lunedì 24 ottobre 2011

CIRÎ GNOT



Di gnot mi sameave come di jessi spiât. O crodevi di no jessi mai bessôl cuant che o durmivi tal jet. No je une novitât: tropis voltis us ajo fevelât dai miei vencui?
Vê in cjamare dai manifescj cui cuadris di Hieronymus Bosch nol jude, specialmentri cuant che o cjali “Ascesa all’empireo”, cun dutis chês animis pierdudis intes tenebris che però a van viers une sfere di lûs. Al samee che che il pitôr al ves vût une esperience in pont di muart, o forsi i vevin contât alc, cui sa?
Bon. No varès di cjalâ chel cuadri e nancje chel di chei diaulons che a mangjin i danâts come che ju an piturâts i fradis di Limburg (pitôrs de Belgjiche).
Alore ta chê sere mi indurmidìs. Dut regolâr. Però, come che mi capite di spes, mi svei vie pe gnot. Par un moment no rivi nancje a capî dulà che o soi. Dulà isal il mûr? Dulà il cric de lûs? Sojo par da pîts?
Dopo un pôc o tocji il mûr e o cjati il cric. Piade la lûs mi alci in sinton. O voi li dal barcon. Lu vierç. Meracul! Une gnot bielissime e plene di stelis. Nie umiditât. Clime fantastic. Fresc. Aiarin. Il viers di une çuvite. Mi ven voie di lâ fûr.
Cualchi ore prime, di sere, a jerin dai nûi a orient e daûr a jerin platâts i lamps. L’aiar al devi di vê partât lontan il temporâl.
Bon. O voi fûr. O cjapi su la biciclete e mi met a cori pes stradelis di campagne. Al è bielissim.
O rivi intun grant prât dulà che a cjantin milante e milante grîs. O cjali lis stelis parsore di me.
O soi propit pierdût ta chei cjamps di stelis sot dal voli dal Sgripion.
Mi rint cont di trop ben che o stoi. Ce biel che al è vivi, cialâ il cîl, sintî i gris cjantâ e respirâ chist bon aiar fresc.
A un trat mi ‘nacuarç di une lûs avonde basse: mi samee che mi vegni daûr. Trop ise lontane? No si capìs ben… e je une lûs mate che e cambie colôr, che e samee saltâ di ca e di là tra lis ramascjis di pôi… ve che o rivi a stimâ la distance: sui dusinte o tresinte metris.
O cîr di lâi daûr. O passi par un troi strent cu la bici e o rivi intune boschete di acaciis e pôi.
E je a pocje distance di me cumò: alte un vincj metris… grande un metri par un metri… o plui? Zale… no, e cambie, ancjemò… rosse, narançon cumò cumò… al è dut un lampâ… mi ven incuintri…
Mi samee di jessi dentri… di…
di Checo Tam


Note di Checo: (ispirade a une conte vere … la venture di viodi une lûs balarine e je capitade a un gno amì cjargnel… ma in tancj lis an viodudis… i fûcs di Sant Elm che a viodevin balinâ i marinârs durant dai burlaçs parsore dai arbui da lis nâfs… i fulmins globulârs… misteri!)

9 coments:

Jaio Furlanâr ha detto...

O crôt che il Bosch e il Brueghel a jerin di sigûr ispirâts dai "indemoniâts" che de medie ete in ca, soredut tal nort de Europe a semenavin le pôre e l'orôr.
Cumó, a si lu sà, chescj indemoniâts a jerin juste mâlats di ergotism ven a stâi intossicâts da un fonc che al lave a finî tal pan a partî dai spis de siale. Il pan dai puars.
Ancje in Friûl il fonc al jere cognossût come il cjarvon dal froment ma a Verzegnis dal 1878 in ca, miedis, politics, scritôrs e gjornaliscj no an inmó pensât che al podeve tratâsi di une intossicazion e no di une isterie demonopatiche coletive.
Di sigûr che cumó, le conte a fasarà mancul pôre:-)

Anonymous ha detto...

Checo nus lasse libars di sielzi il mieç che si presente denant di nô, chel che nus ven incuintri, cusì, ogni un di nô, al po montâ su par suelâ viers il siderio.....almancul cusì mi plâs pensâ che al sedi. Maurizio Di Fant

gelostellato ha detto...

In efiets, come a Verzegnis, fan e intossicazion e jerin une spiegazion...
cumò, mi pâr che par intossicâsi 'nd è une vore di plui di pussibilitâs, ma a mancje la fantasie di viodi aliens origjinâi. a ogni mût, conte simpatiche, e soredut... biel titul! :D

Anonymous ha detto...

Jaio, Gelo, ma la ju vêso viodûts i foncs, par me al ere masse scûr tal slarc de campagne e la lûs mi inceave e alore jo.....cjalant atôr o ai viodût dome lis stelis.... a proposit, ce piçui co sês di ca su! Mandi a dûc di Maurizio

Jaio Furlanâr ha detto...

Maurizio, tu âs reson. O varès vût di fâ come te e tignî conte de conte plui che dal rest.O varès dite alore che il Checo al à un mût di furlanâ che al al é dome só e ch'al fâs plasê di ricjatâ da une conte a chê altre.

Anonymous ha detto...

....Mi somee di jessi dentri.?... O soi dentri...in te une bole . Une lûs dorade mi vuide, i slungji braçs framieç une schirie di gjenis in svol in aiar. Incuintri la umanitât debil , l'om fuart e ben armât, la comprension, l'orgoi, brame di felicitât, lussurie, intemperance ,cruzi tormentôs, lis fuarcis contrariis. Finalmentri la salvece la serenitât , un respîr vitâl al mi fâs resurî..... un côr di
agnui dal paradîs..... une bussade a dut il mont......

o.zete

Anonymous ha detto...

Cui sa ce che al varà veromentri viodût chel gno ex coleghe di lavôr che al à viodût chê bale...Un floc globulâr? Un U.F.O.? Cui sa mai... Lu ringrazi pe ispirazion. Graziis Lino!Naturalmentri io c'ho messo del mio e daspò al è un rimando a chei che a tornin dal Aldilà dopo de esperience di NDE (Near Death Experience)!!! Balis e balotis! Tutta quistione di enordfine!!!

Anonymous ha detto...

Corrige: endorfine (mannaggia alle inversioni!!!) Checo Tam

Anonymous ha detto...

Corrige: un folc globulâr!!!!!!!!!!!!!1

O varès alc di dî

Ti sêstu visât di firmâti? :)