lunedì 3 marzo 2014

La magjie des peraulis

A Tonin, fin dai prins agns de sô vite, lis feminis di cjase sô, cuant che i fevelavin dal gjenitôr, al jere dome par dâi une fotografie apene puartade dal puestin, disintji: - Te mande to pari ! - Cjalant la imagjine, il frut al capive che l’om al jere simpri in puescj oltrans in companie di forescj. Mo al jere cuntun trop di nanui vistûts di paiaçs devant de tende di un circ, mo al veve a cefâ cun dai ecuilibriscj e chiromants, mo al cjavalgjave un mus che si rimpinave cun fature volint rivâ in cime di une mont, te ultime rivade al jere in bande di une ferade, che al polsave lis mans sore il mani di un pic, e cussì periodichementri a rivavin altris e... altris.
Il frutin oltri a spietâlis, lis meteve vie intune scjatule di carton, al capive che al veve un pari assent e lontan, ma cun ogni gnove cartuline lu sintive cuasi come se lu ves par dongje. Ogni tant si lu viodeve cu la sô scjatule sot il braç, si sentave sot il cjastinâr fûr dal puarton de cjase, al meteve lis fotografiis par tiere e lis ordenave come che al stes zuiant fasint un solitari. Il timp cence padinâ al leve ingrumânt fotografiis, intant,Tonin al cresseve. Si sentave simpri tal solit puest tignint di voli la crosere, se di li il pari al jere partît, di li il pari al sarès tornât.
Une dì di fumate, la cjalade di Tonin e jere poiade su lis stampis disponudis come al solit, al alçà la viste, al rivà a olmâ la sacume di un omenon intabarât che si moveve te brume... Al frut za no i coventavin lis fotografiis, so pari di persone i contave par fîl e par segn il contignût di ognidune di lôr, al om i slusivin i voi come se in ogni storie al sarès stât a pont di scuvierzi un tesaur. Il zovenut imbacucât lu sintive, intant che il gjenitôr i bordave lis interminabilis vicendis de sô zoventût, si maraveave e intun ciert sens ancje al dubitave, Tonin al tratave di savê dai particolârs che a i permetaressin di cognossilu miôr, tratant di separâ clarementri la realtât de fantasie, che a comparivin simpri miscliçadis tes contis.
E cussì za fantat, une buinore di penze fumate, come che al veve fat so pari, ancje Tonin al cjapà la strade de crosere sburtât des storiis che al veve sintût par agns e agns, ancje lui ansiôs di fâ la proprie esperience e di rivâ a tocjâ cu lis sôs mans e cui siei sens il paîs de cucagne. 
O supon che cheste e je la vite, chê di cumulâ storiis maraveosis dulinvie lant e contâlis ai nestris come che a fossin flabis, il dì di doman cheste e sarà la essence che nus fasarà vîfs tai ricuarts di chei altris.
Nol è impuartant cemût che tu tu lu âs vivut, ben si, al sarà impuartant cemût che tu tu lu âs contât. 

di Galliano di Buenos Aires

6 coments:

Anonimo ha detto...

Biele Galliano: il dolor da lontanançe a trima sul cur di dos bandes,cidinat cun scrits o fotos, e la fuarce dal fi a ripeti sio pari, forsit in rispiett dai siei sacrificis, biele. Lussian

Bepi Zefon ha detto...

Biele une vore Galliano, ma e je dome robe nestre, di noaltris vecjuts e torzeons o vuei dî, parcè che al dì di vuê lis fotos e lis storiis a si metin su Contecurtegnove, Muse di libri, e Tu sês une cane, là che le scjatule di carton e reste dome un ricuart romantic, bon pes contis di contecurtegnove. Bepi

Galliano ha detto...

Graciis Lussian des tôs peraulis. Il dolôr de lontanance al è stât un component stabil par tancj furlans e no simpri cidinât cun scrits o fotografiis, come ancje il ripetisi des situazions, une costante te vite di chest popul.
Ti lassi un salût.
Galliano

Galliano ha detto...

Graciis Bepi, o sai che e je robe di vecjuts ca torzeonin tes galassiis dal îr. Mi par che al è il nestri fuart, chel di sgarfâ te part plui fonde de anime fin co rivìn ae medole dai ricuarts. O sai ancje che la scjatule di carton (e no dome) vuê e vignarès sostituide cuntune Notebook. I timps a son cambiats, par fortune o vin Contecurtegnove che nus da une man.
Mandi,
Galliano

nelodifeagne_51 ha detto...

Vere Galiano nol è impuartant cemût che si vîf. Ma c'è che al reste dentri tal cûr. Brâf Galiano, biele

Galliano ha detto...

Mandi Nelo e graciis dal to preseament.
Ti saludi.

O varès alc di dî

Ti sêstu visât di firmâti? :)