mercoledì 2 aprile 2014

Trê cuadris e un spieli (2)

Tom Bennet: sconfuart

secont at de tragjedie
intal Novembar dal ’18, dopo la vitorie taliane, e rive sul puest la Reâl Comission di Indagjin. Fate nome di oms!
“ce vergogne, Signôr… e cumò?”
“tasê, cidin! in cuce!”
cun di une bande ogni reticence par teme dal disonôr, e di chê altre la volontât di no comprometi inmò plui les comunitâts, chei incuisitôrs e rivin a scrivi di istès siet volums su chel cont. Il cuart al à come titul: « Delits cuintri l’onôr de femine » [[1]] ma cence zontâ un verbâl, par no rindi publichis chês scabrosis descrizions.
ce sensibilitât, benedets!

cun dut chel e rivin a ricognossi cent e sessantecinc (175) câs cui nons des vitimis e cinc cent e setante (570) aciertâts, ma cence indicazion des identitâts. sepi-dìu trops altris: tasûts, scuindûts, taponats, neats, cidinats, glotûts. Ce pretindi di chês feminis, dopo un abûs: lôr simpri cul lunc grumâl neri. sieradis tai cjamps e a la storie. metudis in bande dai oms e de glesie.
E no je inmò finide.

tantis le an suiade cussì. ben altris si son cjatadis in spiete: e par scancelâ le infamie prin di pierdi la famee, un pocjis e an rivât a dispierdi. un pocjis, dopo, e an proviodût a sfantâ la panole. chês che non an vût fortune o coragjo, e an parturît il « fi dal nemì ».

culì al tache il tierç at
lis maris sposadis e an cuintri l’om o la sô famee. Chês no maridadis: i paris e i fradis. Cu l’om muart in vuere, chel piçul magari al podeve restâ: ma se l’om al tornave, no che no! incolpant la femine di no vê resistût. o dopo, di no seisi copade. Ancje i fîs plui grancj non vuelin vê li chel bastart.
i fîs dal todesc e cjatin nome ostilitât, aversion, asse, inclemence.

il doi di Dicembar dal ’18, a Portogruaro si vierç l’«Ospizi dai fîs de vuere». par dâ acet ai vuarfins dai vîfs [[2]]e “meti adun la pâs des fameis scjassadis, comedant la morâl in ruvine” [[3]]. e rivin subite un centenâr di feminis in spiete, cun pôre dal om. ma subit dopo, par jentrâ, bisugnave che lis autoritâts locâls (plevan e sindic) e comprovassin. un predi al scrîf: « la mari e à simpri tignût une condote cence difiet, partant plui che colpevule bisugne clamâle disditade, parcè che e je stade puartade al pecjât cu le violence ».
e veve cuindis agns.

intal Ospizi e cjatin ricovar daurman, tresinte e cincuantecinc (355) fruts. ma si sa dal ciert, di prole ilegjitime che e je lade ancje tal orfanotrofi di Udin, e po di tancj câs che son stâts refudâts (dulà mai sarano ladis a finî chês creaturis) no vint la documentazion necessarie: scomençant de rinunzie a ogni dirit sul frut, firmade da doi gjenitôrs. l’om al veve par leç la paternitât, ancje se nol saveve nuie. nunziade al contrari. opere pie, a mieç.

dal Passadôr

fin dal secont toc. continue ...




[1]     al è dividût in cjapitui: 1) Stupris cun omicidis o feriments. 2) Violencis cun menacis a man armade. 3) Stupris di vecjis, di frutis, di infermis. 3) Ats di depravazion. 4) Azions di brigantaç.
[2]     Andrea Falcomer: Gli “orfani dei vivi” / bibliografie essenziâl: - Bruna Bianchi (a cure di): La violenza contro la popolazione civile - Laura Calò: Le donne friulane e la violenza di Guerra - Daniele Ceschin: L’estremo oltraggio - Antonio Gibelli: Guerra e violenze sessuali - Michele Strazza: Senza via di scampo.
[3]     il codiç Zanardelli, al considerave il stupri un delit cuintri il bon sest e l’ordin de famee !

4 coments:

Mario Sommarti ha detto...

Spietin alore il tierç cuadri.

Anonimo ha detto...

Sì, spietin il tierç cuadri.
Di plui jo o spieti il spieli...cui varial di spielasi?

Sven Nordveidt ha detto...

Pecjât che si tabae dome das violencis dal esercit imperiâl e no di chel talian (chel cal e vignût a puartâ le vuere) in friûl.

Sven Nordveidt ha detto...

Pecjât che si tabae dome das violencis dal esercit imperiâl e no di chel talian (chel cal e vignût a puartâ le vuere) in friûl.

O varès alc di dî

Ti sêstu visât di firmâti? :)