mercoledì 4 dicembre 2013

La eroine

 
I viôt mê mari che si jeve sù une palpiere. E plante une ongule in bande, jenfri la code e il cjalâmi, e sburte. Il voli al salte fûr come une bale di zuiâ. Lu cjape in man e mi rît, lu met in bocje. 
E mastie pacjant tant che un frutin.
Gno pari no, lui nol rît. La lame si môf su e jù sul stomi, i sbrisse, vie vie che il sanc al sporcje il mani dal curtis. Vierte la panze come une puarte, lu viôt ficja dentri une man, i budiei a fumin di cjalt, su la palme, intant che mai pare denant dai voi, come un regâl preseât.
E tu, femine, tu che tu sês il dopo e il doman, tu mi parturisis in braç un pipin di veri e lamiere. Al spache dut. Al vai come un demoni di catram. 
Par fortune jê e rive, mi jude, mi jemple di cjâf a pîts.
Jê cu la mascare di scûr, jê cu la manteline di cinise, jê cu la ridade che e sdrume ogni mê pôre. Par un moment no soi plui ca, ne là, ne inniò. No soi plui là dentri, vîf, ta chê machine di muarts.
Il bonstâ mi gjave la gusele.
di Raffaele Serafini

3 coments:

Anonimo ha detto...

No soi un espêrt di siums e tant mancul cognos i misteris che vivin dentri di no. Capis dome che la mari reste simpri la mari, lo stess il pari ancje se plui dûr.
Nelodifeagne

gelo stellato ha detto...

graciis, no je una conte facile, ma e je saltade fûr cussì, pensant a un che si buti intal tunne de eroine par rimuars, che po, di tancj incidents di machine, aromai, nol è un câs cussì râr :(

Galliano ha detto...

O scugnii leile variis voltis par capîle, cence dubis no je la mê leture favoride, o pues dome capî il maçalizi che e provoche il consum di ciertis sostancis.

Mandi, Galliano

O varès alc di dî

Ti sêstu visât di firmâti? :)