venerdì 5 novembre 2010

Partidis di Discors: Il libri cence pagjinis

Us proponìn un altri teme, par stiçâ cualchi cjacarade, se e salte fûr. intai coments Us ripuartìn l'articul vignût fûr su la Patrie dal Friûl dal mês di Otubar, che al bute cualchi lûs su la prossime rivoluzion che e podarès sdrumâ il mont de editorie: i librîs digjitâi. Cuasi dutis lis cjasis editoris, di fat, si stan preparant a ufrî i lôr libris in formât eletronic, ma ancje il mercjât "ilegâl" al è pront a difondi la culture a presit zero. La cjarte, insome, e podarès jessi dongje ae crisi. 


"IL LIBRI CENCE PAGJINIS" di Raffaele Serafini
Ducj chei che a doprin il web, ancje chel pôc, aromai a lu àn capît: il mont dai libris e de editorie in gjenerâl al è rivât dongje a un grant ribalton. La clâf che e vierzarà la puarte di un gnûf mût di concepî la leture si clame ebook, e di pôcs mês al somee che la man che e zirarà cheste clâf e sarà l’iPad e ducj i prodots similârs che a vignaràn. A stin cjacarant, in gjenerâl, dai libris in formât eletronic e dal imprest in dì di vuê plui avanzât che al permet di leiju.
Ma parcè sino dongje a chest cambiament?
Al è dibant ricuardâ, come prin fat, ce che al è sucedût al marcjât musicâl cu la difusion, plui o mancul libare, des cjançons in formât mp3. La stesse robe e je une vore dongje a capitâ cui libris: disponibilitât a presits bas, o ancje di rive jù, di ogni prodot editoriâl dal marcjât.
Al è clâr che no sin ancjemò rivâts, tal nestri paîs, a un pont di svolte, ma tai Stâts Unîts i leaders de editorie a son za rivâts a dividi la lôr ativitât a miezis fra libris di cjarte e libris eletronics.
Fasìn un struc des motivazions che a puartaran, cul jutori dal miorament tecnologjic, l’ebook a incressi la sô difusion.
Doncje de pussibilitât di piraterie sul prodot, al va dit che, in gjenerâl, il presit al podarà jessi une vore contignût, sedi pai coscj plui bas, sedi pal fat che l’ogjet di valôr al deventarà propit il libri di cjarte.
Zontant a chescj motîfs economics chei tecnics, a nassin gnovis manieris di consumâ la leture: selezionâ tocs, voltâ lis lenghis, cirî aprofondiments, comprâsi i libris, zontâ efiets multimediâi e vie indenant. Lis pussibilitâts a deventin infinidis se si pense al cjamp scolastic e universitari o a chel dai manuâi o des vuidis turistichis. In ultim, ma no pôc impuartants, a son i vantaçs di conservazion, scjars intric e indenticitât di dutis lis copiis, che a puartaràn al discomparî de idee di «ogjet origjinâl».
Di chê altre bande, si sa, e je la resistence normâl a bandonâ la «cjarte» e la sô superioritât intal plasê a doprâle, mentri che al reste dubi l’impat ecologjic dal cambiament, che al sparagnarès arbui par fabricâ plui machinaris.
In ogni câs, la rivoluzion dal ebook e vierç puartis che a interessin ancje la leterature e la interie produzion di une lenghe minoritarie.
Tant par comença si rivarà a une sorte di democratizazion de ufierte, parcè che di fat, il piçul al varà la concrete pussibilitât di puartâ sul marcjât prodots di cualitât compagne dal grant.
Ancje pe visibilitât, doprant in maniere eficiente la rêt, si podarà rivâ su un marcjât che al sarà, prin o dopo, une vore plui larc e variegât, ancje se al tirarà dongje une vore di sogjets che, se prime e jerin filtrâts de filiere editoriâl, cumò a cjatin lis puartis spalancadis. Ven a stâi, ae fin, che ancje se l’ebook al darà une scosse che e movarà l’intîr implant editoriâl, par realtâts minorizadis come la lenghe furlane, si stan vierzint ancje gnovis, interessantis ocasions par sparniçâsi.

_________
GLOSSARIUT:
ebook: e je la contrazion des peraulis eletronic book, ven a stâi «libri eletronic», o miôr in formât digjitâl. Al è duncje un file consultabil su computer, telefonins di ultime gjenerazion, palmârs o dispositîfs di puest clamâts ebook readers, letôrs digjitâls. 
mp3: il MPEG1-Layer3 al è un formât audio digjitâl une vore comprimût, tant di podê jessi discjamât di corse di internet, ma cence pierdi cualitât par chel che al rivuarde la percezion pe orele dal om.
iPad: al è il gnûf dispositîf portatil prodot de Apple che al permet intun unic imprest di podê viodi fotos, videos, e-mail, web e duncje ancje lei i libris eletronics.

3 coments:

Anonymous ha detto...

Pe prossime rivoluzion chê e podarès sdrumâ il mont de editorie, varessin di intervignî les istituzions e no lassâ l’intîr implant dome tes mans des cjasis editoris,. Les realtâts minorizadis come la lenghe furlane, podarèsin ve vantaç se ad esempli, les regjons, cu les bibliotechis comunâl , subit (bastin pôcs bêçs) mudin i libris tradizionâi, scrits in lenghe furlane, cence vincui, tal formât ebook. Cussì cuant che cjaparan mode chestis novitâts sarâ plui facil spandi (anzit nol coste un franc) le lenghe furlane pes fameis, pes scuelis e jenfri i canais.
Nello Malisano
PS.A proposito di costi consiglio la lettura seguente: Biblioteche, contro la crisi
ecco l'e-book per tutti
http://www.repubblica.it/tecnologia/2010/11/05/news/ebook_biblioteche-8764601/

Jaio Furlanâr ha detto...

Di sigûr che al rivarà plui svelt che a no si pense. Cui isal che par Nedâl a nol pensarà di fâ un regâl?
Il fat al é che achi a no coventin nancje i ocjâi par lei parcé che a si puès ingrandî i caratars e lei fintramai tal scûr. Daspó, se tu sês strack a tu pues fâcji lei il libri e a tu âs dome di scoltâ. Cjale tropis robis che tu sâs fâ tal stès timp se tu âs dome da scoltâ! Cence contâ che a si pues scoltâ in compagnie!
Seont Amazon, i soi a tu âs di cjariâ le batarie dome une volte al mês!
Biel chel ebook spagnûl che a ti met ancje i colôrs e al é fat par lei i fumuts! http://www.energysistem.com/item/34720

gelostellato ha detto...

Chel des bibliotechis al è un discors interessantissim
sul seri
lis potenzialitâts che un strument simil al darès par inricjî la cognossince a son immensis
e a coscj une vore bas
par chel lis grandis (o la grande) cjasis editoris si stan za atrezadis par fâ sù mûr e mûr
e podè vendi ancje ce che al varès di jessi di rive jù
[par parados, o ai viodût sîts che profitant di cheste idee di inovazion a cirin di bigulâ la int VENDINT ebook di autôrs che a son scjadûts i dirits di centenârs di agns!]
Pensait pes scuelis ce inovazion che sarès, rivâ a dotâ lis aulis di letor e book e libris a cost cuasi zero par ducj, inzornabii e vie indevant...
pe leteradure al à reson Jaio, il scjas al è une vore, ma une vore dongje.

O varès alc di dî

Ti sêstu visât di firmâti? :)