giovedì 29 settembre 2011

La gnove vierzidure de Ostarie

Ben! E je ore...
Vin pene finît di lavâ lis fuarpis... vin taponât i brantiei... e cumò - dopo vê vendemât sedi il blanc, sedi il neri - o vin dome di spietâ pôcs dîs, par podê tirâ il prin vin de gnove stagjon.
Cul mês di Otubar, propit cun lunis, par scomençâ come che si scomence lis dietis e i lavôrs, o tornarin a vierzi Contecurte, la nestre Ostarie dulà che tal puest dal vin e dai ûfs dûrs - aromai lu savês - a si pues cerçâ contis curtis e dut ce che al pues zirâ ator di lôr.
Come che o savês, no sin bogns di tacâ cence rignovisi un pôc, e alore ancje par cheste gnove stagjon che e ven, spietaisi cualchi cambiament, cualchi gnove vît che o vin semenât, par viodi cemût che e ven sù.
Ce che nol cambie al è il spirt, il sintiment che al cjale al furlan e a la narative curte.
Us spietìn lunis, ducj, par viodi ce che al sarà di gnûf e ce che a tignarìn cont dal vieri. 
Intant sparniçait ator che Contecurte e torne a vierzi...
Chei di Contecurte

martedì 6 settembre 2011

Presentazion de Comugne a Buie

Cualchidun dai nestris contecurtârs al sarà impegnât vinars ai 9 di Setembar aes 18 sot sere intal anfiteatri dal parc de biblioteche di Buie par
«LA COMUGNE in reading - Leturis di contis in furlan publicadis inte riviste “La Comugne” e di altris contis mai vignudis fûr»

Jentrade: Pauli Cantarut e Alessandra Kersevan
Autôrs e letôrs: Pauli Cantarut, Gianfranco Pellegrini, Checo Tam, Stiefin Morat, Francesca Gregoricchio
Freestyle: DJ Tubet
Musiche: Vididule Projet