martedì 18 febbraio 2014

Il libri

Lis nestris stradis a si incrosin scuasit cincuante agns indaûr.
Ven a cognossi Lussian a Milan; lui al studiie Radiotecniche e jo, che o soi un an plui indenant, o studii Television.
Po o si pierdìn di viste par une cuindisine di agns e o tornìn a cjatâsi in ocasion di un cors di inzornament sui televisôrs, a Udin. O vin in comun dôs robis, il lavôr, ducj dôi tecnics, e la passion pa la Radio; o sin Radioamadôrs. Ogni tant o rivìn a colegâsi par radio, ma ni vore di râr, par vie che jo o fâs colegaments internazionâi e lui no. Un an indaûr lu coleghi par radio, e po mi ven gole di lâ a cjatâlu, a Varian. Lussian, che al è in pension di un pieç e che di cualchi àn al è di bessôl, al vîf pai nevôts e pa la sô grande passion, la Radio. Al passe i soò timp tal so busigatul, plen di radios, di imprescj e di trabacui di ogni gjenar, in compagnie dal so cjan di cjace, compagn di tantis venturis, vecjo, malcuinçât, e ch’al va pai ultins. Lussian al à une vore gust di viodimi e intant che al met sù la moche sul spolert, si tabaie di chest e di chel. Cjalant ator, mi cole il voli su di une scansie plene di libris. O cjapi in man un grues libri blu; Corso di Radiotecnica volume 1, dal 1962. Lu sfuei un pôc e o viôt che al è propit ben fat. “E il secont volum?” i fâs. Mi inacuarç masse tart di vê tocjât un boton delicât. Al tire jù un mocul di fâ trimâ i trâfs dal sufit. Un di chei mocui che ti vegnin fûr dal cûr, come cuant che tu ti pestis un dêt cul martiel, plantant un claut. E mi conte la storie di chel libri che al mancje.
Lussian al cognosseve un maressial de aviazion che al veve passion pes radios. Chest maressial, che al finive ni vore adore di lavorâ e nol jere mai sudât, al lave dispès a tignîlu in tedie, cuant che al veve ancjemò in pîts la ativitât. Lussian, bon di cûr, lu supuartave, cence vê il coraç di fâlu cori.
Poben, une dì il maressial i domande d’imprestâi il secont volum dal Cors di Radiotecniche e Lussian, che lu ten di cont come un dêt madûr, i al da malvulintîr, cun mîl racomandazions, e “Che e no stei a tignîlu masse a lunc”.

