venerdì 22 ottobre 2010

La conte

Al veve za vinçût trê voltis il premi Nobel. Pe epistemologjie, pe acrobazie e pe altinmazie. Cuant che al vignì a savê che al esisteve ancje il Nobel pe leteradure, al decidè subit che al scugnive vinci ancje chel.
Al provà a cirî sul web par capî ce robe che e jere la leteradure e al si intopà intun sît che al veve non CONTECURTE.
Lei che ti lei, studie che ti studie, al rivà a la conclusion che chei de Contecurte a jerin tips babios, brâfs. Al decidè di candidâiu a candidâsi a sustignî la sô candidadure al Nobel pe leteradure.
Cence pierdi timp, i scrivè une mail a la CONTECURTE, cussì e cussì, che jo varès voie, che vualtris o sês brâfs, che.
Al spietà un pâr di dîs.
Nuie.
Al tornà a mandâ la mail, simpri chê.
Daspò di cuatri dîs il puestìn i consegnà un pac.
Drenti al cjatà une scove cun tant di mani dismontabil e rimontabil. E une cartuline. E un fassicul di uns cinc-sîs pagjinis scritis, sfueis A4, cun stampante laser.
Ce volevie dî?
E cui i mandavie chel pac?
Il premi Nobel al si metè a studiâ.
La cartuline e rapresentave une viodude dal mâr.
Il fassicul al jere un statût, il statût di fonde di CONTECURTE.
Il pac al vignive di chei di CONTECURTE.
Al capì subit, no par nuie al jere un premi Nobel. Chei de CONTECURTE lu mandavin a scovâ il mâr.
Ma scovâ il mar no je ocupazion di un premi Nobel. E lui al voleve vinci un altri premi Nobel. E par vinci i coventavin, aromai lu veve capît, chei di CONTECURTE.
Se par vê a ce fâ cun lôr, il sisteme al jere dome chel di scrivi une conte, lui al varès scrit une conte.
Curte.
Al scrivè une conte.
Curte.
E le mandà a chei di CONTECURTE.
La conte e fevelave di un premi Nobel che al veve zaromai vinçût il premi Nobel trê voltis e che cumò…

di Laurin Zuan Nardin
Conte n. 140

5 coments:

Anonymous ha detto...

Cuant che biacemai o vessin di cjapâsi un tic masse sul seri, anìn cjase, vierzìn Contecurte o la Comugne, leìn une conte di Laurin Zuan Nardin: chê nus sisteme i vues e, se o sin montâts sul scagnut, nus fâs dismontâ jù dal moment.

Mandi.
Gianfranco

Contecurte ha detto...

O sin propit dacuardi ducj cul nestri garzon. Cheste conte nus è rivade in tai dîs che o jerin sierât par meti adun lis novitâts, e e je stade propit la conte juste par disniçâ chest gnûf blog, par no cjapâsi masse pardabon. :)
Grazie Laurin!

ILfurlanist ha detto...

Biele e vonde, ironie perfete. Jo o ai votât "alc&ce" ;-)

ILfurlanist ha detto...

Questo commento è stato eliminato dall'autore.

Dame mit Fächer ha detto...

Vuei o ai ricevût un premi Nobel cun cheste motivazion:
"mil voltis miôr l'entusiasim e il mone vie che il cidinôr di tancj altris ;)"
e mighe o ai fat come Sartre, vê, che il Nobel no lu veve acetât disiint:
« aucun homme ne mérite d’être consacré de son vivant ».

O varès alc di dî

Ti sêstu visât di firmâti? :)