mercoledì 29 ottobre 2014

A talpe di Fido


Al veve un voli clop, par vie di une feride di vuere ch'ai veve lassât un tai parsore la cee drete e cun di plui la bale dal voli dute blancje, tant che il blanc di un uf dûr. Gjino Screce, a lu clamavin cussì ma no si sa parcè, al veve servide la patrie come ardît cence tirâsi mai indaûr cuant ch'al jere di batisi, fin che a no jere rivade chê baionetade ch'a lu veve metût fûr dal zûc e fat ricoverâ in ospedâl militâr par un grum di mês. Tornât in paîs al veve cirût di cjatâ un lavôr, ma nol jere stât facil jessint ch'a nol veve famee e cun di plui cence vê mai imparât nissun mistîr; insume cence vê ni art ni part a no si va di nissune bande, a si diseve ancje a chei timps là. Inalore al viveve a la zornade cun cualchi lavorut di manoâl e une vore di caritât de bande de int, si che duncje i tocjave dispès di lâ a durmî in blanc, al diseve lui, come a dî cence cene. Al leve ator pal paîs simpri discolç e cuant che lis veduis a lu clamavin: “Gjno, ve ca un pâr di scarpis dal puar gno om”, lui al rispuindeve simpri: “O ài miôr cjaminâ a talpe di Fido”, ven a stâi come i cjans. 
“Ce mangjistu usgnot, Gjino?”
“Usgnot polente blancje e cjalâ ator”, fasint capî cu la man ch’a no ‘nd jere ni polente ni nuie altri.
“Parcè no jentristu a viodi s’al è alc di miôr ca di me?”
“S’al è par chel o soi simpri pront”, al rispuindeve inviantsi a pas di ardît.
La vuere e veve fat nassi un grum di erois cun tant di nons sculpîts su lis lapidis dai monuments, ma par ogni muart maridât e jere une vedue restade di bessole cence nissune difese; e vevin di bon la pension di vuere e salacor il mus te stale, cun cualchi cjamput di semenâ, ch’a lis fasevin vivi avonde asiadis.
Al restave viert il câs dal afiet, ma cun l’armâr plen di bregons, cjamesis, gjachetis e scarpis di om a si cjatave simpri cualchi bon samaritan pront a proviodi; se po a si zontave la braùre in cusine, lis robis a levin ancjemò miôr. 
Lis vueris, daspò lassâts atôr tancj muarts, a volaressin fâ murî ancje i cristians restâts vîfs, ma a àn di fâ i conts cun la voie di tornâ a vivi des feminis che, sore il dut des nestris bandis, ‘nd àn simpri viodudis di cuetis e di crudis.
di Bepi Zefon

2 coments:

nelodifeagne ha detto...

Bepi, Ti al spirât te conclusion de conte le cjantade "Le vuere di Pieri" di Fabrizio de Andrè? Biele la to umanitât di meti a fûc i afiets, la mancjance di un om che lis braçoli di chês biadis restadis veduis, tantis voltis ancjemò fantatis

Anonimo ha detto...

Nelo, a son robis veris chês contadis ta che conte. Pene finide la seconde vuere mondiâl tra muarts in vuere, copâts jenfri lôr, e migrâts par lavôr e jerin pais plens di feminis e cualchi om vieli.... par tornâ a vive chel e altri... Bepi

O varès alc di dî

Ti sêstu visât di firmâti? :)