lunedì 22 dicembre 2014

La pietât di Gjorgjo


Al cjastiel, cuant che lu vioderin, di lontan, dret sul cjaval blanc, la maravee e montà subite in bulidure e batibui. Dome lui al jere lât vie di sô volontât, par coraç e fede, e no par sante scugne, come i tancj manigolts obleâts di une condane. E dome lui al jere tornât indaûr.
Gjorgjo al vistive une muse dure, cuete dal soreli, ermetiche. L'armadure, cence nancje une sgriade, e jere cuvierte di polvar.
«Lu veiso… lu veiso copât?», a barbotarin i prins, za in zenoglons denant dai çucui de sô bestie.
E lui? Ce podevial dî, lui, di chê risalte vuarbe, mole, pacjifiche, che al veve cjatade daûr a mangjâ grisons, platade in tal umit nereôs dal foran? Podevial migo contâ di une salamandre grandonone, plene di scais e cuars, che no varès fat mâl a di une moscje? O al podevial migo contâ de grote, che e permeteve di scjampâ fin dopo dal desert? E de pietât, par chê bestie rarissime, forsit uniche, podevial forsit contâ?
Al mostrà une sclise di vues, che al veve cjapât sù di par tiere. «O ai vût pietât», al businà cence fermâ il pas dal cjaval. «Cheste e jere une des sôs ongulis».
di Raffaele Serafini

4 coments:

Giovanni Nello Malisano ha detto...

Veretât, bisugne tornâ plui spes in Furlanie che di sigûr stan cambiant lis robis. Ancje cheste conte e conferme gnûfs gjenars leteraris (neoclassic?), o miôr un tornâ tai timps, disin di une vore di agns indaûr. Ben scrite, miôr di cussì no si podeve.

Anonimo ha detto...

Nelo, Contecurtârs ve ca ch'a tornin a tacânus. O ài let sui gjornâi di une propueste di leç par tornâ a inneâ la Piçule Patrie dentri tal Trivenit. A sarès la muart de nestre marilenghe! Ce podino fâ par fermâju? Bepi

Giovanni Nello Malisano ha detto...

Bepi, pe nestre lenghe, i invasôrs e la politiche no mi fasin pôre. No son chei che e innearan la nestre marilenghe.La innein, invezit, i furlans che la fevelin pôc e no la insegnin ai lôr fîs o nevôts. E chest lu conferme la storie. Di fat ancje se tai secui sin stâts invadûts di dutis lis razis, magari in pôcs ma il furlan ancjemò lu cjacarin.

Ps. Bepi volès fasti i auguris par Nadâl e se no ti displâs mandimi il to numar di di telefon a ne_llomalis@yahoo.it

Anonimo ha detto...

https://www.youtube.com/watch?v=H-JrQMrfkpU
Chest altri Zorç invezit nol à vût nissune pietât.

Mandi

O varès alc di dî

Ti sêstu visât di firmâti? :)