venerdì 23 gennaio 2015

Cocteau Twins su Netun (ma no il planet)

Un di chei grops vignûts fûr ta chê fauste stagjon che e jere chê de musiche alternative dai prins agns ’80, al ven de Scozie, di Falkirk: a son i “Cocteau Twins”. E propit i “Cocteau Twins” o ai voie di ricuardâ. Aromai a son passâts trente agns e jo o soi come chei vecjos che a disin: «Ai miei timps al jere dut miôr…». Par me la storie e tache cuntun viaç lungjonon di Udin fin a la citadine di Nettuno, plui in jù di Rome, ai 10 di avost di chel lontan 1985, cuant che i “dark”, ven a stâi chei che a levin daûr a chê musiche o mode alì, a jerin coionâts de int cussì dite regolâr; al jere il timp che lis fantatis a ziravin cui bregons strents a lis cjavilis e la permanent tai cjavei, e i fans dai “Duran Duran” a sameavin vignûts fûr dal “videoclip” di “Wild Boys”. Cuant che Jim Kerr, il cjantant dai “Simple Minds”, al jere une vore nomenât… sì, al samee che il stes non “Cocteau Twins” al vignidi fûr di un toc dai “Simple Minds”, ma la musiche no.
Dut ce che mi visi di chel viaç al è che o leievi dai “Urania” e che tal gno scompartiment une zovine alte e secje e veve ufiert il puest a une muinie. Jo stes, dut vistût di neri, no jeri trop distant dal sameâ un predi.
Rivât a Rome o vevi fat nome un piçul zirut dongje de stazion, mi jeri apene nacuart dal plan inclinât di un cuel e o jeri tornât indaûr par cjapâ il tren par Nettuno. No vevi il timp par esplorâ l’“Urbe” chê volte. La mê destinazion e jere il stadi dal “baseball” dulà che si davuelzeve la manifestazion “Rock Now Nettuno”.
Insome il gno vistît al jere neri: cjamese nere, scarpis “college”, gjachete nere in zessât regalade dal bon barbe mostacjon e bregons neris in acrilic come Geordie Walker (ghitarist di un grup clamât “Killing Joke”… cheste e je la citazion di une riviste che lu coionave…).
Veju… a son i “coatti” che a passin cuntune machine scuvierte e mi berlin alc e a sunin il “claxon”; a fasin cualchi sconzûr vintmi probabilmentri cjapât par pizighet. Ta chê volte al jere normâl che ti coionassin se tu jeris o tu sameavis un “dark”. Ma nô o crodevin di partignî a une sorte di clape esclusive: o scoltavin la musiche plui biele, plui ricercjade, o leievin lis poesiis dai Maledets, si vistivin cun mudis cjatadis sul cjast, tai vecjos bagais… o crodevin di jessi nô i miôr…
Veju… i “dark”! A rivin a piçui trops o di bessôi cui cjavei drets, cotonâts. Il soreli al bruse, l’asfalt al sbuente… jo mi giavi la gjachete. I “dark”, chei mostris, chei modernis “freaks” a rivin tal stadi cuasi che a fossin in devot piligrinaç. Jo o riduci a viodiju stracs e cence flât. Sì, mi rint simpri plui cont che ancje jo o fâs dal dut part di chê schirie alì: a son “dark” dal 1985, a amin la musiche, si vistissin cun pôc no come cumò che tal “rock” scûr e domine la mode des “boutiques” todescjis che a vendin viestis che a costin un voli dal cjâf!
I “Nadja” a vegnin de Ligurie e a fasin un bon “dark” talian. I inglês “Woodentops” a sunin un bon “rock” neopsichedelic cun cualchi olme di agns ’60. Invezit i “Pink Industry” di Jane Casey, sedusinte fantate, no mi plasin: e je masse stonade e la musiche eletroniche masse scoloride. Doi piçui zovins di Firenze, fantat e fantate, a son in prime rie e mi disin: «Ti piacciono “Hocteau Twins”?». O tachìn a tabaiâ; mi disin se o soi mat a vignî di cussì lontan. Dal Friûl profont, des fumatis che a inglotin i cjasâi… des blavis… dal Friûl di contadins e cjaçadôrs come gno pari che, vint savût che a cjase o ai 100 discs “dark” mi fâs: «Al sarès come se jo o ves 100 sclopis!». Jo o soi alì pal complès di Falkirk. Lussie mi veve telefonât dôs seris prime par visâmi dal conciert; e je une zovine piemontese che mi scrîf.
Su “Dear Heart” la cjantante Elizabeth Fraser e berle come se a stessin copant un purcit. Durant lis provis e à vaiût. E à lis gjambis pelosis.
Ce bielis cjançons! Ce bielis che a son “Musette and Drums” e “Sugar Hiccup”! Ma sul palc no son cui sa ce. E chê bobine cui suns di base…
O soi devant dal gno mito e no soi content; a un dât moment o varès miôr viodi chel mat di Julian Cope tal puest dai “Cocteau”. Soio deventât mat? Il miôr grop “wave/dark” britanic al è li devant di me e jo o fâs il slichignôs?
«Io Franco, lei Paola!» mi disin doi piçui romagnûi. A la fin dal spetacul o larìn insiemit a mangjâ une pize e o spietarìn il tren par Rome fin a lis 5 di matine.
«Tu mi parli di “Smiths” quando io cito “Cocteau Twins”?» al fâs un cotonât “dark” roman cui ocjâi. Come a disi che i nestris scozês a son suntun çocul plui alt rispiet ai plui famôs “Smiths”. A la fin dal conciert si sin incontrâts jo e Lussie; mi samee Laura, forsi pe muse di gnotul. Cui ise Laura? Laura e je la morose di Zuan, l’amì che mi à prestât la cassete origjinâl di “Head Over Heels”, l’album che mi à fat cognossi il grant grop.
Un gjornalist al veve scrit che e vignarà la dì che cualchi sienciât al scuvierzarà la relazion fra il nestri çurviel e i biei suns dai “Cocteau”, suns che a menin il scoltadôr come intune sorte di flabe, suns che a fasin svolâ su lis alis de fantasie. Al è un toc, “Otterley”, che cuant che lu scolti mi prodûs un fuart sintiment di amôr materni; in sotfont si sint il rumôr dal mâr e mi plâs tacâ la radio e metilu sù cjalant il tramont bande de vile dai conts cuant che il ros soreli si plate tra i cedris dal zardin. Cuant che Paolo, l’amì di gno pari e gno cunfinant mi dîs: «Guarda il tramonto: sembra un quadro cinese!».
Jo e Lussie o sin un di front di chel altri cuant che la sdrume di int e va vie. O ai fermât il timp… chest fotogram… chest fotogram lu ai metût te sachete. A son passâts cuasi 20 agns e il mont al è cambiât. I “Cocteau” no fasin vignî fûr un album dal 1996. No esistin plui. O ai ancjemò cualchi foto di un lôr conciert di Bologne dal ’86 e la ultime volte che ju ai viodûts al è stât a Milan dal ’94. Mi mancjin. Ma mi mancjin ancje chei timps, chei moments…
di Checo Tam

