mercoledì 24 settembre 2014

Le prime ploie

Cun dute le canaie che 'nd ere da Agne Lene la Istât, par fuarce che cualchi acident al scugnive rivâ.
- La Zizi e jere colade e si jere scussade il nâs e cumó a 8 agns a no podeve plui maridâsi.
- Il Nino si jere brusât il gargat crodint di bevi vin intune butilie di asêt e al veve pierdût le lenghe.
- Il Paride si jere fat brincâ a robâ un salam inte cjanive. Se chest al veve fat riduçâ agne Lene al veve fat la disperazion di sô mari che lu tignive a diete crodint ch'al fos malât di cuissà ce.
- Il Vigjut, clamât il Nonçul parcé ch'al voleve simpi zuiâ a fâ le messe par sunâ lis cjampanis, cumò invezit al zuiave al dotôr e par vie che al veve il nâs scussât, al veve metût une aspirine te surisute di sô cusine triestine
- Daspò, i doi zimui che lavin a pescjâ tal Dean, une dì invezit di tornâ plens di pes a jerin tornâts plens di pachis par vie che lant a disturbâ chei che levin a fâ l'amôr 'te glerie da pescjadôrs a jerin deventâts pecjadôrs.
- Infin Il Beput, par mostrâ ch'al jere il plui brâf, al si jere metût a spacâ lens, al veve sbaliât il colp ferintsi un zenoli. Par fortune a lu veve dome fat vaî di pôre e agne Lene, jenfri il disperâ e il riduçâ, il berlâ a di un e il consolâ chel altri e veve plui da fâ a calmâ lis pôris des maris e i paris e i dubiis dal vicin, il Bepo, che si lamentave che i fruts intun mês a i vevin robât plui di doi chilos di clauts e al jere li ogni dì ae ore dal café a ripeti che jenfri ducj chei agnui al scugnive sei almancul un sacrabolt.
Agne Lene i veve dite che se i fruts no i vevin robât il martiel a no podevin lâ a plantâ clauts, ma le storie e lave indenant di café in café fin che une gnot al jere vignût un temporâl a sfredâ le atmosfere, a calmâ i gnerfs e a puartâ la calme te grande cjase di Agne Lene. La calme?
Tal prât daûr de cjase il soreli nol jere inmò rivât a secjâ le jerbe da dâ ai cunins che i fruts a vevin za tacât a balinâle dopo vê scuvierzût che alc al jere colât dal grant peç.
Ce jerial? Cul svualâ e il checâ des chechis ator de mularie agne Lene e jere lade a viodi e po e veve clamât il Bepo. Il Bepo al veve fat il so mea culpa par no vê pensât che lis chechis a podevin robâ i clauts par fâ il lôr nît. Dopo vê cjapât sù i soi clauts al pensave di vê il so café distês ma vuê agne Lene e veve decidût di lâ a fâ il portîr parcé che, disse, a veve prometût ai fruts che ae prime ploie evarès zuiât cun lôr dal balon. Cuissà ce tancj gôi!
di Jaio Furlanâr

5 coments:

Anonimo ha detto...

Jaio, a tu âs fât un cuadri o miôr un afresc leterari di une zornade di vite dai prins dal nûfcent in Friûl. Di miôr no si podeve. Prove a metilu su tele. Bepi

nelodifeagne_51 ha detto...

Jaio, par prime robe brâf:scrite ben, slisse e ridicule. Ma contimi, gnagne Lene jerie une sante? O forsit ju sopuartave ducj, tant di gnot e lavin a durmì ognidun a cjase lôr tal lôr jet?

Anonimo ha detto...

Biele Jaio, come al dis Bepi tuas piturat un cuadri de nestre zoventut, Indula che il vivi dentri al fas tante aspirine a lis maluseris dal nestri timp.Compliments ancje par il to atacament a lis lidris da to tiere. Lussian

Yaio ha detto...

Graziis a vualtris pe leture. O crôt che 'ne volte publicade achi al é bielzà avonde. Baste dome che ne vuere o 'ne Sirie no fasi gambiâ lis robis e o cjatarín ts Contecurte simpri 'ne gnove achi di cent agns.
Jaio

Yaio ha detto...

Graziis a vualtris pe leture. O crôt che 'ne volte publicade achi al é bielzà avonde. Baste dome che ne vuere o 'ne Sirie no fasi gambiâ lis robis e o cjatarín ts Contecurte simpri 'ne gnove achi di cent agns.
Jaio

O varès alc di dî

Ti sêstu visât di firmâti? :)