mercoledì 31 dicembre 2014

Lunga e dritta correva la strada


Chel cjâf lu cjalave ta chê sere che lis faliscjis si alçavin sù dal bidon: un grant cjâf di purcit cu la piel tindude su la ristielere.
“No sta preocupâti, o varai la mê vendete!”
Zorç al fasè un salt pe maravee e pe pôre. I pareve che il purcit i fevelàs! Une vôs che e vignive dal di dentri, di Zorç stes, ma che il frut al identificave come che e fos chê dal purcit!
Te matine Svualt e Meni a jerin vignûts tal cjasâl; copade la besteone cu la pistole apueste pontade tal cjâf… spelade la puare bestie e trasformade in salams, musets, sanganei…
Po a jerin partîts par une altre mission, un altri purcit di copâ… lontan… ai cunfins cul Venit. Svualt e Meni a jerin i miôrs.
“No sta preocupâti, o varai la mê vendete!”… la frase e sameave fâ un rivoc te ment dal frutin Zorç.

L’indoman, tor sere, e rivà la notizie cul gjornâl radio. Il nono nol rivave a crodi: “Puars zovins, ce brute fin! A vevin lavorât cussì ben ca di nô… juste îr…”
La machine cui doi becjârs e jere lade a sbati intune fracassine su la A4; scugnût clamâ i pompîrs a tirâ fûr ce che al restave…
“NORCINI FATTI A PEZZI SULLA A4” al scriveve il gjornâl la dì dopo… a caratars cubitâi…
E Zorç alore al pensà: la bestie e à vût la sô vendete… a vevin di lâ a purcitâ… a son stâts purcitâts lôr.
di Checo Tam

4 coments:

Anonimo ha detto...

Checo, sâstu ch'a mi vignive riviel ancje a mi cuant che gno pari e gno nono a mi metevin a tirai la code al purcit par tignîlu fer tant ch'a lu copavin. A mi vegnin i grisui ancjemò cumò. Bepi

Giovanni Nello Malisano ha detto...

Cumò o sin deventâts ducj pui bogns. Pense tu, no sai in ce pais, a le domade dal vescul ai fruts che fasevin la cresime, "cuâl isal stât il dì plui biel de vuestre vite" la lôr rispueste e je stade: in chê dì che si cope il purcit. Puar purcit. Biele la conte.

Anonimo ha detto...

Nelo, a tu âs reson ch'a sin plui bogns cumò, ma e je la veretât ce che o provavi di frut, tirant la code al purcit. Daspò a ti disarès une gruesse bausie s'a ti disès che a no mi plasin il salam e il muset. Aldo, il mestri di frico, a mi è di testemoni. Bepi

Anonimo ha detto...

La conte e je vignude fûr di doi moments... un imprecisât, dai agns 70, cuant che lu autôr al viodeve di sere lis faliscjis che a vignivin sù dal bidon intal curtîl di Selvucis, te cjase dai vons, e daspò di un articul sul Messaggero di becjârs che a jerin muarts pardabon ma... che no jerin propite chei vignûts a copâ la bestie li dal nono... insome... letarature... fiction, ma cuntune base di veretât
Cocteau Twins

O varès alc di dî

Ti sêstu visât di firmâti? :)