11 coments:

Giovanni Nello Malisano ha detto...

Tam Braf, ancje sês tu sês un malinconic. No a câs la tô musiche preferide mi ricuarde i agns otante, indulà che in plen e tachin, ducj, a sintisi bastonats. Son finidis dal dut li sperancis di chel sessantevot che al someave riprodusi un gnûf cuarantevot. Là che us restave nuialtri, almancul in Italie, di cjantâ a une vite spericolate cun Vasco Rossi. Decjadence? Ma si, va ben lo stes. Io plui provinçal di te, o scoltavi la Premiata Forneria Marconi

Giovanni Nello Malisano ha detto...

Brâf

Giovanni Nello Malisano ha detto...

... là che us restave nuialtri , almancul in Italie, di cjantâ a une vite spericolate cun Vasco Rossi . o la Premiata Forneria Marconi e e jerin i agns otante.

Anonimo ha detto...

Jo no ai vût nissun fradi plui grant che mi indreçàs al rock DOC e, come tancj furlans o fasevi di bessôl... mangjediscs e cassetis crompadis o regjistradis e sintudis intun mangjenastris orizontâl... trasmissions sintudis pa la radio (Rai stereo notte ma ancje Tunnel e Alternative su ROF) e rivistis come... Rockerilla...
La musiche alternative dai agns 80 e jere bielissime fin al 86 par me... nie a ce viodi cu la dance e il pop des FM che i plui (chei che a van al Ceghedaccio) a ricuardin...
CT

Anonimo ha detto...

A Nello e Bepi... si visaitso di une trasmission di astronomie fin agns 70 clamade Il cielo? Tal finâl e veve une sigle dulà che si partive di un lâc dai Stâts Unîts fin a fâ un viaç fin ai cunfins dal spazi e il filmât al finive cuntune esplosion di dutis lis galassiis implodudis tun gnûf Big Bang... mi pâr di visâmi come commento sonoro The Great Gig In the Sky dai Pink Floyd...

Anonimo ha detto...

Checo, le ài lete dute la to conte, e a ti torni a dî che dome un vêr artist al podeve fami rivâ insom de conte, cuntun cantin une vore dispartât dal gno. Pense dome che, puartât vie dai miei impegnôs, o jeri restât a Claudio Villa. Cetant timp pierdût! Bepi

Anonimo ha detto...

claudio Villa? Migo chel di "Mamma"? Le astu ai domandade a "Musica per voi?" CT

Anonimo ha detto...

Propri chel li. Checo no sta ridi che di chi a cualchi an, ti disaran ancje a ti: Edordo Bennato, migo chel di "Viva la Mamma"? A le âstu domandade a Radio Cjaudistrie? Bepi

gelo stellato ha detto...

porco can, jo che soi un fi dai novante e se voi indaûr o scolti dome 60 e 70 mi sint propit taiât fûr. Ma i joy division ju scolti ancje jo eh :)

Anonimo ha detto...

Biele conte sù chei agns. Mi a ricuardât il vagon blù e le leture che tu fasevis studant e impiant le lûs sule conte di Agne Lene:-) Tu mi dâs ancje une idee par une gnove conte.
Jaio

Anonimo ha detto...

Ciertis voltis la musiche e à un magjic podê... tu scoltis un motîf e ti tornin iniments lis emozions dal to passât e ti vegnin i sgrisui... chest o pensi che al vali par ducj chei che a àn un minim di sensibilitât di animo...
CT

O varès alc di dî

Ti sêstu visât di firmâti? :)