lunedì 30 maggio 2011

INFLUENCIS


Il von al veve le manie dal asêt. Se si lu ves lassât fâ, al varès mangjât ne salate ancje par gulizion. Ce tant che i plaseve l'asêt! L'asêt di vin neri, di vin blanc, di most, il balsamic e l'asêt di nuie, ma asêt ancje chel. E ce tant che al rideve des salatis polachis e russis cuinçadis cu le maionese o le creme! Cemût jerial pussibil? E jù un'altre rasade di asêt inmó prime di cerçâ se no 'nd jere avonde. Altri che maionês! A lu saveve ben lui che al jere stât a lavorâ in Russie.
Maionês? Il nono cuant che al contave chê di so pari, al si meteve a taule e al tacave a contâ chê dal asêt. Al diseve che le peraule maionês e ven dal francês e alore parcè pronunziâle ae taliane? Cussì al zontave senape disint che par furlan a si varès di clamâle mostarde e no senape. A lu saveve ben lui che al veve stât vincj agns in France e alà a cuincin le salate cule mostarde... tant che al contave chê dal ors e chê dal von, al diseve che lui a nol jere stât tirât sù cui tantum ergos e che tal '68 a Parigji lui al faseve bielzà il '69 e zontant sâl al sâl, plui al contave a plui al salave.
So fi, tirât sù cun Goldorak, une dí i veve metût il pevar tal salarin, ma invezit di vuadagnâsi une ridade al jere restât di stec cuant che so pari, dopo le prime cerce, al veve zontât inmó pevar. Anzit, d'in chê dí al sâl sul sâl al zontave pevar sul pevar e le mostarde ae senape. Robis da mats parcé che lis sôs storiis a no finivin plui.
Vuê, seti par voie, seti par nuie, seti par fuarce o par fâ miôr che piês, il fi al fâs dut in dopli.
L'asêt, il sâl, il vueli, il pevar, il sucar, il cafè, il formadi gratât, dut in dopli. Ancje le salate. Alore, parcé no ancje il rest?
Cussí, cun chê da vivi il dopli, ae trentine al somee che al ledi su le sessantine e forsit al vivarà dome le metât ma almancul al varà vivût dut intîr.
«Ce sano i vecjos de vite che no àn mai savût stâ cence lavorâ?»
So fie invezit... Chê po, nuie cul mangjâ o il cuinçâ. No ise cuinçade avonde? E po jê e je stade tirade sù cule Coke. Pal moment e çuete.
Par vie che a si é fate operâ dal poleâr di un pît. Il grop che i faseve in tes scarpe al pareve cussí brut, ma cussí brut... Insome; a pene che no çuetarà plui, a si fasarà operâ ancje ae çampe. Si puedial lâ ator cuntun poleâr sí e un no? No, nomo? E alore a si è fate fâ iniezions di buttok pes ruiis che a crodeve di vê tal cerneli e par trê mês e à vût mâl di cjâf. Ma si puedial vivi cu lis ruiis ator dai vôi?
No, a no si pues. Alore vie une altre iniezion e par doi mês a jere deventade sorde.
«Achi di pôc, si fasarà patocâ encja la ruia dal cûl!» al dîs so nono ironic.
Ma jê a no lu scôlte. Cul poleâr dal pît a profitarà par fâsi "butocâ" il rest de muse, disse. Ce sano i oms di chestis robis? Po palpantsi une tete: Joisus!
di Jaio Furlanâr

5 coments:

Anonymous ha detto...

Di pari in pari, di fie in fie, di dut e nie... ah, Jaiones di un amì torseon pal mont, ce tant che tu le sas contà, e contale cussì ben che... dì po', setu migo intenzionat a deventà nono? Ah, puar Jaio, che a fuarce di poleasi un det nol mole di cjalà lis feminis e al... one, two, mi racomandi, viot di fa une triplete ancje par me.
Mandi
Frank Spada

Galliano ha detto...

Jaio,
Unevore biele la conte, cuinçade cun sauride ironie.
Al è tant timp che no leievi robis tôs,mi fas plasè savè che tu sês simpri in orbite.

Mandi.
Galliano

nelodifeagne_51 ha detto...

joisus,palpai une tete? ma si, Jaio.... forsit tu as reson. Une palpade di chês justis la ripuartarès su la rete vie. Bravo Jaio.

Jaio Furlanâr ha detto...

Graziis a vualtris. Si sintin.

nelodifeagne_51 ha detto...

Jaio, a metât jugn o ven in furlanie. Mi plasares bevi un tai insieme. Insome, cognossi di presince cualchidun che al scrîf tal blog di contecurte.
Mandi
il gno recapit: ne_llomalis@yahoo.it

O varès alc di dî

Ti sêstu visât di firmâti? :)