domenica 26 maggio 2013

Toni e la WII

A pene che WII e TV si jerin cognossûts a jerin deventâts amions.
«Sêstu chel dal scafâl numar disevot?» i veve domandât TV, dute emozionade.
«Sì, o soi jo! Al jere di un biel pôc che ti cjalavi, tal negozi…» al veve rispuindût chel altri.
«Mi plasin une vore lis tôs lusutis, ma soredut il to colôr, come l'arc di Sant Marc, cussì diferent dal neri o dal blanc di dutis chês altris console!»
«Ancje a mi mi plasin lis tôs imagjinis, cussì veris, parcè che mi somee di cjalâ fûr dal barcon».
«Sint ca… ise vere che nô o sin i plui biei e gnûfs di dute la cjamare?» i cisicave dut un dret TV.
«Ma sigûr che o sin i miôr! Pense, o podaressin dominâ la cjamare e sotometi ducj i zugatui».
«Cemût podino fâ?» al veve domandât TV.
«Fasìn cussì: tu tu mostris la reclam dai miei acessoris, cussì al va a finîle che Toni, ingolosît, sa ju fâs comprâ ducj!»
«Ah, va ben… O pues fâlu, ma… a ce ti coventino?»
«Lasse fâ a mi… tu viodarâs che cussì Toni al zuiarà cun nô dut al dì».
Tal zîr di pôc, la cjamare e jere stade sfodrade di garbatui par WII e il fantacin al passave ducj i dîs a rimbambîsi cun lôr.
Cun di plui WII e TV a vevin difondût une infinitât di ondis eletromagnetichis. 
Ma intant che chei doi a levin indenant cul lôr plan, intun cjanton de cjamare, PC e i-Phone, gjelôs e rabiâts, si jerin metûts dacuardi e a fuarce di Internet e messagjos a vevin tacât a produzi ancjemò plui ondis.
E jere saltade fûr une vuere, cidine ma violente.
Di fat, WII e TV, par nuie procupâts, grazie ai acessoris, al reclam e ai gnûfs zûcs, a vevin rispuindût cul dopli dal incuinament eletromagnetic.
A levin indevant cussì za di un biel pôc, ma intant, dismenteâts suntune scansie, un libri cun lis pagjinis blancjis, une pene cuasi gnove e un peluche cul pêl fruiât a vevin tacât a cisicâsi…

***  ***  ***

Toni, la dì dopo, nancje gjavade la gjachete, al veve tacât WII par finî il livel plui impestât di Super Mario Bros, dulà che al veve di copâ une capasse zigante. Propit in tal moment che al stave par maçâ il mostri, il monitor si jere distudât, deventant dut neri.
Toni, disperât, al veve tacât a di sù di dut e a cjalâsi ator, par cap ce che al jere che nol funzionave.
Parsore de spine de curint al veve viodût un libri, colât sigûr di une scansie, che però e steve une vore lontan.
Ma cemût al varaial fat a rivâ fin ca al veve pensât Toni, e cjalant la librerie al veve viodût un peluche che nol varès di jessi stât in ta chel puest e che al someave lu stes cjalant. Incuriosît, al veve cjapât sù il librie al veve comencât a voltà lis pagjinis: dentri e jere scrite une storie…
Ma viôt ce robis! Ma lis pagjinis di chest libri no jerino blancjis? Al veve pensât come prime robe.
Maraveât, il frut al jere corût subit cui voi a cirî la prime rie.

UN FANTAT CHE SI CLAMAVE TONI…

Strani, il protagonist  al à il gno non.

…UNE BIELE Dì AL COMPRE UNE WII…

Viôt ca, propite come me! Ancje jo o ai comprât di pôc la WII!

…LA CONSOLE E JERE DI ULTIME GJENERAZION: IL MODEL "GOLDEN RAINBOW"…

Oh, incredibil! Compagne identiche da la mê!

…PÔC TIMP DOPO E JERE RIVADE UNE TELEVISION IN 3D,
CUL MONITOR FIN COME UN SFUEI DI CJARTE…

E vonde! Ma parcé isal dut cussì compagn di ce che o ai fat jo!?

…CHESCJ DOI GARBATUI A JERIN UNE VORE,
MA UNE VORE PERICOLÔS E TRISCJ…

Ma nooo! I miei a son brâfs e bogns parcè che mi fasin zuiâ dut al dì!
Toni, però, al veve continuât a lei e al veve scuvierzût che WII e TV, dentri da la storie, si jerin metûts dacuardi par dominâ la cjamare a fuarce di ondis eletromagnetichis.
Toni al jere restât splaçât dal savê che ducj i imprescj eletronics a produsevin incuinament invisibil. A chel pont, come un sfolmenât, al veve comencât a voltâ lis pagjinis par rivâ adore a la fin da la storie.
Lis ultimis riis lu vevin sconvolzût!
Toni al veve tacât daurman la curint, però, la prime robe che al veve fat no jere chê di lâ indevant cu la partide, ma e jere stade chê di lâ a distudâ la WII, la television, l'ordenadôr e l'i-Phone.
Procupât ma volenterôs, al veve cjapât i libris di scuole e al veve començât a studiâ come un mat.
In bande di lui, intant, sul libri misteriôs, spalancât li da la ultime rie, al jere scrit:

…E PAR COLPE DI DUT CHEL TIMP PIERDÛT A ZUIÂ,
TONI AL JERE STÂT BOÇÂT.

Scuele Medie di Faedis
Classis 1^ A - 1^ B

0 coments:

O varès alc di dî

Ti sêstu visât di firmâti? :)