Al passe cualchi mês cence che il maressial si fâsi viodi. Lussian sul imprin no i fâs tant câs, che al veve fat cussì altris voltis, ma passât cualchi altri mês al tache a preocupâsi. Pal so libri, mighe par altri. Une dì al va a cirilu tal so paîs e al cjate la femine, che in pocjis peraulis i strope la bocje. “Il maressial a le muart mês indaûr e dute la sô robe je stade butade vie.” e fâs jê. “E i libris?” Lussian la viôt brute. “Al masar, le lât dut al masar” e cun chel a lu paie. A Lussian i ven su la fote e la varès scjafoiade, ma i tocje tornâ a cjase cu lis mans scjassant, porconant par dentri. La robe no i va jù e e continue a tormentâlu par un biel pieç. Il maressial al è ancjemò ca si zire ta la tombe, pes maledizions che Lussian i mande.
Al ven a savêlu dut il paîs, di chel libri pierdût.
Cumò son passats vincj agns e Lussian al è rassegnât. Podês dome crodi cetant che mi displâs di vê mot che puce. Mi ven voie di fâ alc par lui, ma nol e facil.
A cjase, o provi a cirî su Ebay, ma al è scuasit impussibil cjatâ un libri di cincuante agns indaûr, soredut un libri cussì specialistic; nol è mighe I Promessi Sposi.
Al passe un po di timp e aromai i bandoni lis ricercjis, chel libri no si cjate in nissun puest.
Une sere o fâs ancjemò un tentatîf e i torni a viodi ancje su ebay-annunci, li che a son i privâts che e vendin la ratatuie e dut ce che a àn di plui. O fâs un salt su la cjadree, un de basse furlane al à pene metût in vendite une tasse di libris tecnics e tal mieç al è ancje “Corso di Radiotecnica volume 2”. No stoi plui te piel e i mandi subit une mail, cul titul just e il non dal editôr, par vê conferme che al sedi propit come chel che o stavi cirint. “Forsit i contenti Lussian, che al torni a vê l'opare complete” o pensi jo. La rispueste e je chê juste, ma al salte fûr subit un berdei; il venditôr al vûl vendi la tasse di libris dute insiemi e al vûl une cierte cifre, ma a mi mi covente dome chel libri, chei altris no mi interessin. I fâs une buine ufierte, sôl par chel, sperant che i vadi ben. Lu sint par telefon e lui, rugnant un pôc, al acete, ancje parcè che al veve bielzà metût plui voltis in vendite chei libris, cence mai rivâ a tirà fûr un franc di lôr. Chest al jere l'ultin tentatîf che al faseve, e po ju varès butâts te discjarie. Si metìn dacuardi par cjatâsi. Tant ben che al lavore a Udin, ta l'Enel di Vie Uccellis. In tal lunis, si cjatìn fûr dal sô ufici e fasìn l'afâr. Il libri al è chel just, come che o cirivi jo. Par curiositât i domandi come che al à vût chei libris e lui mi conte ca ju à vûs di un vecjo radiotecnic che al è muart di un piès, che a sô volte ju veve vûs di un altri radiotecnic, plui vecjo di lui, muart ancjemò prime. Lu saludi e content come 'ne Pasche i torni a cjase. Pe strade mi ven un pinsîr; i cjati curiôs che al sedi saltât fûr sôl il secont volum di che opare, parvie che di solit a van in cubie. “Il prin al sarà lât pierdût” pensi jo. Rivât a cjase i provi a sfueâlu, cussì par curiositât. Vierte la cuviertine, in alt de prime pagjine e scrit a lapis, o lei "Luciano Marinig”; se no mi ven un colp mi mancje pôc.
Al è il so libri, che cuissà cetantis mans che al à passât e cumò al torne tes mans dal so paron.
Il dì dopo e je fieste, forsit San Marc e o voi a cjatâ Lussian, cirint di dâmi un contegn naturâl, ma al è dificil tante e je la emozion. “Luciano, o ai un regalut di dâti” fâs jo ”Viôt se a ti plâs?” e i doi la borsute. “Ce âstu puartât?” al fâs lui, tirant fûr il libri. Lu cjale, e i scjampe un moculut, “Al è il secont volum, come il mê” al fâs. Nol sa ce dî, pa la sorprese. “Cjale ben” i fâs jo.
Lussian lu vierç, e in alt de prime pagjine, al viôt la sô firme.
Forsit ai scjampe une lagrime de contentece, e forsit une ancje a mi.
Cumò lu sa dut il paîs, che il libri pierdût al è tornât a cjase.

di Pauli Jacuss (IV3IAN)

7 coments:

Anonimo ha detto...

Cheste e je une storie vêre, che se no mi fòs sucedude a mi o stentarès a crodile. Domandi perdon a Lussian se o ai metût in place un fat che a lu rivuarde, ma o soi convint che une storie cussì a merèti di sei cognossude.
Pauli Jacuss

Anonimo ha detto...

Mi soi mitude a vaî di cûr e a ridi tal stes timp! Ce biele conte!
Gracis!
Rossella

Galliano ha detto...

E daspò a disin che la casualitât no esist, in chest câs alore cemût le clamaressino ?. Mi à fat plasè leile, man man co rivavi ae fin o sintivi la emozion dai doi.

nelodifeagne_51 ha detto...

Luciano me veve contade. E Pauli cun dute la sô maestrie le à metude par scrit. Brâf e vonde

Anonimo ha detto...

Come che ta vite esist il ben il mal, la gionde il dolor,il di e
il scur, sta di fat che chiste conte evidensie le amicizie di une bande e di che altre che false a reona interess personal.Grazie Pauli la conte aé tant ben pandude, donge il plase di savé une amicizie sane, serie, vere, e pulide, come ca coventares par ducj culi in tiere
Iw3 qrc

Mario Sommarti ha detto...

Plui vêr che le finzion:-)

Anonimo ha detto...

Conte stupende e pardabon intense!
AF

O varès alc di dî

Ti sêstu visât di firmâti? :)