martedì 2 luglio 2013

Cemût si zuial?

Cjadene
Par zuiâ a "cjadene" plui si è, e miôr al è. 
Si à di cjapâsi par man e fâ une cjadene. Il plui fuart, par solit, al fâs il "cjâf" de cjadene e al cor di ca e di lâ, cambiant direzion di bot, puartantsi daûr ducj chei altris. 
Par vie de fuarce centrifughe, il lâ a zigozago de cjadene al oblee a restâ daûr cuntune vore di fature e snait. Il dut, a le fin, al va a finîle a marculis e ridadis!


Claputs
Lu vin clamât "claputs", ma podevin doprâ ancje altris robis, come nolis, fasui, picjis...
Par zuiâ si à di jessi in doi o plui di doi. Il zûc al è di abilitât e man ferme. Bisugne tirâ par aiar il claput e "componi" difenrentis figuris: cjapâlu cul ledrôs de man, dopo cu la palme, e cussì indevant, cun variants che a cambin di paîs in paîs. Cuant che il claput al cole par tiere, il zûc al passe a un altri zuiadôr.
Rimpinâsi
Rimpinâsi sul morâi, plui che un zûc, al è une dibisugne di frut, par che si sa, che a sedin cjargnesis, miliçs, pierçui, brugnui o cualsisei altre pome, cui che al sa rimpinâsi al à simpri la panze plene.
Cun di plui, al è ancje une prove di abilitât, di coordinazion e di coraç, perché bisugne vê fuarce e no vê pôre di colâ (tant al è vêr che al è plui un zuiâ di fruts, plui che di frutis).
Si impare, ancje, cuai che a son i arbui cu lis ramascjis tenaris, come il figâr, che al è une vore plui pericolôs di un cjargnesâr o di un rôl, pluitost che di un peç, che al puarte il non cun sè.
E ae fin, no si pues dismenteâsi la dibisugne, aromai dismenteade, di fâ sù un cjase sui morâi, magari cun cualchi ramascje mal bastide, che a puedi però deventâ un cjastiel, o un fuartece di dulâ che si cjale il mont di adalt, doprant la fantasie.

0 coments:

O varès alc di dî

Ti sêstu visât di firmâti? :)