lunedì 12 gennaio 2015

Particulis subatomichis

Insome a jerin lâts ta chel teatri, Toni e Jacum, sì, lôr, a viodi chel strani spetacul moderni.
Une zovine intune grande scjaipule e jere voluçade di un dîs lungjis galis di stofe e dai volontaris dal public a tindevin lis lungjis galis e ogni tant jê si moveve e e dave un tîr e cualchidun al molave la prese… chest par cirî di descrivi une teorie subatomiche. Tal ambient si sintive une “musiche” di aiar misturât a rumôr di trapano. Ce monadis, o disarês voaltris. Eh, no! La zovine e jere crote!
Za Toni, cjalantle, le veve paragonade a alc di grêc, a ûs la Papas inte Odissee TV, o a la Mangano, Calliope, Nausicaa… sì, chês li po…
Bon, finît il spetacul al jere il party dai inteletuâi e dai inteletualoits e ancje Toni e Jacum si jerin fermâts a la fieste. Sorprese: la zovine artiste si jere mitude a balâ, cheste volte vistude.
Toni alore al fasè une bulade metintsi a balâ devant di jê come il miôr Toni Manero.
Però di lì a pôc al rive un coçon cui ocjâi a ûs chei di Nicola Di Bari, vistût di nere piel… sì mo, chei li… chei che no podês viodi nancje voaltris…
Il coçonat al veve dât un sburt a Toni par metisi lui a balâ devant de artiste. Lui! Po si sa! Alore e jere tacade la barufe che, chê discjadenade di Francis Begbie in “Trainspotting”, no jere nie a confront. Jacum e Toni a vignirin agredîts di milante!
Par disgracie dal nestri eroi chel maladet coçonat al jere ancje palestrât e cussì puar Toni si cjatà intun jet di ospedâl dut macolât di botis. Nol saveve nuie di ce fin che al veve fat l’amì Jacum.
Ma…sorprese des sorpresis… Toni al viodè jentrâ inte cjamarute la zovine artiste dal teatri… e i veve puartât une rose… i diseve alc… ma lui al jere sort… i jere rivade une butilie tal cjâf juste li de orele çampe e un pugn i veve sfolmenât la orele drete… e cussì nol sintive nuie Toni… e dopo la zovine e jere sparide, forsi smaterializade tes particulis subatomichis e lui al fo voluçât des tenebris ma parsore e jere… une lûs! Al fo tirât sù di chê lûs e si cjatà denant come un figure di agnul, alc come un spirt che… al veve la muse di chê fantate!
Si tornà a ricjapâ daspò di cualchi dì. Pene sveât al veve domandât di Jacum, de zovine, di sô mari e parfin di Nicola di Bari e Toni Manero, sì che i miedis lu vevin tornât a indurmidî, par precauzion, ma a vevin disniçât la prognosi. 
Lu compagnà cjase, cun inmò cualchi vuès di comedâ, propit Jacum.  Di une orele inmò nol sintive ben, di chê altre al sintive a tuttoandare une cjançon dai agns otante, brute, di chês che tal puest de batarie a dopravin chês drum machine orendis. I someave un toc dai pet shop boys, ma pene che si concentrave par sintî chel rumôr dentri dal cjârneli i doleve dut e al tacave a viodi tarlupulis di ducj i colôrs, altri che particulis subatomichis.

La fantate dal teatri i veve lassât un numar di telefon e un biliet scrit intune lenghe che nol capive. Lui nol cirì nancje di lei, ni la clamà. No si sa cemût al vignî a savê che il spetacul, il stes, al zirave inmò ator pe Italie, e nol jere lontan. Al volè fâsi compagnâ di Jacum, e si presentarin in doi, lui inmò cuntun braç inzessât, li de fantate. No si viodeve ator nissun Nicola di Bari, chest colp, ma Toni al jere come mut. Si sint come un eletron. Jacum un neutron e la fantate il proton che lu tire a sè. Al passe un biel pôc prin che al rivàs a dî une peraule: "Ti piacciono più i Pet Shop Boys o Nicola di Bari?" i domandà prin di voltà la schene e cori vie.


di Milio dai cjans

15 coments:

Anonimo ha detto...

Be', insumis... e promet ben cheste conte. Un plauso a Milio... sperìn che a 'nd vignedin fûr altris contis cussì...

Beba Loncar's Fan

Anonimo ha detto...

Milio, a no tu la contis juste! Se a no je farine dal to sac, cui altri àjal vût il snait di scrivi une cussì biele conte, miscliçade di fisiche da lis particulis, di Nicola di Bari, Francis Begbie e altris robis ch'a no divegnin dal mont di timp indaûr. Disvuede il sac. Bepi

Anonimo ha detto...

bon po, bepi, tu mi as scuviargiut, la storie no je capitade a mi. jo soi sempliç, e voi poc atôr. ma cualchi libri o ai vût simpri plasê di velu pas mans (o vevi un cusin che al veve di là predi e chel mi foragjave), podopo, mi contin alc, magari chei pui giovins e jo o zonti fantasie (come nicola di bari, insome). pluitos, o ai di disi grazie al ostîr, che mi à coregiut cetante robis che no savevi. la me conte no jere cussì ben metude prim, (e ancja la foto, no je farine dal gno sac, ma je biele)
Milio

Anonimo ha detto...

Milio, a no son i coretôrs di stampons ch'a scrivin lis contis, ma i contecurtârs ch'a metin passion, cûr, ricuarts e fantasie tal contâ. Conte ancjemò plui ch'a tu puedis, ch'a tu vâs ben. Bepi

Giovanni Nello Malisano ha detto...

Milio brâf, tu as la stofe dal vêr contecurtâr. Tu scrîf cence fastidis, tant vin l'ustîr che al comede dut ancje se lin te osterie ben cjamâts di falopis.

Giovanni Nello Malisano ha detto...

âs

Giovanni Nello Malisano ha detto...

às

Anonimo ha detto...

Nelo... ce àno a ce viodi lis âs? fastu la mêl?
Mi sa tant che Milio al à di vê cualchi nevôt o fi plui zovin che i dd ai sugjeriments...

Bebalonçarsfan

Giovanni Nello Malisano ha detto...

No, no nissun sugjeriment. O fevelavi propit di falopis.Soredut des mês.( as o vevi scrit par dopo coregjimi cun âs. Pecjat che come un pandolo o ai rimetuût às) Jo che cul furlan o soi ancjemò in prove e di falopis o soi un mestri. Brâf tu Bebalonçarsfan che tu fasisi fâ il mîl ancje a lis âs.

Giovanni Nello Malisano ha detto...

......tu fasis il mîl cu lis âs, volevi scrivi). Mi somee che si fas cu lis âfs

Anonimo ha detto...

Milio,benvignut tra i cjoks di ingjustri e cjarte. Lussian

Anonimo ha detto...

orpo! ce acoglience! o ai gust... Gracie Nello, e gracie Lussian, mi stiçais a lâ indenant, e beba mi sa che à induvinade- poben, la prosime sarà dute farine me alore.
mandi mandi
Milio

Anonimo ha detto...

Un biel scrivi

Anonimo ha detto...

Milio, cujetiti!

Anonimo ha detto...

Purtrop, Milio, no mi è clâr il finâl...judimi
Siore Catine

O varès alc di dî

Ti sêstu visât di firmâti? :)