lunedì 22 novembre 2010

Un carantan


Me nono, cuant che al jere in vite, al leve spes a Udin par afârs. Al partive o cul motorinat Garelli, o cu la curiere o ancje, se al jere in forme, cu la biciclete. Des voltis lu menavi ancje jo cu la machine. Lui al leve spes li de Agriculture e daspò si fermave in cualchi ostarie a bagnâ la bocje.
Nol sopuartave cierte int, par esempli nol sopuartave jessi fermât di che che lui al clamave… "chei di Gioàva". Savêso… chei sioruts simpri in golarine, che a devin fûr chei opuscui cun scrit… "Svegliatevi!".
Di sigûr però, chei che al odeave di plui a jerin chei che lui al clamave "i drogâts di Vie Marpurgo". Cuant che al leve a la cjamare di Cumierç i domandavin simpri cualchi franc, ma lui, a viodiju in ce stâts che a jerin, nol podeve fâ di mancul di berlâur "Lait a vore!"
"I drogâts di vie Marpurgo", cussì al clamave i indians metropolitans di Udin, strupiant parfin il non de strade!
Indians metropolitans, hippies, frichetons... ce intate che e zirave di chês bandis a Udin tra i agns ‘70 e ‘80...
Alore une dì, i rive dongje un cjavelon che al sameave vignût fûr dret dret di Woodstock, cu la bandane intal cjâf, i stivalets di cocodril, i blue jeans a cjampane, la cjamese psichedeliche e un curdon di caiessis tal cuel.
Chê dì o vevi compagnât me nono a Udin cu la 124... cheste e je une storie di veretât, o soi stât, disìn cussì, testemoni oculâr...

«Atu un carantan, nono?» dissal chel zovin.
«Se o fos to nono ti varès za aromai batût come il sorghet!»
«Ti prei, vuê no ai mitût nuie te panze!»
«Ah sì? Atu voie di jemplâ la panze? Ven a Selvucis li di Tam a fâ di famei, alore! Tu duarmis tal paion, tu mangjis polente e luianie rustide e di matine bon lat, e se tu fasis cualchi lavorut pal Cont tu ti bechis ancje un francut... e invezit tu, stâ achì cence fâ nuie... masse comut!»
«Po... a mi no mi va di lavorâ e di jessi sfrutât...»
«E alore reste li come un puar mendìc!»
«Un carantan... Un carantan...» al lave indevant a dì.
In chel il nono al mole un grant porco e... e si piert inte gnot dai miei ricuarts.

No, nie. Vuê o soi passât di ca, propit in Vie Morpurgo, a viodi chel grant gnûf palaç che al è il tribunâl; a viodi chei scjatolons di ciment plens di scritis sui mûrs... chei scjatolons dulà che e vîf sierade la int... une citât plene di SUV che a corin, cun dute chê int plene di mierde e... ah diu diu... ma, spiete spiete... ma sì... ma sì... velu là velu là sì, al è lui, propit tal stes puest di trente agns fa! Sì, lu cognòs de fisionomie, no mi sbalii... dome che al è invecjât e juste... il timp al è passât... cumò al à la muse scure parcè che si fasarà sigurementri lis lampadis, al à la cjamese di Gianfranco Ferrè vierte sul devant, il celulâr cul vivavoce e al è dentri di une cabrio biposto, cun dai grancj tubos daûr e dongje di lui, tal puest in bande, e je une biele bionde sui 25 agns che de muse e samee une russe... Ma al è lui, chel cjavelon voiedifanuie di trente agns fa!
E se o pensi a me nono, me nono, me nono che al à tant lavorât, tant patît, patît dute al vite par cuistâ dome il pan, il pan e la dignitât e une cjase fate di claps de Tor... adiudiu e chest chi devant...
«Un carantan… Un carantan...»
di Checo Tam
Conte n. 147

4 coments:

Anonymous ha detto...

Checo al veve di domandai un carantan ancje lui. Cuissà che no lu vessi cognossût ancje lui. Forsit al varès sintût un pocje di vergogne.

Nello Malisano

gelostellato ha detto...

In efiets, la conte, pur jessint un toc che al à il sô parcé, e cjape sens soredut inte premesse che il fat al è vêr; si no o podarès someâ a un alc di banâl e di za sintût, come condane sociâl ai beat convertîts al business.
Mi plâs une vore, a ogni mût. la storpiadure dai nons e la prime part, che e je un toc che al lasse sintî la autenticitât. Daspò, inte seconde parte, pôc a mi impuarte che e sedi vere o mancul, parcé che la sensazion di letôr e je chê di "stereotip".
Insome... une conte a miezis ;)

Jaio Furlanâr ha detto...

Il ricuart al é ben contât e ae furlane.Le descrizion dal luc e de int, dut i é. Mi plâs di imagjinâ il nôno d'in chê volte di front al zovin ancje se tai agns 70,80, chei di woodstock a podevin bielzà vê 30 o 40 agns. Par vie de morâl, in te seconde part, o pensavi di cjatâ il cjavelon simpri tal stès puest a domandâ un carantan e mi displâs di cjatâlu al gno puest cun tune russe:-)

Anonymous ha detto...

soi d'acuardi cun numar 2, conte un tic "didascaliche", si puedial dì ? Eric 68

O varès alc di dî

Ti sêstu visât di firmâti? :)