venerdì 23 aprile 2010

Su la culine



Al jere clip chê sere e nô, di vuaite sul çuc, o vevin cjatât ancje il timp di scherçâ.
Chê Vierte e someave plene di sperancis e jo o pensavi za al so vistît di fieste, ae stanzie di zontâ e ai lavôrs par meti a puest il vignâl.
Po chel fûc, là jù su la culine, nus à dismots dai nestris pinsîrs.
Nol veve lis flamis legris dai pignarûi, ma chês scuris dai brusarilis. E l’aiar nus à puartât il rivoc dai colps e dai berlis, e chel odôr stomeôs di stiç. E il ridi si à sfantât tai voi. E o ai corût come un mat, ma no avonde par murî ancje jo. E il gno berli al à cuviert la gnot.

O ai pierdût il gno cûr su la culine. Dentri di chei mûrs colôr cjalin. Di là di chês voglariis che a son stadis barcons. Sot di chei trâfs che a fumin di oris.
E no ai plui vôs, ni lagrimis. E o volarès sei muart cun lôr: cjar cun cjar e cinise cun cinise. Ma al è masse tart par jessi muart. Masse tart par restâ vîf.

A cressaran i baraçs tra chescj rudinaçs, e o volarès sei baraç ancje jo, par braçolâ inmò une volte chescj claps amâts.
Ma jo o soi fer achì. Cence plui sten, ni façolet ros. Svuedât di dut, ancje de voie di svindic. Le ai pierdude ancje chê, cul gno cûr, su la culine.
di Carli Pup
Conte n. 125

mercoledì 21 aprile 2010

Trê gjai




Intun paîs dongje Sant Denêl a cjantavin trê gjaii. Il prin, che al stave tal gjalinâr de famee dai Cains, che e jere la plui pedoglose dal paîs, cuant che al vierzeve il bec al someave che cu la sô cjantose al volês contâ al mont la sô miserie. E ogni dî, tacant di buinore, buinore e lant indevant par dute la zornade al tacave cul so cjant: «……….tanteee miserieee……. tanteee miserieee…»
Chei altris doi  gjaii, che lu cognossevin e che a savevin che Checo, il so paron, invezit di butâi  tal gjalinâr cualchi asin di blave, i butave dentri stran, par sbefâlu, prime un, e dopo chel altri i rispuindevin: «la iseee? … … la iseee? ... ...» al tacave el prin e subit  daûr i rispuendeve el secont: «ca di me! … … ca di me!… …»
Lôr a podevin sbefâlu e a jerin biei, sglonfs, passûts, circondâts di gjalinis, e ogni dì a becotavin blave, noli e cerfoi fresc. Sfidi: un al stave tal gjalinâr de famee dai Trotos, chel altri tal gjalinâr de famee dai Norâs, les famees dai bocons dal paîs.
Ma cheste volte, e je propit vere, che la cuaie no je lade simpri par chel agâr, a lu à saltât, e magari cussì no, si podarès dîsi, lu à propit saltât e strasaltât.
Vignudis les fiestis, chei doi cjapons che a passavin il lôr timp a sbefâ il gjal di Cain a son finîts prime cu les gjambis par aiar e a la fin te padiele. Invezit chel puaret, cence plumis, ma soredut sec e cence cicin tes cuessis, cussì al jere ridot, se vais in chel paîs lu sintîs ancjemò a cjantâ a la sô miserie.
di Nello Malisano
Conte n. 124

