martedì 25 novembre 2014

La vacje di Sant Denêl

«…Ma mi insumio, soio muart, o cualchidun cence che mi acuarzi mi aial puartât in chel mont che nol è plui ma, che ben ancjemò mal visi?» si domandave Bepo, sfuarçantsi di vierzi i voi, dopo une gnot, là che nol capive cui che lu veve puartât in chei timps indulà che il snacai sù la sô muse al faseve ancjemò di paron.
A Bepo, i tornavin tal cjâf e denant dai voi, ricuarts di vite, vuardâts in chê scjate misteriose, che nissun al sa se la vin tal cûr o tal cerviel: in chê cassele là che il timp planc, planc, ju lave di ducj i torments e i dolôrs di in chê volte, par dopo, cuant che mancul s'al spietin, magari tal sium, fasiusai rivivi simpri plui biei.
E in chê vegle, i pareve di jessi tornât pardabon indaûr te sô infanzie; usmâ l'odôr de jerbe brusade da zulugne, che e cresseve su chei cuei salvadis, indulà che di frut al lave a tindi; viodi lis viscjis tindudis plenis di ucieluts: luiars, franzei, montans, gardelins...
«Dâti di ca… vierz i voi, sveiti, no âtu finît di dî strambolots, al è di oris che tu fevelis di bessôl»…
Ulive, stufe di sintîlu, si zirave, gnervose, tal jet. Sarés jevade, ma fûr des cuviertis e jere une criùre che faseve dreçâ il pel a pene a meti fûr la man. Po dopo dal barcon si sintive che su la strade la tramontane e soflave cence nissune creance e che la ploie e colave jù a selis.
Puare femine, sintût chel timp la di fûr, e varès volût di gnûf impisulîsi e par chest lu preave di finî cui siei siums , ma lui no la sintive. Cui sa là che Morfeu lu veve puartât!
«Le vacje di Sant Denêl – Bepo, crustant i dincj al murmuiave – le vacje di Sant Denêl…»
Sì, Bepo, cumò al jere montât sù su chel tren che di Udin, ogni dì, passant par ducj i paîs a bas des culinis, al rivave sù, fin tal paîs dal presut, propit a San Denêl. Ulive lu veve capît pai strambolots che a jessevin da sô bocje, come che e veve capît, istes des sôs peraulis, che cumò il tren si jere fermât te stazion di Feagne.
«Doman…, sì doman…» biât, Bepo, cussì al predicjave «tu mal dâs doman, cuant che cul tren o tornarai a passâ par chi ….. Vignarai cu la scjaipule…»
Bepo si insumiave di un gardelin che un so amì, propit di Feagne, al veve cjapât sù par lui suntun nît poiât intun di chei peçs che a cressevin ator ator de stazion.
Ulive, puare femine, tal sintilu no saveve se ridi o vaî e rassegnàde, provant di gnûf a sveâlu par falu tasê e veve zontât:
“Banducel, cuâl gardelin, cuai peçs de stazion di Feagne, cuale vacje di Sant Denêl. Chei arbui ju an dislidrisâts di un piès, e ancje la vacje di Sant Denêl le an sfantade di une vore di timp.
Intant, là di fûr, la buere no dave padin. La ploie ancjemò e colave bondant e no tant lontan si sintive sbati cualchi barcon. Su la strade, invezit, al pareve che al corès alc di grues, che l’aiar al puartave vie cun sè: forsit un toc di gorne o un grues carton.
I burlaçs di chê brute matine a Ulive i parevin il spieli di chel mont, gnûf, che di cualchi an planc, planc si fâseve indenant: un mont di miserie, di cjasis fredis, di fantats, par sante scugne, cu lis mans tes sachetis, paris di famee cence lavôr e Diu nus vuardi, come une volte al tornave un mont cun pôcs bacans e i tancj muarts e di fan.
«No, no , in chel manicomi di timp e di mont là di fûr no ai voie di lâ: miôr sta chi tal cjalt, sot des cuviertis, ancje se mi tocje scoltâ lis bufulis di Bepo, i siei mateçs cui gardelins e cui siei viaçs su la vacje di Sant Denêl, ancje se a pensâle ben no mi displasin: a somein a bielis flabis».
di Nello Malisano

4 coments:

Anonimo ha detto...

Biel il confront dal ir cui dis di vue,Bepo cal ripasse l'umiltat di chei timps passats te bielecedi un siump,e Ulive ca no vul javasi dal jet par no impaçasi cul mont difur simpri pront a muardi i sgaretts de puare int.E dopo la vacje di Sandenel, chel puar trenin ormai passat te dismentie di ducj.La conte mi è plasude. Lussian

nelodifeagne ha detto...

Lussian il to coment mi tocje ta l’anime. Un judizi bon da tô bande mi jemple di sodisfazion parcè che o sai che tu sês un om just e che al fevele no dome cu la sagece, ma ancje cul cûr. Graciis

Anonimo ha detto...

Nelo, o ài let la Vacje di Sandenêl pene prin di lâ a durmî e tal sium mi soi insumiât che Bepo tu jeris tu. Tal sveâmi a mi àn vignût i grisui a pensâ che Ulive a podi vê reson, e che il mont al vedi di lâ in fas tornant indaûr fin al trenin di Udin a Sandenêl. Ma par Bepo chel mont a nol jere po cussì brut. Cui aial reson, Bepo o ben Ulive? Bepi

nelodifeagne ha detto...

Bepo si insumiave, miôr di cussì? E a Ulive i plaseve sta tal cjalt sot des cuviertis a scoltâ lis flabis. di chel om. Fûr e soflave la buere e la ploie la butavin jù cul seglot. Par me e vevin reson ducj i doi di sta fers li, tal cjalt e no impaçâsi cul mont là di fûr.
Mandi Bepi

O varès alc di dî

Ti sêstu visât di firmâti? :)