lunedì 27 dicembre 2010

La codebue


O jeri in bici ta chê tremende dì: ducj si visais di chel maestôs temporalon dal 23 di Lui! Bande Mortean o viodevi un menaçôs nulon scûr che mi sameave come a la eruzion dal vulcan islandês che a fasevin viodi pe television; al pareve propit che il nulon al fos un grant sclop cun tant di lapii che si sparniçavin pardut! Bande des montagnis a jerin des lungjis saetonis che a leavin il cîl a la tiere. O passavi pe stradele blancje di Selvucis, vignint di Percût; a ôr de strade doi cjamps di blave cun plantis altis come oms.
«No ai voie di viodile brute» o pensai. «O larai a parâmi sot dal toglât de cjase bandonade dai vons; ce vûstu ch'al sedi scjavalcjâ chel portonat che al è tra la stale e il cjodat dai purcits. Juste pal timp che e passe la codebue...»
Cheste e stave rivant simpri plui dongje. O ai il vizi di pensâ a alte vôs tant che o samei un matucel. Cussì o sintii cualchidun rispuindimi inte blave... e jere une vôs che mi deve i sgrisui! E sgrasaiave... no rivavi a capî di cui che e fos... e pareve a ûs Rockets... come chei che i àn taiât lis cuardis vocâls e a metin une machinute tal cuel... saio jo... jerial cualchi vecjat platât par fâmi un scherç?
Mi disè chê vôs: «Va vie dret e no stâ a fermâti a Selvucis se no tu âs voie di viodile peloche!»
Insome o tacai a cori plen di pôre cence nancje cirî di capî cui che al fos inte blave; o vevi dome ubidît al misteriôs ordin. O jeri a pene rivât li de strade basse di Pavie che la ploie e tacà cun gruessis gotonis... ancjemò 200 metros e o rivi cjase a pene in timp... a sotet... vie svelt svelt dentri tal fogolâr cuant fûr si scjadene un aiaron cuntun mûr di aghe... orizontâl!!!

Un doi dîs daspò o torni a fâ une corse in bici bande Passarian, Tissan, Sant Scjefin e Selvucis: pins dislidrisâts, tets svolâts vie... cartei di propagande spacâts pardut...
Ve che o soi di gnûf a Selvucis, dongje de cjase bandonade dai vons: DISASTRI!
Dut il lanternit dal toglât e dal cjôt dai purcits al è colât par tiere te arie, spacât in grandis sclesis... propit dulà che doi dîs prime o pensavi di lâ a parâmi dal burlaç!

di Checo Tam
Conte n. 157

7 coments:

Anonymous ha detto...

A mi lei Checo Tam mi plâs simpri: che a sedin robis veris o inventadis, contis lungjis o curtis, al rive simpri a fâti colâ dentri de storie.
Dome cualchi consei: ocjo cun cualchi regulute di gramatiche (lapil > pl. lapii, no lapils)e cui adietîfs, a metiju masse dispès devant dal sostantîf si va a pericul di cjapâ une ande taliane.
In ogni câs brâf.

Il Camarîr

Dame mit Fächer ha detto...

Biele conte!
"Codebue", mi risultave dal dut gnove la peraule ma o soi rivade a cjatâle in "La vita in Friuli: usi, costumi, credenze, pregiudizî e superstizioni popolari" di Valentino Ostermann: "Code bue o code buje, bissabore, bissòn, sciòn (uragano tromba marina).
Vevi simpri dit "rogan", ancje parcè mi visi che di frute, il 28 di Lui, in glesie a Palaçûl, al vignive metût un catafalc cuviert di tele nere par ricuardà un disastrôs event dal 1867.

Ustîr ha detto...

mi cjapi jo la colpe su lapil/lapii
che il checo e jere la uniche peraule che mi veve dit cirile tu che nol saveve cemût voltâ lapilli

o cambi subit
pluitost ancje jo non vevi mai sintût doprâ la "codebue", ma propit mai
si impare simpri alc :)

Anonymous ha detto...

Alore i dedichi al ostîr la lezionute a pene publicade ;)

il Camarîr

Ustîr ha detto...

graciis!
o començâvi a disperâ ;)

Anonimo ha detto...

Vuei e sameave che e vignìs une codebue... e il cìl dal tramont al jere un spetacul zàl e grìs... véso viodùt ce robis?

Anonimo ha detto...

Insome... e je rivade ancje in Venit! robis di fâ pôre... mi domandi trop che al jere fuart il rogant... se di plui di chel dal astât 2010 che al à dât il spunto a cheste conte...
/CT

O varès alc di dî

Ti sêstu visât di firmâti? :)