venerdì 21 ottobre 2011

TUI


I canelons sui scjalins, la elare rampighine e la plante di vît merecane a vevin fat di chê scjale un piçul zardin. E in chê maravee, Tui, un vecjo gjat, al passave cuasi dute la zornade, pognet inte ombrene di chei flôrs, des fueis de vît e di chês de plante rampighine che, no dome si intorteave su pal pareman, ma si slungjave fin sù te piergule, là che si imberdeave tai raps di ue.

Jenfri chês plantis, Tui, dispès, tai mês cjalts, al passave il timp cjapant, cu lis sôs grifis, lis puaris lisiertis instupididis dal soreli. A chel vieli felin, aromai stagjonât, cjapâ chês puaris besteutis, i permeteve di podê paragonâsi a chei gjats, che dibot ogni dî, sui cuvierts, a corevin daûr a lis gjatutis in calôr. 

Tui, al jere masse vecjo par lâ sù e jù pes gornis e finî cussì adalt. Vere, i sarès plasût ancje a lui saltuçâ jenfri i cops, cori daûr a une gjatute che e bramave che un di lôr la imbraçàs; invezit, al veve di contentâsi di gloti une lisierte che e durmive suntun scjalin, là che al bateve il soreli.
di Nello Malisano

6 coments:

Anonymous ha detto...

Che atri dî, cuant co si sin finalmentri cjatâts, tu me âs lete in anteprime. Po, no ai durmît pensat al gjat, no voris che metaforichementri il "Tui" tu lu âs metût al nestri puest, o sin stagjonàs ma, sui cops, o sin ancje mo boins di la su, no mo? Maman Maurizio Di Fant

Anonymous ha detto...

Che atri dî, cuant co si sin finalmentri cjatâts, tu me âs lete in anteprime. Po, no ai durmît pensat al gjat, no voris che metaforichementri il "Tui" tu lu âs metût al nestri puest, o sin stagjonàs ma, sui cops, o sin ancje mo boins di la su, no mo? Maman Maurizio Di Fant

Grizabella ha detto...

Li par li o vevi pensât ai canelons di paste, invezit si trate dai gjeranis.
Ben, insome, Tui, ce al varaie, 16 agns? Alore, controlânt su la tabele di rapuart om-gjat o viôt che a saltin fûr 80 agns. Nello e Maurizio se a no veis barât a declarà la etât al Ostîr che al à compilât la liste dai Contecurtârs, par cumò seis ta une etât che se une gjate a us dîs di si a no vi cjape scatûr e sa us dîs di no a no vi cruzie.

nelodifeagne_51 ha detto...

Forsit e a reson Grizabella. Vinci agns jù ai finîts di un pies...... Ma se le guarite lu merte no son cops che mi tegnin.

Jaio Furlanâr ha detto...

Plui a passin i agns e plui si smicje bas:-) Bieline.

Anonimo ha detto...

Va là,Nelo,che se tui al cjatave la passarute juste varess fat come la elare rampighine il intorteament,bondant su la esperiençe da ete e in dismentie dai carnavai.
Cjarine la conte , e puarte tant soreli di istat .
Lusian di Varian

O varès alc di dî

Ti sêstu visât di firmâti? :)