lunedì 4 giugno 2012

Agne Lene e le puestine

Vuê agne Lene a si è jevade cul pît sbaliât, a someave tirâ il mussic e a fevelave dome cui sì e no. Dal pancôr, dal becjâr, al bondì di chês che tornavin de messe e à rispuindût dome cuntune cjalade e si capive subite che no veve voie di cjacarâ. Va ben che a jê las mangja ostias no i son mai ladis jù tant, ma fin cumò ur rispuindeve simpri cun buine voie. Si fermave ancje a fâ une cjacarade par savê se il plevan al veve predicjât alc di bon o alc di stuart o par savê cui che e jere gravide o cui che al jere muart, se al jere il paron o il gjat, l'om o le femine, cui che al jere lât a stâ a Udin o cui che al jere vignût a stâ in paîs e po des sbrindulis e dai mostros di chei paris e di chês maris che diu ju sfulmini che no van a messe che a ogni muart di Pape...
Le puestine cuant che le à viodude da pé de vile le à clamade par dâi le sô pueste ma jê a no si é fermade, i à fat un segn disint alc che a no à capît. Forsit e jere di presse parcè che subite dopo, cuant che le à viodude incrosâ le sô amie Gjildine, no dome a no si son saludadis ma a an slungjât il pas come se a vessin la peste.
Propit lôr dôs che son cognossudis come lis plui grandis amiis dal paîs e che lis comaris a no lis sparagnin mai, nancje tes preieris.
Cuant che invezit i à puartât le pueste in cjase, agne Lene a someave come simpri. Alore i à domandât il parcé di tante presse e di tant malumôr. Ma agne Lene, ae sô domande, mieç scandalizade e mieç ironiche i à rispuindût cuntune altre domande:
-Ma no atu viodût che la Gjildina no mi à nencja det bondì vuê? Ho!
Alore le puestine e à capît. Ma chest a no lu à disarà a nissun. Le bocje da ridi che cumò i faseve agne Lene i bastave e nol coventave fâ ridi dut il paîs disint ce che agne Lene a veve dismenteât vuê prime di lâ fûr.
Ma e à di lâ ancje dae Gjildine. Al sarès biel se ancje jê a i disès:
-Ma no atu viodût che a no mi à nencja det bondì vuê?
Sperin dome che cumò a vedi vût il timp di metisi le dentiêre ancje jê.
di Jaio Furlanâr

6 coments:

Galliano ha detto...

Bundì Jaio,
Puare agne Lene e sarà rivade strache a cjase sô,sperin che no nus passi a cualchidun di nô.

ateliersommarti ha detto...

Oila Galian, compliments a ti pal lavôr di voltadure in furlan e spagnûl. Cuissà ce tant lavôr...

OSCAR B. MONTOYA ha detto...

...Cheste conte e je stade lete tal Cuint Incuintri di "SERADIS DI LETURIS FURLANIS", che si davuelzè te Societât Furlane di Buenos Aires ai 20 di Setembar dal 2012.

ateliersommarti ha detto...

Lu ai dite a agne Lene. Ce contente che jere! Mi à dite di saludâsu ducj:-)

Galliano ha detto...

Jaio,
Nus fâs plasè che agne Lene e sedi contente, saludile... ma saludimi tant ancje ae Gjildine, mancjàs mai che no vebi di ofindisi!!

ateliersommarti ha detto...

Le Gjildine a varès chê di vignî a fâ un zîr sù Contecurte ma e à masse pôre dai argagns di vuê. Daspò cuant chi i ai contât dal spirt furlan qu'al regne achi e à dite che jê a si vergognarès e che a é masse cjargniele:-)

O varès alc di dî

Ti sêstu visât di firmâti? :)