sabato 25 maggio 2013

Barachis


Lise e comence a tornâ fûr, denant de barache des pomis di zucar e ue passe.
E poie lis mans suntun zei di ananas candît, taiât a rudielis. E plee la schene, e sgrasaie, lis strecis scjassadis de trimarole.
Lussie, in bande di jê, ancjemò cuntune sgraçade di sbrume di zucar sot il nâs, no rive adore nancje a spostâsi. L’amie si volte viers di jê: un bugnon bocon tant che un miluç i ven sù pal cuel, planc. Pene sot il barbuç, la piel no ten bot e si spache, butant fûr une porcarie gropolose e blanchice, lustre di spudacj. I voi de frute, scocolâts, al somee che a vedin voie di saltâ fûr de muse. L’impast al sbrisse su la piel: une sorte di madracat, ruspi di robe mastiade, si strissine lontan de cjar.




Armide e misure la farine, misturade a polvarine d’arint, la disfe in aghe e lagrimis. E à gratât parfin lis ongulis, che e messede insiemit dal ros dal ûf.
Par sgrifignâ, e pense, al bastarà un piçut.


Sandrine si scrofe jù denant di un marcjadant di massarie.
Lu steve cjalant, tant che al jere daûr a taiâ une latine cuntun curtissat, e un agagn i à sdrumât il stomi.
Pôc dopo, il grum si slontane, lassant une sie di mierde.


Il zucar al è fondamentâl, i àn dite.
Par meti adun il so, i coventin mês: al à cristai come furmiis slusintis, al nas di jerbis che aromai no si cjatin cuasi plui.
Il dolç al tache, e pense, al da indaûr il frut ae panze



Gabriel ‘nd à mangjade mieze: bocon masse lizêrs par roseâ i budiei.
Luca invezit ‘nd à mangjadis dôs e il slambri inte panze al è larc tant che une man.
Desenis di fritulis, mastiadis o cuasi digjeridis, a sdrumin i stomis e vuastin la piel.
A van dutis intune sole direzion, uciei viers la lôr Vierte.


Armide, di daûr la so barache di fritulis, e zonte il lat al impast e e proferìs lis peraulis sintudis intal sium.
Lagrimons di contentece a sgriin une muse strassomeade de matetât.
No ‘nd à mai podûts vê, ma cumò, e spere, i fruts vignaran ducj li di jê.


Conte dal Ostîr - Raffaele Serafini

0 coments:

O varès alc di dî

Ti sêstu visât di firmâti? :)