lunedì 10 maggio 2010

Un dopli insospetabil

Uomo allo specchio - Magritte

Ce investigazion, o mi dîs, ce zornade! Il gorgonzola, par altri, al jere bon, forsit o ai esagjerât come al solit, o zonti jenfri i pinsîrs. O mandi jù une sgnapute e o tachi a involuçâmi tai linçûi, nauseât. Daspò, o rivi a indurmidîmi fadiant il respîr...
«...insome, siôr Marlo, lui a mi domande di cirî un che nol viôt, ma che in ogni câs a si sint di velu simpri tacât, juste?» o torni a ripeti.
«Sì, sì... lu prei, o soi disponibil a paiâ dut ce cal vûl, baste ca lu cjati in cjar e vuès» al zonte passantmi une foto.
Cjalant la imagjine, o alci i voi su la muse di cui che a mi steve fevelant e o resti a bocje spalancade: al è lui, anzi o soi jo, no al è lui ma cu lis mostacjis! No fâs coments. O tiri un cassetut e, tignint in man un penarel neri, i voi dongje riduçânt. Di ca a pôc, o pensi, al cjatarà se stes. Lui al tire in sù lis soreceis, al spaurìs e al tache a berlâ come un mat.
«Ma no, siorut, che a mi lassi fâ, al viodarà cemût che...» Si svincole, al brinche un britulin par taiâ cjartis che al steve sù la scrivanie e a mi ven cuintri batint... Sante Madone! Si disgote pardut, spiluçânt: al è il gno sanc, anzit al è il so e a mi mi ven un inzirli.
A mi dismôf intal mieç di sudôrs di fiere. Vonde! Vuê o taiarai vie dut ce che o ai sot il nâs, o mi dîs lant in bagn. Se mi coventaran o incolarai chei di carnevâl, voltâmi al spieli. Chel altri, intant, platât daûr i siei, mi cjale sghignuçant.
di Frank Spada
Conte n. 127

2 coments:

Jaio ha detto...

Bieline e soredut in rapuart cui toi libris. A chest pont tant par stâ sul stès sogjet e come chi stoi propit a cualchi numar di cjase di Magritte o scuen tirâ fûr le frâs dal umorist avonde surealist belga Raymond Devos che al contave: O jentri in tun bar, o ordeni un mieç litro, o bêf le metât e no mi reste plui nuie:-)

Frank ha detto...

Come dì che fin che il surealism dal nuie no l'ha pas, si cjatarin plui secs ma in bale :-)

Bon Nadal Contecurtars!
Mandi Jaio, mandi Raffaele e Bon 2013 a dute la briade.

O varès alc di dî

Ti sêstu visât di firmâti? :)