lunedì 17 settembre 2012

Visa pal paradîs




A fuarce di rimeti in cuistion dut, ta chê societât, invezit di lâ miôr a lave simpri piês. Le cualitât de robe comprade no jere plui le stesse. I suiemans no suiavin, i curtìs no taiavin, si cjatave pan fat cule seadure, lat fat cul zes, vin fat cun nuie e nuies fats cun no si sa ce. Il vêr al jere deventât fals, il biel al jere deventât brut, e il biel al è che de mitologjie in ca, lis storiis, lis contis, no vevin plui le stesse fin e a scuegnivin simpri finî mâl. I diretôrs a deventavin bidei e i portinârs a deventavin vescui. Nuie plui matrimonis e par fuarce nuie batisims. I fruts adotâts tai paîs dal tierç mont che prime a lavin a finî dome tes copiis di omosessuâls dal mont moderni no rivavin plui parcé che dut il mont al jere incuinât. In cheste societât rote e corote, disfate e rifate cul passât proibît, i 69 scomençâts tai agns 70 e finîts te omosessualitât sborade te infanzie dai ultins nassûts a jere finide sul fai da te. Par no vê l'aids. Rivâts a chest pont, cemût fâ par lâ in paradîs? Jessi bogns o jessi triscj? Bielzà al circolave le vôs che jessi bon di copâ un arabo al jere pecjât dome se tu jeris convertît al Islam. Altris, forsit masse turbâts par cheste evoluzion a pensavin che masturbâsi e preâ tal stes timp al jere il plui grant at di devozion che podevin fâ. Po biacemai a fasevin di chei mea culpas cul curtìs tal pugn che a murivin inmò prime di vê finît le preiere. Lis preieris no vevin plui il stes valôr, le glesie, come che a veve bielzà fat cu lis indulgjencis a paiament, cumò a proponeve un certificât papâl prime di spedî par racomandade lis preieris tal cîl. Ma rivavino a lâ plui in là che al Vatican? Il signôr che forsit in paradîs a nol viodeve plui rivâ nissun, inte sô grande magnanimitât al veve decidût di vierzi un consolât a Acuilee par vie de sô simpatie discuvierte pe glesie furlane. Ce fâstu? I veve domandât Dante incredul passant li. Alore par no contrariâ masse le sô Comedie prime di dâ il visa pal paradîs i candidâts a vevin di rispuindi aes sôs domandis. Par fortune il prin rivât al jere un vecjo cule barbe plui lungje de sô che di sigûr a nol veve nuie a ce fâ cui vecjos che cumò si rasavin fintremai il cûl par pôre di someâ primitîfs ma par precauzion i domandà: Cui jerial?, Ce vevial fat inte vite? Parcè pensavial che al meretave il paradîs? Il vecjo cjapant il respîr par podê rispuindi i disè che lui al jere un marangon, che al jere un grum cognossût pe sô onestât. Sì, lis lengatis a pretindevin che nol veve savût onorâ le femine ma al veve vût un frut e chest al provave che al veve ancje fat il so dovê coniugâl. Daspò al disè che so fi al jere deventât famôs tal mont intîr, e... Il signôr no lu lassà finî di cjacarà e al braçà il vecjo cu lis lagrimis tai vôi cridant emozionât: Papà! E il vecjo dut maraveât lu sierà in se disint: Pinocchio!

di Jaio Furlanâr

2 coments:

Galliano ha detto...

Brâf Jaio, ironiche e fantastiche, mi a fat pensâ, ma al finâl o ai molade une ridade fin a fâmi saltâ lis lagrimis.

ateliersommarti ha detto...

Salve Galian, mi fâs plasê di viodi che cun internet al é plui facil di fâ ridi cualchidun in Argjentine che a Vile Santine:-)

O varès alc di dî

Ti sêstu visât di firmâti? :)