mercoledì 28 maggio 2014

Mandi Franco

Mi riès une vore dificil scrivi chestis riis, ma o ai pensât che no podevi fâ di mancul, e che al è just saludâ cui che nus à dât tant e tânt nus à lassât.
E je la seconde volte, in pôcs mês, che o scrîf un post di chest gjenar, e nol è biel, parcè che ciertis robis ti gjavin lis peraulis e ti lassin plui puar.
Franco Marchetta nus à saludât par simpri, vuê, e un come me che lu à cognossût in pratiche dome vie ordenadôr forsit nol à tant dirit di scrivi alc su di lui, e di fat, no lu fâs.
O sai dome che Franco al jere un dai colaboradôrs di Contecurte e di sigûr il scritôr par furlan che miôr al veve capît e doprât la nestre lenghe in maniere moderne e doprant i mieçs di cumò. I vevi domandât une conte su la vuere, pôcs mês fa, e mi veve dite de sô salût, ma mai o varès pensât che lis robis a coressin in cheste maniere. Cualchi domenie indaûr lu ai sostituît intun spetacul a Tor di Zuin; su la scansie o ai inmò il so libri, a miezis, chel che al à vint il penultin Sant Simon. 
Nus à lassât tant, e il mancul che o puedin fâ al è leilu e tignî di cont il furlan, almancul un pôc di plui.
Nuie altri, e mandi Franco.

5 coments:

Anonimo ha detto...

"Muchos años después, frente al pelotón de fusilamiento, el coronel Aureliano Buendía había de recordar aquella tarde remota en que su padre lo llevó a conocer el hielo...."
Mandi Franco, ti saludi cun chestis peraulis che o sai che tant ti plasevin, graciis di cûr
Ce tant che mi displâs!

Maurizio "Il Crot"

Anonimo ha detto...

Ducj i miei pensîrs par chei che restin te famèe di Franco e un salût p
al nestri contecurtâr che forsit al si é tolet vie cule impression che
al jere a pene rivât. Di fat, o invidi ducj a pensâ che une dì nus tocjarà
ancje a nô. Jenfri miliarts di individuis no sin âltri che furmiutis che van
e vegnin cence pensâ masse al timp ch'al passe. Come se murissin dome chei âltris
Po ben, Franco graziis di venus dât le ocasion di sintîti cui toi pinsîrs
in furlan. Cuant che sarin ducj muarts a tu sarâs il prin in te liste dai
contecurtârs di chest piçul mont furlan.Graziis di venus dite di profitâ de vite
tant chi savin inmò fâlu.O speri che il blog Contecurte al resti chiste vôlte
in rêt par simpri, cussì, s'al mûr al restarà simpri alc par cualchidun.
Imagjinait se un Pasolin al scrivès achi cualchi conte e che tra cent o
dusinte agns a si puedi leilis lant sule lune o cuissà indulà...
Jaio

Anonimo ha detto...

Al à sunât il bot par Franco

I amîs, a cidin,
si tirin dongje sintint,
la grande sunà.

Anonimo ha detto...

Chei vôi velâts di malinconie e che somein plens di pôre dal doman, a mi àn fât passâ la voie di scrivi. Mandi Franco ancje se no ti ài mai cjatât su le me strade. Bepi

Anonimo ha detto...

La storie di un om e je fate di tantis stanziis, tancj monts, come chel Univiers che di no tant timp al veve vût creât. E un dai monts di chel om, chel public de leterature, nus al à lassât in ereditât za di in vite, cul invît di fâlu cressi. Fasarìn ognidun la nestre part, cui grande cui piçule, onorant ce che al à fat a timp a regalânus. Mandi

O varès alc di dî

Ti sêstu visât di firmâti? :)