venerdì 18 aprile 2014

Ogni tant un cuc tal cîl


Di gnot, s'a nol è nulât, un cuc tal cîl ogni tant a ti fâs dismenteâ le marmaie ch'a vose e si tire pai dincj dut il dì in television e su la rêt; ducj a san ce fâ ma nissun al è bon di fâlu. A disin che dut chel vosarili li al sarès la democrazie, parcè che a ju lasse fevelâ ducj e ducj a puedin dî la lôr monade cuotidiane, cussì che i sorestants a fasin ce che a vuelin lôr, tant cualchidun, poçs par veretât, a lu contentin di sigûr; fossie vere, ma par me cont chê siore li, la democrazie, e je une vore malade e no si viodin miedis bogns di curâle. Par dî il vêr a no soi bon nancje jo di cjatâ la midisine juste, e inalore tant vâl tirâ su il cjâf e dai une voglade al cîl ch'al à simpri alc di gnûf di contânus; ancje cence doprâ il telescopi, ma dome a voli crot si pues rimirâ lis maraveis dal cîl di Avrîl. Il planet Mart al fâs di paron tant che chest an ai vot dal mês al sarà l’astri plui luminôs dal cîl, insiemi cu la stele Siri che ducj a san jessi la regjine da la gnot; lui par intant si fâs viodi cu la stele Spica te costelazion da la Vergjine, che jessint mancul sflandorose i fâs fâ plui biele figure. E po Joibe, come ch'a mi plâs clamâ il planet Jupiter, che za di cualchi mês al va ator cui Zimui, inte lôr costelazion. E ce dî di chê torzeone di Lune che intun mês e rive a compagnâsi une prime volte cu lis Pleiadis, lis stelutis de costelazion dal Taur, e po dopo cun Joibe, Mart, Saturni e Bielestele par tornâ a la fin insiemi cu lis Pleiadis. Chest mês po un grup di astronoms brasilians al à fât un scuvierte une vore strambe, vint olmât un asteroit di non Chariklo cun doi anei, tant che il planet Saturni, che al sarès il cuint astri cu la corone ch'a si cognossi; al somee che cheste corone e sedi fate di fruçons di altris clapons che a si son pocàs fra di lôr fasint une fracassine. A saressin ancje ben cuatri cometis ator pal nestri cîl, lis vecjis cognossincis C/2012 K1 PanStarrs, C/2012 X1 Linear, C/2013 R1 Lovejoy, e la gnove C/2014 E2 Jacques scuvierte in Març dal osservatori SONEAR in Brasîl; pecjât che par viodilis a covente doprâ un bon telescopi, ma vint voie si pues simpri domandâ il jutori di cualchi grup di astrofii cui lôr argagns, che inte Piçule Patrie a no mancjin di sigûr. Cun dut chest ben di Diu di cjalâ là adalt a si pues ancje rassegnâsi a sopuartâ ducj chei cjastrons ca nus remenin la fertaie dì e gnot.
di Bepi Zefon

10 coments:

Anonimo ha detto...

mandi Bepi
o ai let di gust e o spartìs a plen la tô idee di intardâsi a cjalâ la imensitât dal cîl. cun voi plens di curiositât: par svicinâ l’infinît a sfrancjâ sudizion. e dismeti lis fluscadis che nus rifilin tant che dormie.
no fidi l’ore che i fruts a vegnin sù un ticut, par menâju a passonâ di gnot, cuntun skywatcher. par no che a cjapin man cu la playstation.

passadôr

Anonimo ha detto...

Biele Bepi, ben ta me ignorance sui astris, o pensi che il cjala par ajar al sedi il plui biell e fasevul timp pierdut, nus staronge la dimension di trop piçui ca sin.Sa cjalassin lassu ancje i nestris sorestants forsit alc di bon saltaress fur Lussian.

nelodifeagne_51 ha detto...

