lunedì 18 novembre 2013

L'orloi di gno nono Cico - Ardît in vuere


La storie dal orloi di gno nono ae cuvierte di un ciert valôr, che lui nol disdegnave di fâ presint a nô fruts sot il morâr, tal curtîl in Istât o te stale a fâ file tes lungjis gnots di Unvier.
Dilunc la vuere dal cuindis, un dì, il sorestant al comant al dà ordin di saltâ fûr de trincee e frontâ il nemì a baionete: i nestris a àn la piês e tal tornâ indaûr tancj a restin ferîts a mieze strade, cence contâ chei muarts.
Il nono, tornât a cjapâ la sô posizion in trincee, al viôt che in bande di lui nol è plui Formentini, il so amì di buine famee che i passave simpri il veri de sgnape. Al cuche jenfri lis dôs trinceis e tal mieç di chê masanade lu viôt par tiere, cul braç alçât che al clame jutori. Podês dome crodi gno nono, segnât di chê viste, dongje la pôre di pierdi il veri dê sgnape. Cence pensâ parsore al salte fûr da buse come il jeur, al cjape Formentin e lu strissine in trincee.
Sclops e mitraieis a fasevin un pestefruç ma, merit il santut de Madone des Graciis che al veve intor, il plomp al è lât dut sù pai stecs. Al ven dongje il cjapitani sorestant e al tache a dî di dut, ma gno nono, cu la calme che lu à simpri compagnât al dîs: “Siôr cjapitani sa no jeri jo, cui salvavie il veri da sgnape?!”.
Finide la vuere, Formentin da Toscane al ven in Friûl di pueste par cjatâlu e, dopo trê dîs di cjoche tes cinc ostariis dal paisut i regale un orloi: casse d’aur, cjadene d’aur, cu lis oris ae romane, speris grandis, che si podeve viodilis ancje cu la cjoche intor, e su la gjestre dal cuadri un cerclut cun ator ator i minûts e une sperute che e zirave su di lôr.
Podês dome crodi la contentece di gno nono: e rivave disore i nûi. Formentin, dopo vêi insegnât a lei la ore, al torne inte sô Toscane.
Il nono si consee cu la none cemût plaçâ chest orloi, a tignîlu ta sachete al sarès stât straçât , “No lu viodin!”, se no che al decît di puartâlu in tal sachetetin dal gjilè, cu la cjadene in biele mostre che si pee a çampe e la gjachete disbotonade… Ma gjachete e gjilè no son, cussì la none e recupere chê pocje di piece restade da manteline militâr, sbusade e tarmade, tirant fûr un gjilè cu la sachete no trop grande, in mût che si podi viodilu. Di chê altre bande une asule par fermâ la cjadene tal so traviersament.
Istât o Unvier, gno nono, al jere simpri cul gjilè, par tignì l’orloi sot soreli. E ta chei agns i Unviers a fasevin il lôr lavôr, come che diu ur comandave, ancje trente sot zero, e gno nono cence gjachete, ma duri no si cedi, no par nie al veve fat vuere tal bataion dai ardîts!
Formentin i veve insegnât a lei le ore riferintsi a chê che à di vignî, cussì invezit di undis e un cuart, al diseve dodis mancul trê cuarts. Al diseve che al jere un auguri a vivi il timp di dopo garantînlu in chel di cumò: une cjosse filosofâl al pari de tace mieze plene o mieze vueide.
Ma la cuistion si faseve complicade, tant che la int dal borc e domandave in continuazion la ore a Cico, ancje parcè il muini si smenteave di tirâ sù i claps di cuintripês che a devin fuarce al orloi de tor, fasint pierdi la spere e il batût sul timp. Cussì Cico dentri e fûr, dentri e fûr chê civole, dant oris ae int ancje a suste scjamâde e orloi fer, fintremai che al à capît di dâle come une volte: “Ce ore ise Cico?” e lui: “Ae ore di molzi”, “Ae ore di cene”, “Ae ore di lâ a durmî”, e vie indenant.
Cussì Cico, al veve podût parâsi dai mancul trente grâts dal Unvier, metintsi la gjachete di seconde man disore idal gjilè percè che Formentin i mandave ogni tant dongje altri vestiari, no smenteant il veri da sgnape.
Ancje il muini al veve capît la impuartance da ore, tirant sù plui di spes su la tor i claps che a davin fuarce al orloi, di mût che la int e podès capî in chês speris, o pôc o trop, de zornade dentri il timp indulà che a jerin.
E la civole di Cico, pensionade in vetrine a fâ biele mostre di sè a ricuart di une vite salvade.
Vuê chê vetrine ae chi cun me, cun dentri l’orloi dal nono ,e cuant che lu cjali, mi ven di ridi, ma une lagrime mi spie che o soi daûr a vaî.
di Luciano Marinig
Scrit il 04_11_2013 a ricuart
di ducj chei che a no son plui tornâts

                 

5 coments:

Anonimo ha detto...

E cumò che al à imparât a fracâ i dêts su la tastiere cui lu ferme? Sacrament, ven fûr la animi e l'estri dal scritôr, filosof Lucian: jere ore.
Brâf ancje se no ai capît se al è plui dongje misdì ae undis e trê cuats o a misdì mancul un cuart.
Nelodi feagne

Anonimo ha detto...

Graçis Nelo:
Gno nono diseve simpri, se lis speris coressin contrari mai plui tant ben.
Luciano.

Galliano ha detto...

Luciano, Mi à plasût unevore la storie dal Nono Cico. Ognidun dai paragrafs de conte a mostrin i moments vivûts, trasmetiint al letôr dai lamps di vite.
Salûts di Galliano de lontane Buenos Aires.

Anonimo ha detto...

Une vore biele!

Anonimo ha detto...

Bravo Luciano.
Tu sês bulo e di coce fine.
Ten dûr e va indenant cussi.
Mandi
Pauli Jacuss

O varès alc di dî

Ti sêstu visât di firmâti? :)