martedì 22 aprile 2014

İMILAGRO!

Mio barbe ornitolic, vedran, al viveve cu la mari (mê none) intune cjase plene di garbatui, libris, gjornâi, scjaipulis. Te cjamare, intun comò celestin a cuadrei di aur, al veve platât un biel rotocalc cuntun servizi su Pamela Tiffin, une piçule dive merecane. Tes fotografiis jê si discrotave dal so vistidut vert smeralt. Barbe ornitolic al tignive platâts altris libruts segrets tai cartons, parfin te cjamare de none!
Jentrât te stanzie di mio barbe cuant che al jere a vore (o vevi dit a la none-vuardiane che o cirivi un libri sui pes) o vevi robât il rotocalc cun Pamela Tiffin e za o pensavi di metilu sot dal mio cussin ma, rivât cjase mê, mi jeri intivât in Riedo Mostacjin, vignût a partânus une damigjane di vin.
“Ce âstu che ti ven fûr dai bregons, Toni?”
“Ah nie, il boletin de parochie…”
“Alore al fevele ancje di me e de gjite ch’o vin fat al Santuari de Madone dal Pelegrin… vierç il boletin che ti mostri…”
Ma jo no orevi mostrâi il tesaur e, cu la scuse di une comission urgjente par mio pari, mi indreçai bande de place e po inte stradele dal Bareglot. Li, intune cise, o varès fat un biel discorsut cun Pamela…
Jentrât te prime boschete plen di morbin, viert la riviste a pag. 3… no viodei plui Pamela! No jere plui nissune foto! Lis pagjinis a jerin dutis blancjis! In chel istant une grande lûs mi inceà e al centri o viodei propit jê, Pamela, vistude a vert e cuntune corone di aur sul cjâf… e veve une lungje tonie… no jere crote, no!
Mi disè: “Tu sâs cui che o soi!”
Mi sveai oris dopo intun jet di ospedâl. O vevi vût une sorte di deliri alucinatori dissal il miedi. Mi veve cjatât, svignût, un contadin tal Bareglot…

7 coments:

Anonimo ha detto...

Ce ninine chiste conte! In altris timps mi sarès spietât ae aparizion di une madone che ti varès puartât sule strade juste e cence cîsis:-)
Jaio

gelo stellato ha detto...

biele conte checo! e biele fritule! :D

Anonimo ha detto...

Blasfemo! Blasfemo! Blasphemous rumours! Chi à orecchi intenda!

Anonimo ha detto...

Si scrivi contis cuntun tic di sâl e pevar al é blestemâ alore cul l'asêt e 'l vueli e saran inmò miôr. A cjoli cence moderazion cui vôi bevint un tai sot di une musicute erotiche par no ofindi lis vorelis o lassâlis in bande cence nuie:-)
Jaio

Anonimo ha detto...

Tu seis unevoreunevorevoreunevoreunevore philopsophic, Jaio... jo o soi l'huomo della strata e no ti capìs purtrop...

gelo stellato ha detto...

o ai di zonta che la robe miôr de conte e je stade... cirî la imagjine di meti! :D

Anonimo ha detto...

Bisugne ricognossi che il complant barbe ornitolic - vedran - al jere un intenditôr... e ta chei timps lis fantatis dai rotocalx a jerin bielononis ... migo comè cumò? Sylicon a sbreghebalon!
CT

O varès alc di dî

Ti sêstu visât di firmâti? :)