lunedì 15 novembre 2010

La balene


Marcut e so barbe Pieri a jerin in pîts sul cei de strade e a cjalavin jù, viers le aghe verdone che e stralusive jenfri i morâi, su la cueste nord de mont.
La balene si rodolave mostrant la panze grisuline e sborfant, di tant in tant, une sclipignade licuide, ma che e someave fate di polvar, par trop che e jere dongje a jessi vapôr.
Marcut al pontave un dêt viers di jê e al riduçave, intant che so barbe al faseve di sì cul cjâf, freolantsi cuntune man il pêl grîs e ruspi che i cresseve sui smursiei.
Se no ju ves viodûts in chê posizion, Vigji no si sarès nancje fermât.
Al veve parchegjâde la machine a çampe, su la strade che di Tarnep e leve a Somblâc, cu lis cuatri frecis come che si conven a un gjornalist di rapine come lui. Al si jere metût in bande dal om vieli e dal frut, e al veve tacât a cjalâ cun lôr il lât di Cjavaç.
«’Sere.» al veve trabascjât, ma la peraule i jere muarte sui dincj, cuant che al veve viodût chel pes bocognon che al svuacarave intal mieç.
Al veve butade une voglade a chei altris doi, ma no si jerin nancje voltâts, e dopo al jere tornât di bot e sclop a sgarfâ tal cruscot par tornâ in ca cu la sô machine fotografiche.
«Mierde,» al veve bruntulât, traficant cui botons de digjitâl «o ai masse pôc zoom!»
Marcut alore lu veve cjalât, cuasi cun maravee.
«Che al cjali che se al vûl fâi une foto ae balene al pues lâ jù fin su le rive, di chê altre bande».
«Ma… ma…» al veve protestât Vigji, cence crodi ai siei voi.
Il pes, a voli di nâs, al sarà stât lunc vincj, vincjecinc metris. Al veve un mustic un tichinin a bec, e une grumbule plui scure su la schene, propit dulà che al vignive fûr il gjet di vapôr. In bande dal cjâf al veve dôs pinis lungjononis e la code, a forme di mieze lune, e jere ancjemò plui largje.
«Ma no je une b-balene. I somee, ma no si è mai viodût un pes compagn!»
«Ma sì, sì. Lu savìn che no je une balene, però i somee une vore e aromai la clamìn ducj cussì» al veve spiegât Marcut, come se Vigji al fos lui il frut.
«Ma bisugne clamâ i gjornâi! La television, i sienziâts!» al veve protestât chel altri, «E je une robe incredibile!»
«Mah. Se al è par chel jo e chei de mê classe la vin za metude su Youtube ancjemò chest Unvier».
«E no isal sucedût nuie?»
«Ma, boh. Tal imprin o vin vût une pacade di clics e a Gjelindo i è parfin rivât un assegn di Google par vie dai banner publicitaris, ma dopo al è saltât fûr un flame e la int si è stufade».
«Un ce?» al jere intervignût pe prime volte Pieri, fasint capì che al steve atent al discors.
«Une barufe in internet, barbe» i veve spiegât Marcut.
«E cumò?» al veve insistût Vigji.
«Cumò nuie, e sta li cuiete te aghe e no dâ fastidi a dinissun».
«E dute chê int, lâ vie? Ce fasie?»
«Cemût ce fasie? No viodial? A cjape il fresc dal lâc, veh!»
In chel, come a volê rispuindi ai dubis di Vigji, la balene e veve fat un salt sul pêl de aghe, restant par un marilamp in pîts su la code. Po dopo e jere colade jù, spanzant e sclipignant dapardut.
Un rivoc di batimans e ridadis al jere plovût jù de rive, dulà che une marmaie di int in costum e cjapave soreli, distirade sui suiemans.
Dopo di chê sene Vigji nol veve plui cjacarât.
«Bon, Marcut, sù. E ore di lâ» al veve dit Pieri, a un ciert pont, e cence spietâlu si jere inviât, a pît, viers Tarnep. La canaie i veve talpinât subit daûr, lassant une cjalade e un “mandi” a Vigji che, cu la digjitâl a pendolon sul pet, al veve rivât dome a vierzi la bocje, ma cence butâ fûr nissun sunôr, propit come un pes fûr de aghe.

di Raffaele Serafini
Contis dal Ostîr
Conte n. 146

7 coments:

Anonymous ha detto...

il lûc indulà che si ambiente le conte nol è lontan di Verzegnis e des sôs striis. Chel pes, che balene, ancje se sin te ete dal "Web", cuissà, che nol vedin parintât? Par me, je propit farine dal stes sac....... e mi fâs pôre

Nello Malisano

Anonymous ha detto...

Biele conte, veramentri. Scrite ben e grande idee che a ti ten lì a lei. Otime.
Maurizio Mattiuzza

ILfurlanist ha detto...

Il mostri di Loch...Cjavaç. BIELE!

Gianfranco ha detto...

Cence finâl a sorprese: conte di gale!

Barbara ha detto...

Il nestri ostîr nus cjape par man e nus imbarlumis cuntun contà che al è ancje film: scritôr, regjist e senegjatôr..e cuissà tropis animis intal furlan sec incantesemât, sganderlet (a Cjarlins) e speroâl (?)! Une vore biele, grassis!

gelo stellato ha detto...

grassie!

Anonimo ha detto...

A è une biele conte che ti imberdee dal postic al pardabon cun che facoltat moderne sostignude dal digjtal che ti fas viodi ce che no al è indula che nol po jessi. Lussian

O varès alc di dî

Ti sêstu visât di firmâti? :)