mercoledì 7 gennaio 2015

Pujesis

(Edward Hopper, 1936 - Bubley platform)


Ta chel setembar dal ’82, cuant che e stave rivant la prime grande invasion di pujesis, Toni al jere cun so barbe bande dal pin di Lauçà a gjavâ gjardon tun cjamp. Ma il so cjâf al jere intun altri lûc… si pensave a cuant che, durant la ultime purcission dediade a la Madone, une bielissime fantate more lu veve cjalât. Une funzion in grant stîl, cul paggetto, il chierichetto, la bande e un grant arome di incens. La fantacine lu veve cjalât, lui, un anonim ocjalon che a scuele a jerin dome che lu coionavin.
La fantate no le veve viodude plui: forsi e jere vignude di un altri paîs a la messe… ma intant lui si jere inamorât!
Tal cjamp so barbe i deve dai conseis e i diseve alc come… “O soi passât ancje jo, ancje jo o pensavi cussì, ma lasse pierdi i insiums… cul biel no tu mangjis… tu cjatarâs une zovine brave par fâti une famee… pense a la fie di Nives…”
No, no… lui nol oreve la fie di Nives, cu la muse rosse come un cjapon… i plaseve la fantate more.

Passâts i agns une dì Toni si cjate in stazion des curieris a Udin e su la bancjine dongje de sô cui ti viodial? La fantate more! E jere ancjemò plui biele di chê volte de purcission… e varà vût 18/19 agns. Il biel al jere che la dì dopo lui al sarès partît militâr in Basse Italie. Toni alore al pensà: “Graziis, bon Diu, tu mi âs fat il regâl di tornâ a viodile prime di partî pe naie… tu mi âs dât la oportunitât di cognossile… ma cemût puedio tacâ boton? Domandâi la ore? No, masse sempliç… ispirimi, bon Diu…”
Ma ta chel ve rivâ su la bancjine un biel fantat, cul codin a ûs Miguel Bosè, i jeans a tubo, i stivalets camperos e un gjacon di corean… chel zovin al busse la fantate more, le cjape a braceto e al monte cun jê su la curiere par Cjarpenêt a pene rivade ta chel moment…
di Checo Tam

3 coments:

Giovanni Nello Malisano ha detto...

Chel fantat si jere fat il codin. Bulo. Toni di sigûr al veve puesis ancje tai voi

Anonimo ha detto...

Biele Checo,i siumps e il polvar son fis dal aiar ca ju scjasse, iu sovolte, e po a planc ju mene vie.E dopoal di di vue son finides purtrop las fiis di Nives, cu la muse rosse scotade dal soreli a gjava gjerdon tai cjamps,o a pocà la polente disore il spolert, oltri a tigni spale sui cuatri cjantons dal fogolar. Lussian. Nb. domandi scuse pa mancjance dai accents no metuts .ma no sai dopra l' ordenador

Anonimo ha detto...

E je vere! Al veve lis pujesis tai voi!
CT

O varès alc di dî

Ti sêstu visât di firmâti? :)