venerdì 14 giugno 2013

Metamorfosi

Salvadôr, come tancj soi paisans, al fo emigrant. Lis mancjancis e lis esigjencis no sodisfatis lu oblearin a cirî lavôr tal forest. Si sintì simpri un lavoradôr stagjonâl e nol fasè mai nît, no je stade nissune frutate di chês regjons buine di fâi pierdi il so stât di singul. Di sigûr tal so cjâf al veve il desideri di formâ famee tal so paîs. Cuant che al tornà in forme definitive al jere bielzà un om madûr e lu cjapà di sorprese al riviodi Rose, une vicine di cjase, che le cognosseve di une vite.
Ancje jê tai soi alts e bas de vite no jere rivade a formâsi une famee proprie, tra l’altri, par dedicâsi a vuardeâ i siei paris e fradis, che le mantignirin ocupade dulinvie i miei agns de sô vite come femine.
Rose si cjatave sole: i anzians gjenitôrs a jerin muarts, i fradis si sposarin e a partirin. E transitave chê etât indulà che se la cjalade e je positive, ancjemò al è pussibil gjoldi lis pomis ufiertis dal morâr de esistence.
Cussì al fo che Salvadôr e Rose, che lui le clamave “la mê cristiane”, a meterin adun: solitudin e ricuarts, sperant di compagnâsi fintremai che la vite ur varès permetût. No àn vût fîs propris; ma a tirarin su un nevôt come che lu fos. Il piçul al rispuindè ben ai sintiments dai siei barbis e paris adotîfs.
E cussì a subentravin lis stagjons: Vierte, Istât, Autun e Invier... come tratis di un viaç temporâl che si ripeteve di simpri, dulinvie la gnot dai timps
L’Invier al jere une vorone lunc e frêt. A vivevin te vecje cjasone de famee, di rustichis pieris e grandis stanziis, tes gruessis e vecjis parets, no mancjavin lis sclapaduris e lis creturis, che a lassavin passâ aiars di peteçs cisicâts. Ma a savevin che cun pazience, dutis chês nêfs, ploiis fumatis, a saressin sparidis, lassant il puest a flevars zermuei aviertans, che pôc a pôc a levin cjapânt il lôr spazi. Lis zornadis si slungjavin e si inclipivin, scomençant a vierzisi piçulis e inibidis flôrs. Si veve di meti mans e semencis stimolânt la frede e dure tiere e po dopo racuei, rivât il so timp.
I mês d’Istât a sclopavin cjalts e pesants, cun burascjadis di rais, tons e saetis, al ploveve dispès e a selis, chest al puartave un respîr, une tregue ae canicolâr atmosfere. Lant indevant la stagjon a scomençavin lis dolcis seradis cjareçadis da un aiarin di mont.


E partint di lì e scomençave une des plui bielis stagjons, l’Autun, epoche di racuei e di vendemis, cun zornadis claris e netis, cun gnots salacor alc fredulinis, come volint svicinâsi in cercje dal Invier.
E dutun, chest mulignel di stagjons, di dîs e di gnots, di mês e di agns, di clârs e di scûrs, il timp e la vite a levin passant: Rose, Salvadôr, la cjase e dut chel che le circondave a levin pierdint la proprie individualitât confondint i contors e sfumânt i ôrs, lis personis e i ogjets si amalgamavin intune sole e uniche entitât..., za no si cognosseve il blanc dal neri... dut e ducj a vevin la stesse filusumie.
Come se la patine dal timp, al cuvierziju, ju fos trasformant intune vecje fotografie colôr sepe...
di Galliano di Buenos Aires

1 coments:

Anonimo ha detto...

Biele Galiano: sol un cal passe parsore di chiscju events al po capi e ( gioldi lis pomis dal morar de esistence) come ca tu disis tu,cuant l atom lis madresse.

Luciano

O varès alc di dî

Ti sêstu visât di firmâti? :)