lunedì 4 novembre 2013

Ducj a scartossâ

Chei nûi che la buse di San Vît di un piès no finive di butâ sù, i compits che lis mestris di lunc nus lassavin par cjase, a vevin glotût i ricuarts biei de Istât e di chês zornadis passadis te vigne inte ultime vendemade.
Nadâl cu lis sôs fiestis al jere ancjemò lontan e lis zornadis grisis cui prins frêts a lassavin te int dai borcs a dal paîs dome lancûr. E cussì si spietavin lis seradis indulà, ducj insiemi tal salon di mê none, si cjatavin a scartossâ la blave a lunc ingrumade.
Cusins, barbis, gnagnis, amîs, coparis, comaris, panolis, zeis e soredut preieris di rosari a jemplavin di vere ligrie chei moments di fieste e di lavôr.
Ma le vere gjonde par nô canais a jerin i dispiets che, tra une panole e chê altre, grancj e piçui a fasevin ai plui çus.
Une sere, cun gnagne Mafalde e miei cusins, e jere vignude a scartossâ ancje la Pice, une femine che i vevin dât chel sorenon parcè che e jere lade a marît te famee dai Pics. A pene a viodile cun che pipe in te bocje, simpri studade al jere dut program. Tabac, puarete, no ‘nd veve e te sachetis dal grumâl no veve nancje un carantan. Ma ilstès la tignive ta bocje, no sai se par supâle o par comovi cualchi om sperant che je cjamas.
E vele là seriose, drete come un spali in te sachete, simpri pronte a mostrâ chei voi piçui e furbos che se ancje taponâts di vecjis grispis savevin ridi cuant chel mataran di gno pari i diseve: “Pice dami la pipe che te cjarii”.
Cussì come al veve fat in chê sere, dome che sot il tabac tal cûl dal cai, al veve scuindût vot o dîs cjâfs di fulminant. 
Podês crodi la contentece di chê femine che e tirave in chê cane come se no pipas di une ete cuant che il fum finalmentri i jesseve da bocje e dal nâs. Pecjât che tal moment che il gust di chê pipade i veve fat tocjâ il cîl, dal bûs de pipe... patatum, patatom, cun faliscjis che a sclopetavin di ca e di là. Al pareve fos tornade la vuere o che une saete e fos colade tes panolis.
Dute la clape de scartossade par chei fûcs artificiâi che a sclopetavin ator ator e jere finide dute tra ridadis di gust e intun batimans.
“Boe di Cain*, tu sês simpri tu… jerin stadis lis unichis peraulis che e veve rivât a dî tra un sangloç e une ridade chê puare femine, cussì spauride che no saveve se ridi o vaî, ma di stes convinte che Bepi, la pipe, di gnûf, je varès jemplade.
di Nello Malisano
 
*non dal cjasât de famee di Bepi

6 coments:

Anonimo ha detto...

Biele, la floridure dai particolars a é gustose, e dopo chei di une certe ete iu ripuarte là su chel grum di panoles.bielone.

Anonimo ha detto...

Luciano tu sês masse bon..Tornin ancje no su chel grum di panolis, magari cunt'une fantate che a voie di vignî tal scûr a svuedâ il zei.
Nelodifeagne

Anonimo ha detto...

Biele biele!
I particolars son preciosetât che mi transpuartin in tai film di Olmi e di altris, o di libris.

Graciis!

Anonimo ha detto...

Biele e vonde! Mi viôt frut tal miez del sclofes, e le vôs di Arduino che berle: Nets i pîs! Tocjave a noâtris partalis vie!
Un salût afetuôs Maurizio Di Fant San Denêl

Anonimo ha detto...

Graçis Nelo par vemi cuinçat in ben la conte, intal legjle o ai sintud chel saor di une volte, indula che lis friçis di argjel cisavin sul lidric inta viere terine di cret cul smalt screpolat.

Lusian di varian.

Anonimo ha detto...

Graciis Lusian di Varian par l'onôr che tu mi as fat cul to coment. O soi content di veti fat rivivi biei ricuarts. Continue a comentâ dutis lis contis. Ripet dutis lis contis e no tal dîs dome a ti, ma a ducj chei che e lein lis contis. E po, tu sês brâf e gustôs, tu scrivis ben. E gracie ancje a Maurissio che non mancje mai di vantâmi cu lis sôs riflessions
Mandi a ducj e gracie.
Nelodifeagne

O varès alc di dî

Ti sêstu visât di firmâti? :)