martedì 4 giugno 2013

Cemût si zuial?

Bufulis di savon
Zûc che al maraveave ducj i fruts - e no dome chei - lis bufulis di savon a si fasevin, par solit, in Istât. Chest parcè che l'ingredient de recipe che plui al coventave a nol jere la aghe cul savon, ma pluitost lis canucjis. Lis si tirave fûr dai fros dal forment o de siale. 
Par zuiâ si cjape sù un fros e si lu taie come se al fos un piçul soreli, podopo lu si met dentri de aghe, dulà che si à disfat cualchi sclise di savon, di chel par lavâ i linçui. Soflant di che altre bande dal fros si fâs svolâ i "gofs" o "bufulis" di savon.

Carburo
A zuiâ a carburo, par solit, a jerin i mascjos, jessin che al jere un zûc improibît e une vore pericolôs.
Il zûc, fat dongje de aghe e lontan dai grancj, si faseve cuntune piçule buse par tiere, dulà che si meteve dentri il carburo (di calcio) e parsore un tichinin di aghe (o une biele spudade, par i plui braurôs). Podopo si cuvierzeve dut cuntun bussulot cence tapon, robât in cusine (di conserve o di fasui) dulà che si veve fat un busut di une bande. Doprant un dêt si taponave il bûs e si  spietave la reazion chimiche dal carburo, che misturât cu la aghe, al produzeve gâs.
In ultin si gjavave il dêt e si meteve dongje un fuminant, par impiâ il gâs. Il bot che al vignive fûr - scaraventant par aiar il bussulot - al faseve plui di cualchi volte mâl a cualchidun, ma chest, al jere sedi un zûc, che un prove di coraç.

Bandiere o Robe façolet
A si zuie a robâsi il fazolet cuant che si je in tancj. Si fasin dôs scuadris, dividint i fruts in doi e si metis une scuadere di front di chê altre, suntune rie tirade par tiere, cuntun zes o cuntun bachet tal savalon. 
A ogni zuiadôr si dâi un numar, par jessi clamât.
Cui che al fâs il puarte bandiere (façolet) si met tal mieç des dôs scuadris e al clame un numar, di maniere che i doi cun chel numar a corin a cirî di cjapâ la bandiere prime dal aversari. Dopo vêle cjapade a àn di tornâ indûr cence fâsi tocjâ di chel altri e a son salfs dome dopo vê passade la rie. Al vinç cui che al cjape plui voltis il façolet.

0 coments:

O varès alc di dî

Ti sêstu visât di firmâti? :)