fant inmó une?

Dame mit fächer ha detto...

Ai provât a tornà cu la memorie ai timps da la me infanzie, tai ains '50, par cirì di visâmi alc dal periodi dai Sants e dai Muarts.
Mi pensi che me none, me mari e mes sûrs plui grandis a mi contavin, cun grande maravee, da la fieste dai Sants di Rivignan ma jo no mi visi ca mi vedin mai puartade a viodile.
Gno cusin Pieri di Durlasse a mi domandave "sôtu stade a viodi il paiazo a Rivignan?". Lui al intindeve che alì a rivavin i salts (come ca diseve me none al "circo").
Cussì al scriveve Ippolito Nievo che, achì, o ai volût voltà par furlan: "Muarts o no muarts tal doman, chê sere alì si balà di buinevoie, si che tantis voltis mi sovignì il gno Friûl, e chês nomenadis sagris di San Pauli, di Cordovât, di Rivignan dolà ca si bale, si bale tant da pierdi i sintiments e lis scarpis." (Le Confessioni di Un Italiano)
Tal sît dal Comun di Rivignan o vevi cjatadis lis notiziis storichis di cheste fiere, ma no li viôt plui, però li ai incoladis ta un mio post:
http://donebete.splinder.com/tag/i+sants+a+rivignan

Contecurte ha detto...

sì, biei ricuarts, Dame, in plen spirt de tradizion...
Purtrop nus pâr che a sedin i Contecurtâr che a mancjin... :(

Anonymous ha detto...

No si à di sei come Sant Pieri, se no no si podarà mai cjaminâ parsore des aghis ;-))

Mandi.
Gianfranco

gelostellato ha detto...

Difat al è par chel che a àn inventât i puints :)))

Dame mit fächer ha detto...

Di passaç su la passarele (chê ca somee al Puint di Brooklyn)sul flum Stele o ai savût di S(a)LAM POETRY Lidrîs sporcjis di tiere, L’evento è curato dalla poetessa Lussia di Uanis con la collaborazione di Radio Onde Furlane e Trieste Poetry Slam. Presenterà e animerà la serata con il consueto snait lo scrittore Raffaele Serafini, curatore del blog in lingua friulana Contecurte.
http://partitdemocratic.blogspot.com/search/label/contecurte

O varès alc di dî

Ti sêstu visât di firmâti? :)