lunedì 13 ottobre 2014

Il mus in conciert



Par jessi biele a lu ere pardabon, lu saveve ancje jê, e faseve di dut par mantignî la linie e lis formis. A chei timps là e leve di mode la piel blancje, mighe lis piels maron scotadis dal soreli di Lignan come vuê. Si che duncje cuant che e leve a vore tai cjamps, sul cjar tirât dal mus, a si vistive tant che une muinie, cun cotulonis lungjis che i rivavin fin tal cuel dai pîts, e une cjapiele di stran cu lis faldis tignudis pleadis di un façolet leât sot il cuel, in mût di no lassâi viodi al soreli nancje un blec di piel. I moscjons dal paîs a la vevin bielzà olmade, ma jê a no veve nissune voie di sistemâsi in campagne, cussì spietant che la buine ocasion e rivàs di fûr vie, a no si jere impegnade ancjemò cun nissun. Ancje se lis lengonis dintor a savevin ben ch'al jere cualchidun ca no si rindeve, e al tentave in ducj i mûts di fâi capî a Vigjute il so interès. 
Vico il Moro al lavorave in Comun e a oris pierdudis al veve metût sù une corâl ch'a cjantave in glesie e ancje in tes placis in timp di sagris o altri fiestis; lui al veve ancje une vôs di tenôr nuie mâl, al pont che cuant che al mancjave cualchidun al faseve sedi di mestri sedi di cjantant. Al jere bielzà cualchi mês ch'al veve butâts i voi su Vigjute e i leve al côr di cjatâ la ocasion par tacâ boton in cualchi mût.
In chê sere di Mai viers miezegnot, il cidinôr dal curtîl di Vigjute al ven rot di un sunôr di ghitare che intone le jentrade de "Serenade" e subit daûr une vôs di tenôr che e cjante: 
"Tu âs doi voi che son dôs stelis, la bocjute ‘e je un bonbon
E cuant che sôl tu mi favelis, jo starés in zenoglon..". 
Inte cjamare di Vigjute, ch'a durmive cun sô sûr, si sint di bot dut un messedament di çavatis e un scûr di barcon ch'a si vierç planc, planc in sfese. 
De cjamare dal nono invezit al ven fûr un vosâ businât cun framieç tancj porconons viers chei rompicitis ch’a lu vevin sveât, daspò une zornade di lavôrs a fîl di schene tai cjamps.
Biel che rivâts al viers: 
"Armoniose la vosute..", 
il mus inte stale al tache a cuarnâ fin a sgosâsi. A chest pont Vico e il ghitarist, capît di no sedi ben agradîts, a ciapin la ghitare e a scjampin vie di chê bande che a jerin rivâts, molant la serenade in tes mans (o miôr tai çucui) dal mus, ch'al va indenant a cuarnâ a lunc cence mai rivâ a dî: 
"Eco cà: cjò il mio cûr". 
come ch’al varès dit Vico.
Vigjute lusingade di tante passion, ma vergognose pe brute figure fate, no à olsât a domandai scuse ni a Vico ni al mestri Zardini par vei vuastade une cussì biele serenade, lassantle cjantâ al mus di bessôl; lis lengonis dal paîs, che in cualchi mût a vegnin simpri a savê dut, a son ladis indenant a slengaçâ e a cjoli pal cûl il puar Vico par plui di une setemane, fintremai che la cjacare e je lade a murî planc, planc. In ta chê sere Vigjute e à rionte la sô volontât di sistemâsi in citât.
di Bepi Zefon

7 coments:

Yaio ha detto...

O cjati cheste storie degne di stâ cul vecjo stîl furlan dulà che, par une reson o chê altre il biel al và simpri incuintri al brut e il bon finî (Finii,hm?) al é di spès un compromes che nol rangje nissun a part chei che crodin che le morâl a é di tirâ cule lenghe par no tirâ cule sclope a ducj I cjâfs che volaressin mostrâsi plui in sù di chei altris.
Par me, le Vigje che plui che mai a decît di lântsi in citât a resum dut. Mandi
Jaio

Anonimo ha detto...

Jaio, a fâ vêr ce che tu disis o pues zurâti che la conte e je vere, vint sintût di persone la Serenade in che sere dal dì di Mai e ce ch'l è capitât subit dopo. Bepi

Anonimo ha detto...

Ma alore ancje il mus jere n'amorat de poeme. Lussian

Anonimo ha detto...

Lussian, al è par chel che e à rionte la voie di scjampâ vie. Bepi

nelo51 ha detto...

Bepi, une dì, propit te ostarie di contcurte, tra un tai e che altri, mi an contât, che Vigjute a pene lade a stâ in citât, i à fat vê il recapit a Vico, e ogni volte che vignive la fiere batecule, par fassi perdonâ, e clamave propit lui par che je misuràs cul so termometri.

Anonimo ha detto...

A mi mi risulte che Vico a nol à volût mai distacâsi de so coral par pôre di sinti altris cuarnadis. Bepi

nelodifeagne_51 ha detto...

Vere, ma chel non vuel dî che ogni tant non las a misurai la fiere a Vigjute.

O varès alc di dî

Ti sêstu visât di firmâti? :)