venerdì 10 giugno 2011

LA ELARE DAL BASAVON


Nol impuarte se lis liendis, o lis storiis di une volte a sedin veris o no, ma tant che si è fruts al è cussí biel da crodi. A si fasisi films tal cjâf, aventuris tal cûr, a si tache a contâ a di chei che ur plâs di scoltâlis e pôc a pôc a deventin veris storiis di famee, di paîs che daspó magari a deventin tradizions. Come le elare dal basavon.
Le elare dal von e cuvierzeve aromai dut il mûr de stâle e a si jere zontade cun chê dal basavon da un biel pieç. A si viodeve dome le diference tal colôr des fueis. Lis lidrîs, da sot tiere in sù aromai a fasevin dut un, e chest, aben che chê dal von e jere partide vincj agns plui tart e dîs metros plui in là.
Chê dal pari invezit e lave a cucâ fin sot de linde, là che lis cisilis a platavin il lôr nît e il nono al meteve a secjâ lis panolis.
Come ducj i oms de famee, ancje lui al veve di lâ tal bosc a cirî le sô elare da plantâ. So nono i veve dite che sot di un cret lant sù pal mont al podeve cjatâ une biele sorte da tirâ sù.
Chest al jere impuartant parcè che dopo al veve di fâsi amí cun le elare e cressi cun jê, d'Istât e d'Unvier o come in te Vierte cuant che le elare e tache a fâ fûr lis gnovis fueis di chel vert tenar che ducj i arbui e lis cisis li ator a pene che lis viodin a tachin a fâ compagn.
La sô elare e veve lis fueis di trê colôrs e al stave ben di contâ che chel dal basavon al jere il plui scûr, chel dal von al jere plui il clâr e chel di so pari al jere di un ton plui tenar. Chest, i al veve dite sô none, ma aromai lui al crodeve di vêlu inventât di bessôl.
Secont i libris, le elare e pues vivi plui di tresinte agns e chê dal basavon a 'nt veve bielzà plui di cent e passe ma lui, chel dí, al cjalave le sô elare sul mûr ator dal cancel. Chi e là, un ramaç al si strenzeve cuintri il mûr e i faseve pensâ che il timp al filave, che al veve di lâ e cheste volte, come il pari, il von e il basavon al varès stât vie biacemai dîs agns.
Jenfri un salût ai siei, ancje un maman sore le elare par fâ colâ lis fueis muartis o scancelâ i ricuarts che il vint a nol rivave a distacâ e che i mandis dai siei, su le puarte di cjase, a no rivavin a dî parcé che ur vignive di vaî.
Al veve di lâ. Le elare a sarès lade indenant pal mûr tant che lui al lave indenat cu le vite.
Cuissà in dulà che a saressin rivâts a chi di dîs agns? Al sintive inmó il ghiti des fueis sot dai dêts.
Po, une idee. Parcè no cjoli cun sè un pôc di chel vert, di chê fuarce, di chê voie di vivi, de sô pazience e de sô volontât? I bastave cjoli un ramaçut, une frascjute, metile intun façolet di cjarte bagnât e, involuçât intun sacut di plastiche, al varès tignût trê dîs. Al tornà indaûr e...
Trê dîs dopo, a le plantave in Americhe.
di Jaio Furlanâr

5 coments:

frank spada ha detto...

Complimentasi cun Jaio, par une conte biele tant che vivile, lu doi par scontat, ma denant a un dubi no esiti a domandà all'autor: se une elare no cjate un mur par là su, ce sucedial?
Intant viot di stami ben e di grapati tant di no lassanus mai.
Mandi Furlanar.

nelodifeagne_51 ha detto...

Brâf Jaio. Tu sês propit un vêr scritor !! E ancje se non ti mancje le malinconie, ta l'anime di cui che ti lei, tu metis tante voie di vivi.

Jaio Furlanâr ha detto...

Frank, se tu âs chê di viodi cemût che le elare a fâs cence mûr và a viodi achi http://www.lavinium.com/italiano/barolo_grasso.shtml

Graziis pe vuestre apreziazion, cuntun compliment o savevi bielzà vivi par sîs mês, cun doi o scuignarai scrivi almancul un an:-)

Dame mit Fächer ha detto...

Ce biele la conte di Jaio!
Mi soi pensade di cuant che agns fâ o jeri lade a visità la tombe di Antonio Andreuzzi, a Navarons, e dopo ancje a viodi a Pofàvri lis elaris pituradis sui mûrs.

Vele achì la foto
http://donebete.splinder.com/tag/pof%C3%A0vri

Jaio Furlanâr ha detto...

Viodût!

O varès alc di dî

Ti sêstu visât di firmâti? :)