lunedì 25 ottobre 2010

La Gnove Contecurte!


BENVIGNÛTS
AE GNOVE
CONTECURTE!

Sì! Lu savìn... come che o podês viodi sot di chest post al è za di cualchi dì che o sin daûr a traficâ e cualchi tai a lu vin za servît. Un piçul licôf dulà che o vin invidât i vielis contecurtârs, ancje se nus pâr di vêju aromai pierdûts par strade...
Ma vuê e je la zornade de vierzidure uficiâl, dulà che o sperìn di tirâ dongje sedi chei che nus corevin daûr prin, sedi e soredut cualchidun di gnûf, passionât di lenghe furlane e di narative curte.

Cussì nus pâr just, prin di dut, dì dôs peraulis par chei che a capitin in cheste Ostarie pe prime volte.
Ce robe ise? Si domandaràn... O miôr, disìn nô, ce ise deventade?
Sì, parcé cheste Ostarie, par chel che al seguive il blog vieri, o par chel che al va a dâi un cuc cumò, e jere za vonde ben inviade, ma vûstu che il paron di cjase (splinder) nus butâve par aiar il locâl une dì sì e une ancje, vûstu parcè che o vevin voie di miôrâ il servizi e la ufierte, o vin pensât ben di trasferîsi achì, su chest lûc virtuâl che o stês leint cumò.
E alore, si diseve, ce sino deventâts?
Nissune pôre! Il teme di fonde al è e al reste la Conte Curte, come che podês viodi de insegne, che no je cambiade. Dome che o vin incressût sedi l'organic, sedi la ufierte, deventant, di fat, une piçule redazion.
A gjestî la barache al reste l'Ustîr, Raffaele, che al è chel che par solit us rispuint ae direzion di pueste e al matee cun voaltris cuant che a nus mandàis lis Contis.
Subit in bande, che si ocupe di Gnovis e dal rapuart cu lis Partidis di Discors che a saltìn fûr de nestre intese cu La Patrie dal Friûl, o vin l'Ustîr in Seconde, il Dree. In zonte a cheste ufiarte o vin di gnûf il nestri Camarîr, Sandri, che nus inscuelarà cun pirulis di Lenghe Furlane, e un gnûf acuist, Gianfranco, che al lavore daûr, come garzon, ma za cun miercûs o vedarês ce che al è bon di ufrînus, cu la sô Conte Misteriose. No je finide, parcè cualchi volte, judâts dal nestri Famei, Checo, o puartìn ancje ator lis contis pal mont reâl, cun Events e Leturis, come che o vin za començât a fâ intal Vagon Gnot.

No us pâr avonde?
No dome chest, alore, parcè o vin ancje altri, in cheste Ostarie Leterarie furlane. O tirarìn fûr, ogni tant, cualchi conte de Ostarie Viere, che in ogni câs no je dismedute, ma nus covente ancjemò di cantine, par tignî il vin a invecjâ ben. O invidarìn cualchi Forest in Ostarie, par viodi cemût che a salte fûr cualchi Conte Curte voltade inte nestre lenghe. O cirarìn ancje, se o rivìn, di dâus cualchi Ispirazion, come chês par la gnot de vilie dai Sants, par viodi di stiçâ chei che a scrivin, a tirâ fûr cualchi conte che e ziri ator des 2000 batudis, che al reste il nestri limit di lungjece.

Isal dut?
Disaressin di sì... No vin voie di contâusale masse lungje!
Se il nestri gnûf progjet us interesse o podês lei plui in detai il manifest e lis nestris ideis di fonde.

E cumò ce nus coventie?
Sempliç: nus coventin letôrs e scritôrs, passionâts di contis curtis, lenghe furlane e narative in gjenerâl.
Se ce che o vês denant dai voi cumò us plâs, diseitnusal fracant il cuadretut achì sot, o lassantnus un coment, sparniçait cheste gnove e invidait cui che o pensais che al sedi interessât, coreitnus daûr sul muselibri o deventait nestris letôrs di google come che us dîs la colonute a man çampe, dulà che adalt, o cjatais la nestre direzion di pueste.

Us spietin ducj, e ancjemò une volte, BENVIGNÛTS!

7 coments:

frank spada ha detto...

Ma ce domandis! Mi plas, mi plas... ma tacait a servì in taule, che i Muarts e an simpri set, veh!
Mandi zovinastros e feminis graziosis.

Jaio Furlanâr ha detto...

Cumó chi soi daûr a lei lis aventuris di Marlowe, o capís miôr il Spada:-) Invezit o no rîvi a capî parcé che in Italie a si continue a meti avertencis dal gjenar achi in bande ae çampe.Nô furlanns chestis robis o lis savin prime inmó che nassin:-)

Dame mit Fächer ha detto...

Bundì a ducj,
biele, biele a mi pâr propite un biel "interior design". Cun di plui che soi contente dal gnûf organic, il Garzon e il Famei.
Biacemai ca fasin dut i oms e che lis listis rose a si polsin, ogni tant!
O puarti ancje i salûts di Galliano da l'Argjentine, a son scrits tal so blog
http://storiis.blogspot.com/2010/10/tornat-migra-tal-so-pais-11-cjapitul.html

Bundì Gjovane,
Ce svearins co ses di chês bandis li, o imagjini che tal licôf o vevis come bevandis cafelat e lat piât, e no cualchi taçute di vin, dade la ore, o falio?
O ai sintût la mancjance di Contecurte, ancje se par diti il vêr,o ai lis mês preferencis su lis leturis publicadis.
Mi fas plasè che a vedin aumentât l'organic, ergo, plui pussibilitâts di partecipazion.
Mi imagjini che il 25 di Otubar e butaran fûr la cjase pal barcon.
I mei auguris a Contecurte par cheste gnove imprese.

Ti saludi e graciis de informazion.

20 de octubre de 2010 07:57

triku ha detto...

Cemût che o ai vût za ocasion di disi al ustîr di persone, la gnove ostarie mi plâs une vore (massime cumò che e je chê biele gale che si viôt su la insegne).
Compliments al ustîr e a ducj chei che i àn dât une man ta chest lavôr di ristruturazion dal locâl. Par fortune che i taulins a son chei de ostarie vecje, che a mi i taulins gnûfs di pache nol è che mi plasin masse.
Viodìn se, in plui di bevi, o rivarai a puartâ ancje jo un pôc di vin... e sperìn che al sedi di chel bon.

Carli

Nello Malisano ha detto...

lassait un cjanton libar pare me. Metei su un len che ai frêt tes gjambis. Dismenteavi, puartait ancje un tai e dôs cjastinis. Chi o stoi ben e se vês di fa le une briscule non stait berghelâ che o ai di scrivi une conte.

il crot ha detto...

Ustie! Rinovât dut il locâl.
O 'nt vevis bêçs di spindi, si viôt che lis robis a levin ben!

Bon cumò a laran ancje miôr.

Ma a fuarce di fevelâ o ai la bocje sute.
'Là sono finîts i camarîrs?
UN TAI DI CHEL BON PAR PLASÊ.

Contecurte ha detto...

Gracie a ducj!

E al rivarà ancje il tai da camarîr...

O varès alc di dî

Ti sêstu visât di firmâti? :)