Ma si, scjampin tes maravees da cîl par no deventâ mats

Anonimo ha detto...

Passadôr, Lussian, Nelo a mi fâs plasè savê che a son tancj altris contecurtârs ch'a cjalin adalt. Inalore o pensi ch'a nol sedi ancjemò dut pierdût. Graciis da Bepi

Anonimo ha detto...

Ae prosime lune, plene o vueite, inalore, ducj a cjalâ il cîl cuntun tai te man.
Le lune a é simpi chê par ducj ma seont dulá che si vîf e à un aspiet difarent
cuant che no jè taronde e plene. Di fat, da nô
un cuart di lune al é plui verticâl che in Sicilie o in Spagne ma si lais in Arabie Saudite
il cuart de lune al é ponet ae orizontâl e forsit di lì si puedarès dî che bielzà
prime de nestre e de lôr religjon, bielzà si adorave alcaltri parce che i astros no si viodin
compagns da une latitudin a chê altre. Dutcâs, chest articul sul cîl nus a fat sorepensâ al sogjet.
Sì , o dîs articul e no conte ma o sin achi jenfri di nô no dome par lei e scrivi ma ancje par
vê un tai in compagnie cirint di tignî sù 'ne lenghe che achi di cent agns si dîs che a sarà sparide.
O sin forsit i ultims dai furlans a podê cjalâ il cîl e po stâi ancje a cjantâlu passant par Cividât
che seont le cjançon, no é 'ne vile ma ne ponte di sitât, e che seont lis regulis chiste no è ne conte
ma ne ponte da cjantâ:-)
Ma o mi stoi domandant cemût che a puès sei le lune in Argjentine indulà che cumò al é l'atom
e tant che nô o nin viers l'istât, là jù e van viers l'unvier.
Che vedin il cuart de lune cul cûl in sù?
Jaio

Anonimo ha detto...

Jaio, pense che o ài vût la fortune di viodi il cuart di Lune in Egjit come sentade cu la Bielestele parsore come ta un zei. E a proposit di marilenghe, propri îr o ài vût câs di fevelâ cun tune siore a pene rivade dal'Argjentine, nassude in Italie e migrade cu la famee là vie a cic agns, cumò e je su la sessantine. Ben ti dîs ch'a fevele un furlan perfet, miôr dal gno, jessint che la famee a continuât a fevelà la marilenghe ancje là vie. Ma il biel al è che la fie, vincjedoi agns laureade a fevele ancje jê un furlan perfet, par di plui propri vuê cjaminant par Ivree, là che o vîf, o ài cjatât ben doi furlans e a vin fât une biele cjacarade par furlan. Inalore Jaio o pensi che a nol è dut pierdût ancjemò pe marilenghe. Bepi

Mario Sommarti ha detto...

Salve Bepi, Plasê di savêlu e fintramai di vioditi zontâ inmò alc di plui. Si disarès che i furlans e fevelin miôr le marilenghe cuant che a son tal forest, dutcâs se chest al é vêr a Buenos Aires, Udin al é deventât Malos Aires:-)

gelo stellato ha detto...

a mi, mi à fat vignî in ment Palomar di Calvino, cuant che al cjalave lis stelis cu la mape su zenoi... biele conte!

Anonimo ha detto...

Nuie mancul! Gelo jo a no sai a cui cal pensave Calvino cuant ch'al à sielt Palomar, ma o sai di sigûr che al Mont Palomar in Californie a si cjate un famôs osservatori astronomic; dome une coincidence? Bepi

Anonimo ha detto...

Jaio, a proposit di cul in su, chel dal osservadôr no chel da la Lune, il program Google Sky Map su di un smartphone o un tablet, a ti fâs viodi il cîl Austrâl stant cul cul in su in Friûl e ancje se al è nulât. A nol è come viodilu dal vîl, ma al è simpri miôr che no nuie. Bepi

O varès alc di dî

Ti sêstu visât di firmâti? :)