martedì 15 luglio 2014

Là che il sium al cjape pît


Sot un cîl mont, intune biele zornade, là che al someave, slungjant a pene la man, di podê poiâle sui pics des vicinis montagnis, che in chê dì si viodevin tant claris, un dopo chel altri e passavin denant dai miei voi:
Bepi, gno pari, Sunte, mê mari, Angela, Catine par prins.
Po dopo il Cont, di vîf tant siôr e potent, ma lu stes spirât cussì zovin, E subit dopo chei fantats, fantatis, fruts cun me tancj agns indaûr, ancje lôr lâts vie inmò creis. 
E veju lâ ancje miei barbis, mês agnis, miei nonos, mês nonis, i miei fradis muarts a pene nassûts. E par ultins miei cusins, mês cusinis e tancj altris, ducj svuelâts in chel mont che par me inmò al reste un misteri. 
E pierdût in maliconics ricuarts, morestâst di chê biele zornade, indulcide ancje dai cjants dai mierlis e di altris ucieluçs o provavi invidie par chês animis cence fevele, pal chel lôr mont seren, lizêr come la bave di chel aiarin che mi alçave un fregul i cjavei e a pene, a pene al moveve la ponte dai pins. 
Beâts lôr che a an dismenteâts lis lôr cumieris, i lôr cjamps, lis bondancis e lis miseriis, I lôrs vêrs lambics cuant che a jerin vîfs. 
Ducj là, puarets e bacans, sotans e sorestans, cuiets, cence bramis o pinsîrs di sorte: come il dì e la gnot, part di chê nature che no cognòs il prime e il dopo, il vuê e nancje il doman, dutun cun ce che al vîf tal eterni.
di Nello Malisano

6 coments:

Anonimo ha detto...

Cence timp, dome spazi! Isal pussibil Nelo? Bepi

Anonimo ha detto...

Le vite che va e no torne plui.Miôr gjoldile subite prime ch'al sedi masse tart. Mandi e graziis dal pinsîr.
Jaio

Anonimo ha detto...

Graciis Bepi. Tu mi domandis se al pues jessi un dopo cence timp. Mah, pues diti che no lu sai nancje jo, ma cuissà, pues jessi ancje chel.
Nello

Anonimo ha detto...

Graciis Jaio. e a ti che tu pensis di gjoldile dute cumò che sin cà a contale, mi ven di disiti che tu às reson, ancje se si podares dì, che nissun di chei che us an lassats al è tornat par lamentasi.
Nelo

Anonimo ha detto...

Biele Nelo. Cence sbaglia a disaress che an cjatat il ver comunisim, indula che ducj si confrontin al stess nivel. Lussian.

nelodifeagne_51 ha detto...

Brâf Luciano, lu dîs il stess titul de conte. Ma Forsit ancje che sanitât prometude

O varès alc di dî

Ti sêstu visât di firmâti? :)