lunedì 30 marzo 2009

La otave corsie


Di cuant che al jere stât assegnât al progjet par fâ sù i pilons dal gnûf tubul di scoriment dai trens pneumomagnetics, daûr dal plan di disvilup des grandis oparis de macroregjon, resonant sul fat che di cualchi bande chei pilons a vevin ben di sei poiâts, Maur si cjatave ogni tant a pensâ al mont di difûr, che lui, tant che ducj chei che a vivevin al 3-ST, nol veve mai viodût.
Ma di chê dì che, sul tren, de bussule ermetiche a flanc de sô, al puest dal solit student sbarlufît, e jere jessude jê e si jere peade su la sente a rimpet, il pinsîr dal mont di difûr al jere deventât un carûl che nol fermave un moment di roseâlu. Lu stiçave di gnot e di dì, a cjase e sul lavôr, fin che al veve scugnût ameti che chê strussie lu veve cjapât parcè che lui, tal mont improibît di parsore tiere, al veve voie di lâ propit cun jê!
Maur al veve vincjenûf agns e di feminis al tignive di vênt cognossudis no pocjis. Inte zornade libare, sul tart, dopo cene, al jentrave dispès intun olobordel, viert di pôc dongje dal Ipercom, juste daûr dal so apartament. Cualchi altre volte no i displaseve di lâ al Virtual: la sintetiche, in spiete sul marcjepît, lu cjapave pe man o par alc altri e lu puartave dentri, cisicantji inte orele… e lui al riduçave e nol rivave a dîi di no. Ma fis intai voi, come che al faseve cun jê, lant e tornant di vore tal scompartiment dal pneumomagnetic, nol veve cjalade mai nissune. I varès plasût di motivâi alc de sô intenzion di lâ difûr ma, fale che a vore, par servizi, o in apartament, fevelâ al jere improibît.
Da rest, nol jere timp plui ni par fevelâ ni par pensâ. Une volte dispeâts des sentis, i passizîrs a vevin dîs seconts par jevâ sù e jentrâ intes bussulis individuâls, prime che chestis si sierassin e a puartassin ognidun fin sul puest di vore, daûr dal program de zornade. Ta chê dì, Maur al doprà chei dîs seconts par cori fin sul riplan di servizi dal pilon de stazion mezane in cuote, tirâ fûr de sachete la clâf hardware che al veve cjapade sù di scuindon in ufici la sere prime e metile inte frissure juste de parêt: cence bisugne di sburts, il portelon dongje si jere viert, mugnestri, cuntun scloc. Une glotude par rindisi cont, intun marilamp, che jê e jere li, daûr di lui, e po… vie di corse, ducj i doi viers il mont libar di difûr!
Il puiûl al 25-PT, di dulà che e partive la scjalete che e puartave jù par tiere, al jere a cent e cincuante metris di altece. Un aiar fuart di garbin ur sgardufave i cjavei. Parsore e sot di lôr a rivavin e a partivin di ogni bande altris tubui cui pneumomagnetics didentri a sietcent a l’ore. La ombrene di chel berdei si poiave, in bas, su lis gobis de largjure e e disegnave, parie, une stele grandonone a nûf pontis. Dulintor, la plane e jere taponade dal mâr vert de foreste salvadie, foropade ca e là dome des spicis dai tors plui alts, juste a ret dai paîs là che une volte e viveve la int.
Une ponte de stele e rivave a lenzi il flum di asfalt de autostrade viere, lassade abandon cu lis sôs siet corsiis par bande: a jerin masse misaris e lentis a confront cui tubons dai trens. Cun di fat, plui indenant, si viodeve ancjemò il splaç dal cantîr dulà che a vevin molât i lavôrs imbastîts par fâ la otave corsie.
di Gianfranco Pellegrini
Cjolte n. 26

6 coments:

Dame mit Fächer ha detto...

Il prin di Avrîl 2009, tai coments, Gianfranco Pellegrini al scriveve: " ... mi soi vicinât ae leterature di fantasience dome tai ultin timps. O ai let alc di Ray Bradbury, Philip Dick, Richard Morgan, Walter Mosley..." e ancjemò "Jo o volevi invezit marcâ la carateristiche di un sisteme che al à cjapade la strade des corsiis a oltrance (vuê, intal mont reâl, li che e je ambientade la conte, si fevele za de tierce)."
Propite îr, sul Gazzettino, si conte di chê tierce corsie "daûr dal plan di disvilup des grandis oparis de macroregjon", come ca si lei ta conte, che a rivuarde ancje Palaçûl, il mio paîs.
Tal coment di Gianfranco si podeve ancje intuì la future traduzion da la ultime conte misteriose, "En Masse" di Walter Mosley.

http://carta.ilgazzettino.it/MostraOggetto.php?TokenOggetto=3041717&Data=20110723&CodSigla=PG&TestoRicercaUrl=palazzolo

Frank Spada ha detto...

Dame, o ai provat a meti La sciatule di Raffaele Serafini (mi è plasude e o ai clicat mi plas) dentri La otave corsie di Pellegrini (buine ancje cheste): a Palme tal e qual e a Oslo il mont si grate.

Dame mit Fächer ha detto...

Mi visi un film dal '84, "Gremlins" - Raffaele al jere piçul e po a nol va nancje al cine - di cuant che ducj i gremlins e son riunîts ta un cine a cjalà Bianca neve e i sette nani, Billy al fâs esplodi l'edifici vierziint lis valvulis dal gas, copânt ducj mancul che Ciuffo Bianco. La orende creature a met a tiere Billy e e cirìs di butâsi ta une fontane par moltiplicâsi, ma Gimzo cun at eroic al spalanche il barcon fasiint jentrà la lûs dal soreli ca cope Ciuffo Bianco.

Frank Spada ha detto...

Dame, lu hai viodut cun lis mes frutis; che gnot, la plui picule no rivave a indurmidisi e jo o ai scugnut sta lì cun je a contà contis, fintremai che il soreli a l'à inganat lis oris: so sur... incredule, invidiose, e fat di gulizion vie a scuele riducjant duciis tre insieme.
Manculmal che il timp no mi ha sblancjat i cjavei e che i nevoduts e stant rivant par tignimi indafarat a tignì impiat el soreli su le coce.
Mandi Dame mit Facher.

gelostellato ha detto...

vuè
che no voi al cine no vul dî che no cjali i films
al è il gno alibi par no viodiu, plui che altri ;)
a ogni mût i gremlins a devi vêlu viodût almancul 7-8 voltis, e o ai simpri desiderât vê un... :)

Frank Spada ha detto...

vê un... ? Geluti, spessee cun ce tu as tal cur e che la vite si fasi... un sol? almancul doi: une frutute e une frut e dopo un nevodut (se saran dos, mior, se no contentiti di ce che o mi auguri pai Serafins :)
Mandi.

O varès alc di dî

Ti sêstu visât di firmâti? :)