lunedì 19 aprile 2010

Cemût passimi la gole



O soi il miôr dai normâi, un che al mene la cariole ogni dì. Un provât de vite, cu la panzute e i cjavei sal e pevar. Par me rivâ a lâ dongje a une femine, che no mi pare vie, beh par me al è za un grant sucès. Al è un procès mentâl e fisic no di pôc. A saressin une tasse e une sporte di buinis motivazions a sburtâ chê femine a no calcolâmi. Cheste abilitât di tignî cu la fevele la atenzion de femine, tant di intortâle, ben e no mâl, no meretarèssie il premi che tant o di vin di bisugne? Un premi ae muse rote, che mi le moli nome pe passion che o met sul plat.
Impen tal plui biel che je conti, cul voli smamît mi domande, le âstu finide? Magari o zonti jo, no ti ai nancje tacât! Jo invecit o soi aromai cul sanc di fûr de orelis, cul afiet e l'atenzion che e sedi jê a butâsi e a saltâmi intor come se o fos Raoul Bova o Harrison Ford, po rivâts ae fin dal lavorut, ce mi disaressie, sêstu stât brâf? Sigûr, Brâf Furlan, o rispuint jo! Ma se pene ti ai tocjât tu sês lât fûr dal semenât e tu âs disledrosât i voi, che no mi soi nancje inacuarte di vê sbisiât cun te! Ve, lis feminis, cu la lôr naine, cui lôr timps che no son i nestris, cu lis lôr esigjencis che no lis san nancje lôr. Tant ben o sai che a son curtis di manie. L'om al volarès sintîsi a dî: tu mi âs doprade come e plui di une mietitrebie, tu mi âs fate gjoldi di murî! E jê invezit cui voi clopadiçs e il rimuars di vê un côl di sopressâ e trê bistechis di scongelâ ti sgnache un: Al è stât vonde biel. Al è chel vonde che mi fâs lâ in bestie. Vonde ce, ce varessial di jessi stât l'Apollo Undis, o il Tor di Mortean in orbite satelitâr, o ce altri? L'om al varès volût sintî a dî: Mi à plasût che tu mi vedis travanade fin ae medole! E jê invezit ti dîs, viestiti che tu cjapis frêt. Ce mi interessial se mi cjape la polmonite, magari mi vignìs daurman la peritonite, ma cuant che o ai fat ce che o dîs jo, e cumò o fasin dut il ripàs dal camasutra, fasin i couboi che jo o soi Tex Willer e tu la sô scuò, jo Tarzan e tu la plui sgrimie des Citas e ce plui dal purcitament che nus ven iniment.
E jo, une che si ten ben, che e à alc di biel ma nie di perfet, ti disarès: Sì che tu sês simpatic, tu âs alc di dolç e malinconic tai voi, tu âs ancje alc dal frut e cuant che al covente tu sâs ancje tirâ fûr chel tic di fuarce che nol vuaste. No sai, tu âs ben alc che mi plâs. Ma parcè se tu sês ca cun me a pene che mi ziri tu cjalis il cûl, no il gno, chel di chê altre cu la cotule curte pene passade... mancul mâl che no ai viodût se di no ti molavi li che tu sês, raze di pandolo... E tu no tu le âs cjalade jê, tu âs viodût dome chel cûl... Bon, disinlu o soi stade avonde ben cun te, no sai, magari si tornìn a viodi... E tu, sì, ma cuant... e ce e co, e tu mi ziris ator e tu vuelis rivâ a dut usgnot: dut ce? Il liet, como se chel al fos dut. E bon e cuant che o lin tali jet, ce crodistu che al sedi facil par me, sigûr, par te al è dûr meti la muse e vignî a concuistâmi, ma cuant che o sin alì cence vistîts, mi plasarès cjatâ in te alc di tenar, che o 'nd ai vûts vonde di oms che mi fasin sintì une bisteche, e no une femine...
Ma amôr, se ti ven fan no ai nuie di dâti! Sigûr che tu âs ce dâmi, tu âs propite dut par passi la mê gole, dut ce ch'al mi covente: Ce disaressistu di polente e frico?
di Stefano Gasti
Conte n. 123

mercoledì 7 aprile 2010

Secont plan



O tai vie une striche fine fine, cul taieongulis.
La mangjarai plui tart, cuete sot l’aghe bulint dal rubinet. Mi distiri, poiant il cjâf sul tapedut di spugne, rodolât. Ogni tant, ingobît par no tocjâ i sanitaris, o rivi ancje a durmî, ancje se la femine a son setemanis che e rugne e grate la puarte cence polse.
Alore, par solit, mi alci, mi lavi la muse e o bêf.
Vierzint l’armarut daûr dal spieli o viôt simpri chês scritis: Silhouette, GomGel, Infasil.
Nuie che al puedi coventâmi.
Purtrop dome la tele di piel che e cuvierzeve il water si podeve mangjâ, e lu vin za fat, dopo vê finît i vistîts.
Provi a vierzi il barcon, ma in strade a viôt dome muarts.
A cjaminin clopant e a cjalin adalt pene che a sintin il rumôr.
Ce pussibilitât varessio, a butâmi e provâ a scjampâ?
No sai e no ai voie di savêlu. No vuê, almancul.
Mi senti sul tapon sierât e o cjali i bregons di me fi, sbregâts su la cuesse.
Al è miôr che mi movi, che al à tacât a puçâ.
O torni a cjapâ sù il teieongulis e o cîr un tocut bon, par taiâ vie une altre striche.
di Raffaele Serafini
Conte n. 122