mercoledì 2 ottobre 2013

Ingeborg

Surrealist angel (S. Dalì, 1969)

La tô cjar e je frescje, blancje come la Lune, la tô piel invuainade di corean. I toi cjavei a son dal colôr dal forment madûr e dal forment a àn l’odôr.
Ti plasin i lûcs bandonâts. Al è propit intun di chei lûcs che ti incontrai la prime volte, ta chel lontan autun.
I miei ricuarts a son une vore pôc clârs. Mi visi di une cjase di piere tant antighe.
La tô cjar e je frescje, blancje come la Lune, la tô piel invuainade di corean.
Jo ti cjalavi ma tu no tu ti sês mai visade de mê presince.
Ma jeristu pardabon cussì fisiche? Jeristu reâl?
Mi soi insumiât di te. Dulà jerino?
Intun puest sot tiere dulà che si davuelzeve un strani rituâl. O jerin sot tiere e di fûr al ploveve. Tu sês vignude jù di une scjale, tu mi âs cjalât e riduçât…
Prime no tu mi calcolavis trop ma dopo o vin tacât a stâ insiemi.
Tu jeris simpri dongje di me. Tu mi consolavis... tu mi fevelavis. Tu, une sorte di agnul. Tu mi cognossevis ben. Ma jerino dome dai insiums?
No rivi a meti in ordin lis mês ideis. Di ce sostance sêstu fate? Sêstu umane? No lu zurarès. La perfezion no je di cjase ta chest mont. Ma i agnui esistino pardabon? Ce tantis domandis cence nissune rispueste!

La gnot e jere finide. O sintivi une vôs… une presince…
Tu jeris rivade a meti in moto alc dentri di me. Ma… no tu jeris real! Cuant che o ai sintût la tô vôs mi soi dismot. Un rai di lûs al à traviersât la mê stanzie. La ridade soradine dal dì mi à visât che tu ti jeris sfantade! Sfantade… e jo mi jeri sveât malât di desideri!
O podarès cirîti tes stradis, ma no ti cjatarès mai parcè che tu no tu sês vere…
No tu sês altri che une proiezion di me, o Ingeborg!
di Checo Tam

3 coments:

Anonimo ha detto...

A je la gracie, la femine, la tenerece che ducj a cirin, Checo. Al è il pensîr, la illusioni ca us ten vîfs. Cirinle, come ca cirin chel doman cal è la nestre speranze.
E brâv Checo

Anonimo ha detto...

L'anonimo si firme: Nelodifeagne

Anonimo ha detto...

Al è di un pieç che lu autôr nol fâs dai insiums cussì...

O varès alc di dî

Ti sêstu visât di firmâti? :)