venerdì 10 dicembre 2010

La perfezion evolutive


"La umanitât, come che al è ben clâr a ducj, no je perfete. No à ancjemò sierât il so cicli di evoluzion. Intal prossim futûr magari, nome par comoditât, i orghins sessuâi dai doi gjenars, masculin e feminin, a vignaran a stâi tal puest, par cumò dibant, ocupât dal cjâf. Lis bevudis, par esempli, che no coventaran nancje plui di tant, lis fasarìn sot de cinturie.”

Cussì al cjacarave il gran sienziât tal biel mieç de conference.
Claudio si cjalave sot de cinturie e al cjalave la sô vicine, che no jere, a dî la veretât, tant mâl, e nol olsave ni a tacâ boton, ni pensâ di viodisi cun al puest de muse ce che al veve pene dit il sienziât.
«Ce aial di ridimi siorut?» E jere la zovine che lu steve smicjant.
«No, mi scusi, e che o pensavi a ce che al steve disint il preseât confereçîr».
«Se al è par chel, nancje lui al samearès cuissà ce ben cuinçât, te maniere che al à pene spiegât chel sempio di sienziât!»
«Ancje a jê i parino stupidagjinis?»
Intant chel basoâl al leve indenant.
“Cussì fasint i zovins, ce tant plui interessâts a lis voris dal cubiament, a podaran incjastrâsi a dovê, cence vanzums di romanticheriis, e cence pierdisi in chês fadiis di cernieris, botons, astics, chel disviestisi e discrotâsi, che al sarà dut dibant, invezit dut clâr e in mostre. Il contat uman al vignarà sempliç e automatic, i ormons a fasaran la leç, e la leç e sarà chê di tacâsi ogni volte che si varà la ocasion.”
I doi, in ultime file, si cjalavin forescj in chel auditori che, dutun, al faseve moto di sì e si pocave par sot dantsi di comedon.
“Bastarà jessi fers a di un semafar e, prin che al vegni vert, la copule e sarà stade bielzà completade sparagnant timp, di mieze a dôs oris par volte, che al tornarà bon par incressi la produzion industriâl e la produtivitât, cussì basse in dì di vuê.”
«Jo se permet, mi clami Claudio, vigjil dal fuc, se no scugnìs jessi ca par lavôr, o sarès a leimi un libri».
«Lu vevi capît de monture. Plasê, Bete, jo o soi la segretarie dal assessôr che al è a presiedi la cunvigne».
“Tant che il triviâl 'foti', che il plui vocatîf 'fâ l'amôr', a pierdaran valôr, a vignarà di mode dâsi cualchi colput cul cjâf, e il zûc al sarà fat. Si disarà par esempli: 'Mi à plasude, i ai dât un colp cul cjâf, e ce contente che e jere'.”
«Che scusi, ma ce fasaressie jê se dut al fos tant facil?»

«O metarès il cjâf intun sac par no fâmi tacâ dal prin, come lui, che mi smicje!»
“Ce che al sarà di ridi al è che vierzisi la barconete dai bregons, o tirâ ju lis mudantis, al coventarà par fâsi une babade, ma al sarà dal dut vergognôs fâlu. Deventaran cussì improibidis lis bibliotechis e lis librariis, lûcs di perdizion e di pecjât. La gnove malatie e sarà la culture, une epidemie lâ a scuele, une disgracie laureâsi, un corot nome a lei il gjornâl.”

«Bete, prin che al sucedi dut chest, ce disie, vignaressie a cjoli un cafè cun me?»
«Claudio, parcè no, ma, mi racomandi, nuie colps di cjâf!»

di Stefano Gasti
Conte n. 152

2 coments:

Dame mit fächer ha detto...

Se fos une conte misteriose o disarès ca è tirade fûr da "La Cosmogonia dei Rosacroce" di Max Heindel, e jo o vevi juste provât a voltà alc par furlan:

La plante a je inocente, ma no virtuose; no à desideri, ni sielte. L'om ju à ducj e doi. Lui al pues lai daûr o pûr no, ai siei desideris a volontât, par imparà il mût come dominâsi. Mentri che lui al jere simil a la plante, ermafrodite, al podeve gjenerâ di bessôl cence jessi judât di nissun; ma cundut cal fos stât cast e inocent come une plante, al jere ancje, come jê, ancjetant incussient e inatîf. Al fin di progredî, l'om al doveve vê un desideri ca lu stiçàs e une ment, ca lu condusès e al jere par chest che metât da la so fuarce creative, a jere stade tratignude al fin di furnii un cerviel e une laringje. Lui al jere a chei timps di forme sferiche, simile a che dal embrion e la so laringje di cumò , a faseve part dal orghin di riproduzion, che al veve aderît al cjâf, cuant che il cuarp al je deventât dret.

Anonymous ha detto...

No Bete, no ven di là, pitost une sugestion tu le puedis cjatà intune pagjine dal scritòr Mordecai Richler te idee de inversion dai orghins.
sg

O varès alc di dî

Ti sêstu visât di firmâti? :)