martedì 3 marzo 2015

Cjartute


“Cjartute” al à une grande passion: al dopre lis fuarpis di sô mari par taiâ lis figuris dai gjornâi. Vuê al à taiât i FLUORATTIVI dal OMO, insuperabii tal netâ il sporc. Al zuie cun chei pipins di cjarte: a àn la visiere viole e a butin fûr rais e cussì lui al invente tantis aventuris.
Al è fûr di cjase sô tal vecjo ghet. Al zuie devant de puarte, par tiere. Al cjape un altri gjornâl e al taie altris imagjinis.
Un om al rive te cjase dai cunfinants. Al cjale “Cjartute” e i dîs: “Fâs scus, fâs scus… e dopo cui netial?”
Ma no lu à dit par fâ un mateç: al à chê odeose autoritât che a àn i grancj cuant che a distudin l’entusiasim di un piçul che al zuie. “Cjartute” al scjampe dentri in cjase e al è une vore rabiât: al conte il fat a sô mari che, naturalmentri, lu pare.
Lui nol à voie di tornâ fûr par incontrâ ancjemò chê musate di om che i à dit chês brutis robis.
La televison b/n e je impiade suntun biel telefilm. Tal mâr al è un sotmarin cu la scrite SKYDIVER. La part devant di chel argagn si distache dal cuarp principâl e e ven fûr de aghe, svolant par aiar come un aparechio! Cussì il nestri frutin al scuvierç il gnûf biel telefilm UFO.


“Cjartute” al à passât di pôc i cuarante e o sin tal gnûf millennium. Al à un biel fi di dîs agns che al zuie cul computer.
“Vonde! A son bielzà dôs oris che tu sês devant di chê trapule! Va fûr un pôc, invezit di stâ simpri sierât in cjase!”
Cussì al dîs “Cjartute” a so fi. Ma no lu dîs par fâ un mateç. Al à chê odeose autoritât che a àn i grancj cuant che a distudin l’entusiasim di un piçul che al zuie…
di Checo Tam

2 coments:

Luciano Marinig ha detto...

Biele Checo,cemut che las robes e tornin,vignares di dì,nuje si cree nuie si disfe,e chi o zontaress dal me, che dut al torne. Lussian

Anonimo ha detto...

La fantasie dai fruts e je tant che un fulminant, une volte distudade a no torne plui a impiâsi. Bepi

O varès alc di dî

Ti sêstu visât di firmâti? :)