domenica 26 maggio 2013

La lungje vite di PS1


Toni, in te sô cjamare, al stave zuiant cun malegracie cu la sô Play Station One, cuant che al veve sintût sunâ il telefonin.
Al veve molât la partide e al jere lât a lei il messagjo. "Uè, cjale che mi àn comprât le WII, ven ca a provâle parcè che e je une figade!!! XD".
"Mi fiondi!!!" i veve rispuindût al so amì, corint subite fûr, cjapant sù la biciclete e partint come un missil.
E par cualchi zornade nol jere plui tornât in cjamare sô a zuiâ cu la solite console.

***   ***   ***

«Wow! E je pardabon une figade!» al veve sberlât Toni.
PS1 al veve cuasi petât un salt par aiar cuant che il frutat al jere jentrât in cjamare.
A lu veve viodût lâ viers di lui, si jere sintût cjapâ, distudâ, stacâ la spine, scaraventâ sul tapêt e al veve viodût une altre console che e veve cjapât il so puest, parsore dal mobil.
PS1, pacât e avilît, al veve cjalât Toni che, dut plen di entusiasim, al zuiave cul gnûf zûc.
Viodint trop che il frut al gjoldeve, PS1 al veve capît intun moment che il so nemî al jere tant miôr di lui.
Dopo un pâr di dîs, cussì, PS1 al jere stât butât intun sac neri insieme a altris scovacis di ogni sorte.
Dut spaventât al veve domandât: «Isal cualchidun ca dentri?»
«Ma ce sberlistu?! O soi za une vore macolade, tâs pluitost, e tiriti in bande!» i veve dite une vôs rabiose, che e vignive dal scûr.
«Scusimi, ma… cui sêstu? Parcé sêstu cussì plene di gnervôs?»
«O soi une scusse di miluç e tu tu mi stâs nuiemancul che striçant!»
«Oh, scusimi. Ma… Ma dulà sino?» al veve voie di savê PS1.
Ma nol jere stât il timp par vê une rispueste.
Dut tun colp si veve sintût cjapâ e tirâ, e un ton al veve rimbombât fin dentri dal sac.
Ducj chei sierâts li dentri si jerin metûts a businâ e dopo un moment a vevin sintût il rumôr di un motôr.
«Dulà nus stano puartant?» al veve barbotât PS1.
«Ve chi che tal dîs jo,» al veve spiegât un gjornâl, plen di braùre, «o stin lant intun puest teribil e puçolent, dulà che a butin dut ce che nol covente plui a nissun…»
PS1 al veve tacât a tremâ e al veve domandât: «Ma sêstu sigûr?»
«Sigurissim! O ai let intor di me che li che o stin lant no ti riciclin e nissun ti doprarà mai plui!»
«Ma tu cemût lu sâstu? Ce vulial dî jessi riciclât?»
«Io o sai dut, parcè che o soi fat di cjarte riciclade tantissimis voltis e o ai let une vore di articui e di gnovis».
Un rumôr fuartissim, però, ju veve interots juste ta chel moment, il sac si jere viert e un lamp di lûs ju veve inceâts.
PS1 si jere cjatât ribaltât parsore di une vecje television, gruesse e cul veri crevât. Ator ator di lui a jerin sparniçâts gruns di scovacis. Sacs, butiliis, cartons, videocassetis, batariis, midisinis, gomis, scussis, peçots… insome, al jere di dut!
In chel, cjalant tal mieç da la porcarie, PS1 al veve viodût une robe rusine, rote, sporcje,  che i pareve di cognossi. Al jere un pôc dificil di identificâ, ma al jere cuasi sigûr che al fos Game Boy, il so vecjo amì, che Toni al doprave fin a pôc prin che lui al fos stât comprât e puartât in cjase.
«No stâ proecupâti, intant a ducj a larà a finî cussì, in chê maniere li che tu viodis», e veve dite la television, viodintlu terorizât. PS1 nol rivave adore nancje a vierzi bocje, di tant scaturît che al jere.
«Tâs tu, che tu sâs dome peteçâ e contâ bausiis!» al veve ribatût il gjornâl, che al veve sintût dut, «Invezit, ti podarès capitâ une fortune se tu fossis…»
Ma in chel, une bugade di aiar e veve fat svolâ il gjornâl di chê altre bande de discjarie e cussì PS1 al jere restât su lis spinis, cence podê savê ce che il so amì al veve di dîsi.
La puare console e jere incantesemade, cuissà ce che al à di sucedimi cumò, e veve pensât, ma di li a pôc a rispuindi a la sô domande e jere saltade fûr une ruspe, che e veve tacât a ingrumâ e scliçâ dute la porcarie svicinantsi simpri di plui.
Par fortune, un scovacin che al veve a cûr l'ambient lu veve cjapât sù e lu veve metût intun cjanton.
Ce ben che mi è lade, al veve pensât PS1, ancje se nol saveve ancjemò dulà che lu varessin puartât.
E a chest pensîr, strac muart, si jere indurmidît…

***  ***   ***

Cuant che si jere sveât si veve cjate denant dai voi cuatri o cinc di lôr, in tute di lavôr, cu lis mans plenis di menevîts, martiei, tanais, pinzis, sieis e ogni altri imprest pussibil imagjinabil.
Intun baticee, PS1 al jere stât smontât e al jere… muart!

***  ***  ***

PS1 nol esisteve plui, ma… ce al jerial sucedût? Cemût mai lu vevino cjapât e fat a tocs, sparniçant ducj i siei components ator par dut, in casselis e casselutis?
Jerial muart pardabon?
No!
PS1 non esist plui, e je vere, ma nol è muart…
La sô plastiche e je deventade la mascare di un subacui e e cjale lis maraveis dal mâr, di Triest fin a Lignan.
L'alumini al è stât fondût e trasformât in tal telâr di une biciclete e cumò al va a torzeon par dute la plane dal Friûl.
La gome e je deventade la suele di un scarpon e e va indenant a cjaminâ pai sintîrs e viodi la bielece des monts furlanis.
E a la fin, al è sucedût adiriture che i fii di ram a vignedin doprâts come un circuit di une modernissime… WII!

Scuele Medie di Faedis 
Classe 1^ A - Classe 1^ B

0 coments:

O varès alc di dî

Ti sêstu visât di firmâti? :)