lunedì 20 dicembre 2010

Gnot di Nadâl


Bo di fûr, bo di man, ce fasarìno mai doman?


24-12-1965 – 15.30
Un biel intervent.»
«Sì, se al reagjirà cemût che o sperìn doman no brindarìn dome par Nadâl.»
«Sperìn ben alore!»
«Sigûr, intant bon Nadâl, e pal rest o viodarìn»
«Bon Nadâl»

24-12-1965 - 23.00h
«Che al scusi dotôr, o sai che o sin la gnot di Nadâl, ma nus à dite di clamâlu se al jere alc di impuartant»
«Sì disêtmi, isal alc?»
«Il numar 33/61, une crisi»
«A son passadis 8 oris de fin dal intervent, o ven subite a viodi»
Il dotôr Adam al torne tal Centri di sperimentazion sui animâi, al passe te aree risiervade fin te sale postoperatorie li che al è il numar 33, un cjan bastart di 4 agns: oris prime i àn traplantât il cerviel dal numar 61. Al è imobil, no si lamente, al à lis cuardis vocâls taiadis come ducj i siei compagns.
Il dotôr Adam si svicine par esaminâlu: 33/61 al vierç i voi, a son lis 24.00.
«Viodìn ce che o fasarìn di te...” al dîs sot vôs il dotôr. Il numar 33/61 al vierç la bocje ... e al dîs:
«NO STÂ A FÂ A CHEI ALTRIS...»
Il professôr al salte indaûr sbalsamât, al clame l’inservient zigant:
«Al fevele! Al fevele! Il numar 33 al fevele!»
Il cjan al torne a dî, cjalant il dotôr Adam tai voi:
«NO STÂ A FÂ A CHEI ALTRIS CE CHE NO TU VUELIS CHE TI FASIN A TI»
Al rive l’inservient:
«Dotôr ce disial?»
«Al fevele! Al fevele! Il numar 33 al fevele!»
«Ma dotôr...»

24-12-1967 – 11.00h
«Signorine, par plasê nus fasi une relazion di sintesi dal câs Adam»
«Al è jentrât ai 25 di dicembar dal 1965, par crisis alucinatoriis: al crodeve che i animâi i fevelassin e al veve atacs violents di agressivitât cuintri ogjets e personis. I vin fat trataments chimics e eletroconvulsîfs, ma nol à dât risultâts positîfs: si refude di mangjâ cjar e cumò al crôt che ancje dome scarpis o furniments di piel de cjamese di fuarce i fevelin. A pene che...»
«Va ben, va ben, signorine, o vin capît. Coleghis de Comission, mi pâr che dopo doi agns la situazion e je definide: la sience e à une soluzion. Ce disêso?»
«Sì»
«Sì, dotôr»
«Va ben, dotôr»
«Ben signorine, par plasê che e fissi l’intervent di lobotomie pal câs Adam cun prioritât.»
«Sì, siôr dotôr»
«Ben, mi pâr che par vuê al jere l’ultin câs. Alore nuie, si viodìn pe prossime riunion, e intant bon Nadâl!»
«Bon Nadâl!»

Bo di fûr, bo di man, ce fasarìno mai doman?

di Spirt Anonim
Conte n. 155

2 coments:

nelodifeagne_51 ha detto...

biel il to viac te soference, tal misteri di ognidun di nô. Bon Nadâl di cûr.

Spirt ha detto...

Si veve di meti cheste note ca. Forsi e jude a capî miôr la conte: Te gnot di Nadâl e je tradizion che lis bestiis a puedin fevelâ e che a predisin il futûr. Intune conte popolâr (Tiaris di Aquilee dal Istitût Achille Tellini), al è un contadin che al va te stale a fâ fevelâ i bûs domandant “Bo di fûr, bo di man, ce fasarìno mai doman?”

Dopo un moment di cidin i bûs a rispuindin “O larìn a cjoli lis breis pe casse dal paron”.

Il contadin, mat di pôre, al cor vie de stale sfolmenât, ma si inçopede tun clap e si cope, cemût che al veve dit il bo.

O varès alc di dî

Ti sêstu visât di firmâti? :)