lunedì 6 ottobre 2014

Lino e lis aganis

(Sheril Fenn, foto di Bettina Rheims )

Al jere di un biel pieç che al jere sveât, dibot e batevin les trê, e nol podeve tornâ a cjapâ sium. Dentri te cjamare e tal coridôr no si sintive un cic, a part cualchi carûl che al mangjave l’armaron. Puar Lino, veglant, si zirave tal jet sperant di podê almancul sierâ un voli pes oris de gnot che i jerin restadis. Vere, al jere lât a durmî cul bultric vueit. Come companadi dome dôs fueis di lidric che di tant pôc che a jerin cuinçadis, someave di mangjâlis sul strop. Po dopo, dome polente e pocje ancje di chê. Chê e jere stade la sô cene. “Sacrament e je le fan che no mi lasse durmî.” si ripeteve fevelant ben planc il puar Lino. Ma ce al podevial fâ, e a chê ore li sveâ Mariute che e durmive come un çoc, al sarès stât un pecjât. 
Ma dopo che, biadelore, zire e che ti zire tes cuviertis, a Lino i voi al someave che si tornassin a sierâ, un vosarili che al vignive de cusine lu veve di gnûf dismot. Intun prin moment a chei sunsûrs non veve dade tante impuartance, ma dut al jere cambiât cuant che, simpri de cusine, al veve sintût rivâ un cisôr di cotulis, un riduçâ di feminis, ma soredut un cinglinâ di pirons, sedons e curtìs.
Non saveve cefâ puar Lino, ancje parcè che i jere vignude un fregul di pôre. Sarès stât li ben tal jet vulintîr, cence lâ a cirî comediis. Ma nol podeve, al scugnive lâ a viodi se al jere cualchidun. “No si sa mai, no volarès che al sedi cualchi lari” - si diseve di bessôl. E alore in cuatri e cuatri vot, metûts sù dome i bregons, al jere partît par lâ a viodi. Mari mê, rivât in cusine, pal puar Lino robis di no crodi. Cjicis di Diu a jerin lôr, lis aganis, vistudis come pipinis. Cotulis di sede, cjamesutis cul picet, maiutis di buine lane, rincjins, anei e no sai ce altri ben di Diu.
Cun di plui sentadis ator ator de taule, si tratavin dal tu fevelant par talian, mangjant e bevint come purcitis. “Ma indulà àno cjolt dut chel ben di Diu?” si domandave Lino "Te mê panarie e te me cantine sigûr di no. Li, podevin cjatâ dome un fregul di ardiel ranzit e cualchi butilie di asêt”.
Feminis cussì bielis, Lino, prime di chê gnot no lis veve mai viodudis .
A vevin un pet e un cûl, che puaret, dome a cjalâlis, i mancjave il flât. E par di plui, chês slondronis, i vevin smot lis stessis voiis di cuant che al jere fantat. Une voie di pêl, che di bot al varès slungjade le man su une di lôr. 
Diu nus vuardi se lu ves fat. Dome a cjalâ une tai vôi al sarès restât sfulminât.
Il puar Lino, cjapât di tant desideri, al podeve dome tornâ sù te cjamare, jentrâ dentri tal jet e frontâ Mariute che forsit cuissà di trop timp e spietave chel biel moment. 
E cussì al à volût il destin. Ce biel. E Mariute, intun prin moment viodût dut il boiôr che chel om al veve metût jentrant sot des cuviertis i veve domandât: “Lino ce ti isal sucedût? no tu vevis tante pompe nancje la gnot di in chê dì che si sin maridâts”.
“Tâs, tabaie ben planc che o ai viodudis lis aganis e podin sintinus”- i rispuint lui.
Marie a lis sôs peraulis no saveve ce dî, e pensave che al fos deventât mat, ma istès, contente come une Pasche, e sperave che chês feminis i comparissin plui spes.
di Nello Malisano

10 coments:

Anonimo ha detto...

Biele Nelo, une flabe tirade fûr par fa tirâ drenti:-)
Jaio

Anonimo ha detto...

Nelo, tu meretis il Nobel pe chimiche, lis Aganis miôr dal viagra! Cui lu varessie mai dit. Bepi

nelo51 ha detto...

Bepi, prime Rafaele cul so coment,dpo lis tôs rispuestis e infin cu la mê conte sin finîs i robe purcine

Anonimo ha detto...

Dut câs simpri cun classe, ch'a no je aghe. Bepi

Anonimo ha detto...

Orpo,orpo Nelo, ce ajal fat po Lino a cjalça i bragons prin di la ju in cusine a clarì chei rumors.Biele e ben plaçade Nelo, e po dopo che ricjece di particolars e puarte il letor a sgnocola siemit a lor. Lussian

nelodifeagne_51 ha detto...

Cun Jaio, Berto e Lussian lâ a bevi une tace te ostarie di contecurte al jemple il cûr. Mancje dome che chel mostro di ostîr, cu la pension che a tirin, us fasedi paiâ il tai cualchi centesim di euro di mancul.
Graciis a ducj

nelodifeagne_51 ha detto...

No, Berto, Bepi. Bepi domandi perdon

gelo stellato ha detto...

ma ce! Contecurte e je ostarie di rive jù! ;)

Anonimo ha detto...

Al è ce gjoldi a tabaiâ cun voaltris, pecjât che dal WEB a no si rivi a trai ancje un bon tai. Bepi

Anonimo ha detto...

Ostîr prove a tacâ la spine dal computer tal caratel dal Friulano. Bepi

O varès alc di dî

Ti sêstu visât di firmâti? :)