lunedì 14 marzo 2011

Domenie di cjace


Febo al coreve come un mat in tes braidis, saltant i riui come un çupet: al scjampave al nemì, al cirive di evitâ i tons che a jemplavin l'aiar intune frescje domenie di autun. Al coreve in crot, discolç, mimetic, cuviert dut di pantan, cui dai baraçs parsore dai cjavei luncs, une golaine di vues ator dal cuel, la muse piturade a riis come i ûfs di Pasche che si metevin a boli cu lis jerbis une volte. Ma il nemì lu veve aromai brincât. Al sintive i cjans che a rugnavin... Ju sintive simpri plui dongje. E cussì, straconon par tante fadìe, Febo si poià asedant cu la schene cuintri un çamar e al spietà il moment de esecuzion. Doi cjans i rivarin dongje: a sameavin come... chei diaui che si viodin sui parepets des glesiis gotichis. Po al rivà il paron des bestiis: si fasè larc tra i baraçs e si mostrà in dute la sô potence. Al jere alt doi metris sù par jù; al cjaminave su dôs grandis sgrifis; sot des alis al veve come des sgrifis-mans e cun chês al tignive strente une sclope. Al veve lungjis plumis ros modon e neris, lungje code e fuart bec; un cjapiel di feltri cu la plume e une sorte di gjilé verdon. Insome al jere un fasan, un fasan-cjaçadôr!
Nol jere nuie di fâ. Impussibil scjampâ ni implorâ pietât. Il fasan al sparà doi colps a curte distance e milante balins a jentrarin te cjar di Febo che al murì al istant intun lâc di sanc cjalt.
CLO CLO CLO CLO al disè il fasan e te sô lenghe al oreve dî: O AI FAT CUOTE!

Dopo di chel trement insium Febo si sveà intun lâc di sudôr ta chê frescje domenie di autun. Lu vevin invidât a cjace intune altre riserve ma lui al le di sburide a cjoli la sclope: le spacà cuintri il laip tal bearç.

di Checo Tam
Conte n. 169

6 coments:

Anonymous ha detto...

Braf Checo, come a dì che chi cal s'insiumee, prime o dopo al cjate el so compari in un altri insium.
Mandi
Frank Spada

gelostellato ha detto...

bisugne propit che lu dîsi, ogni tant.
Lis contis dal Checo, ancje cuant che no ti somein nuie di ce, a son simpri vivis, ti lassin simpri un plasê di una imagjine, di un leture sute e che va simpri di rive jù.

mi plâs chest element :)

Dame mit Fächer ha detto...

Propite biele! Mi à fat visà di cuant co soi stade tal Cjastiel di Konopiště, a 35 km a sud di Praghe, residence di Checo Ferdinand, cjaçadôr incragnît. Cuant ca si jentre tal cjastiel, a tocje viodi un sproposit di trofeus di cjace che a mi mi à fat vignî i sgrisui. E son 300.000 fra cjâfs di cierfs e cignâi, çus, uciei rapaçs e cuissà cetantis codis di gjal cedron incurnisadis e cun tante di date di ce dì che jerin stâts copâts. Se si calcole che la so manie a je scomençade a 10 agns al vûl dì che, rivânt fin a 51, al vedi copât almancul 20 bestiis in dì. Jo mi soi cjatade alì come scaturide e mi è vignût di pensà che forsit a Sarajevo l’atentât a lu vevin metût adun lis besteutis.

http://donebete.splinder.com/tag/no+jere+fam

Gianfranco ha detto...

Biele la conte e la idee. Brâf Checo.

Ma il finâl no mi convinç. Une morâl masse drete, masse slisse.
O varès preferît (robe dal dut personâl, si capìs) che Febo, suiât il sudôr dal brut sium, si fos vistût, al ves cjapade la sclope e al fos lât ae sô batude di cjace, come simpri, sperant di cjapâ il fasan.

Dret pe sô strade, cence un ripensament!

O pensistu, forsit, che cun dut il vencul gjaponês che al à cumò sot dai voi, il "mont" al sedi bon di spacâ la sclope dal iperprodutivisim e dal iperconsum e fâ di mancul di lâ a cjace dal fasan dal pil e dal profit?

Mandi!

ILfurlanist ha detto...

Biele conte, e devente la mê preferide di Checo. O soi d'acuardi però cun Gianfranco: un finâl masse moralistic, cundiplui pôc realistic. Dificil che un cjaçadôr al crevi la sô sclope par un sium. Mi sarès plasût ancje a mi une conclusion plui stiçote: Checo, tu sês masse bon ;-)

Anonymous ha detto...

"il vencul gjapones"?
Un cont a l'é viodilu sentas denants a la TV, un atri al sarà chel di sentilu cuanc che ti siararà le puarte daur de sclene in automatic, cence movi un det.
F.S.

O varès alc di dî

Ti sêstu visât di firmâti? :)