lunedì 18 ottobre 2010

La gnove Contecurte: il licôf

BEN TORNÂT!
Sì, ben tornât; parcè che se tu stâs leint chestis riis e no sin ancjemò ai 25 di Otubar, dôs a son lis robis: o tu sês un Contecurtâr, o tu sês cualchidun che, intune maniere o ta chê altre, al steve daûr a la nestre Ostarie viere sul blog di Splinder.
In ogni câs, ben rivât in chest lûc, che al sarà la gnove cjase virtuâl de Ostarie Leterarie CONTECURTE, che tu tu varessis za di cognossi.
O vin pensât, di fat, di invidâ i nestris letôrs e scritôrs plui afezionâts une setemane prin de vierzidure uficiâl de gnove Contecurte, ancje se magari o sin ancjemò daûr a meti a puest lis ultimis cjadreis e a netâ il polvar dai lavôrs che o vin fat in chescj mês di polse.
Nûs pareve biel meti adun chest licôf, e intindilu come inte ete antighe, come un moment di fieste, un rituâl che al sedi di bon auguri par cheste gnove Ostarie, rinovade e insiorade, cirint di meti ordin intai vins di une volte e fantasie in chei gnûfs, che o vin pronts daûr dal bancon.
Si che duncje, a voaltris che o sês aromai di cjase, us lassìn il timp di cjalâsi ator, di fracâ ducj i botons che o cjatais, di curiosâ in ducj i scansei e començâ a nasâ i vins gnûfs che o vin di ufrî. 
Si inacuarzarês che o vin aumentât l'organic, metint dongje al Ustîr e al Ustîr in Seconde, no dome il Camarîr, che al è stât confermât a timp indeterminât, ma ancje un Garzon, une vore brâf, e un Famei, cuntune vore di snait. E si inacuarzarês ancje che o vin insiorât la nestre ufiarte, jemplant il camarin e lis scansiis di vins diferents des contis, ancje se a àn simpri a cefâ cun lôr.
Cun di plui, o vin cirût di comedâ i difiets che a saltavin fûr inte Ostarie viere, che no vin vendude, ma le vin lassade come che e sta, pronte par lâ a cirî cualchi conte, se al covente, partint dai leams inte pagjine dedeade ai Contecurtârs. Anzit, o domandìn propit a chescj, di butâ un voli ae lôr sezion e dînus cuntune mail se a àn voie di inzornâ la biografie o di zontâ/gjavâ alc.
Judâts dai imprescj informatics che cheste gnove cjase virtuâl nus met a disposizion, nus somee che la gjestion dai coments, des informazions e dai articui e sedi plui valide e che la Ostarie e sedi plui comude e plasevule. Cussì, intant che nô o lin indevant a comedâ lis ultimis faloputis di grafie e a picjâ i ultins cuadris tai mûrs, voaltris invidâts prin de inaugurazion uficiâl, che e je previodude, apont, par lunis ai 25 di Otubar, o podês bielzà començâ a doprânus, vignintnus daûr cun google o cul muselibri, su la colone di çampe, e disintnus ce che us pâr di cemût che a van indevant i lavôrs.
Intant nô, cun cheste setemane, o començarìn za cu lis publicazions.
Un salût a ducj, e ancjemò une volte: BENTORNÂTS.

9 coments:

Jaio Furlanâr ha detto...

Al mi somee dut a puest. Pulît ancje parcé che cun Blogspot o mi sint plui di cjase. Jo o soi pront:-)

Dame mit Fächer ha detto...

Ben, insome, ancje jo mi soi fate un gnûf vistiari par vignì al licôf.
Mandi e ogni ben.

frank spada ha detto...

Sa lu dis Jaio, cal sa dut e ancje di plui, tant che a cjase so...
Prontissim alore e che si vadi... a bracet? Usti, come cal dis lui, plancut plancut e mancul confidencis, eh!
Mandi CONTECURTARS (ostiirs, camariris e musicants in bande, che no vedin di fanus incjampà prime ancore di tacà (bande).

frank spada ha detto...

Siet minuts d'interferencis e... bentornade Done Bete!
Vescul ce elegance, ce portament... ah ben po', cumò o soi content, parcé a bracet di cheste femine straordinarie si pues là sigurs!
Mandi - mancul mal che o soi tornat in daur... juste siet... e no, cumò e saran di plui, ma ben d'istess.

ILfurlanist ha detto...

Benvignûts! Fasìn fieste! Al sarà buinore, ma sintît chest salamp ce bon che al è... sior Frank, che i dedi une cerçade.

frank spada ha detto...

Sior Diretor, cal spessei a meti tal so Editorial ce cal sà e ca no stedi a fa finte di nuie, come invezit non fan... insomme, i Furlans a scrivin ancje par talian e ancje cence cjapel, veh! Cal provi a esercità un tichinin la curiositat, isal o no isal un giornalist?
Dutcas, il salam, chel veri, si podares cercjalu:)
Mandi

gelostellato ha detto...

Frank, viôt che chel nol è plui diretôr... aromai al è dome un Ustîr 2.0 :)))
In ogni câs mandi a ducj e bentornâts!
E viodin di jemplâ ae svelte chê scjatulis di musis a çampe!
furlanist! dâ il bon esempli! :D

E pal salam... lu vin mangjât dut joibe stade a Vagon Gnot, jo e il famei! :))

Dame mit Fächer ha detto...

O soi lade a visà le scritore Pierina Gallina, ca podarès ancje scrivi une biele storie par Contecurte, cussì ancje Galliano in Argjentine, Ninine archeolighe e Sommelier furlane.
Doman o fasarai cualchi altri zîr.

Contecurte ha detto...

Un gracie a ducj!
E gracie ancje a Done Bete nus sparagne za il lavôr di lunis che al ve :)

Si scusìn se magari dilunc cheste setemane o viodarês cualchi lavôr o se us domandìn di tignî sù un claut o cjapâ sù il paviment, ma cumò che o vin metût adun la stanzie, o cirarìn di fâle biele.

Podopo si sa... no o metin i ûfs dûrs, il pan, il formadi... ma il vin bon, al è il vuestri ;)

O varès alc di dî

Ti sêstu visât di firmâti? :)