lunedì 23 marzo 2015

Un cjasâl, une vuere nucleâr

Un cîl stelât, la aghe dal lagut artificiâl e i pôi trimulants. Un paradîs. Toni al jere vignût fûr de tende cui mudantons di lane, intune sere di Novembar dal 1983. Intal cjâf il pinsîr de fantate more che e cjalave i militârs di un barcon dal vecjo cjasâl in piere, li dongje. Dentri de tende Faraone al sgnofrave tal sac a pêl, tabarossât come dentri di un sarcofac e chei altris ancje a durmivin… Baldo, Bonato, Campagnaro…
Al jere biel ancje se un pôc frescot. Lui, par passâ di un setôr a chel altri dal cjamp di manovre, al diseve la peraule di ordin Blueprint. Ma mai si sarès imagjinât che i Sovietics, spaurîts pe manovre NATO “Able Archer”, a vessin alertât i bombadîrs nucleârs…
Lui si gjoldeve il poleç arost te gavete su lis rivis de Tor e la cjocolate/agarole de matine, plene di muscjins. “E’ arrivata la pappatoia!” ur diseve il bon cjapitani Spadaro cui soi mostacjons stîl Pedrito El Drito. Si gjoldeve chel zuiâ a une vuere fente… narançons cuintri celescj… al rideve a viodi i VTT M113 che a fasevin scuele vuide te grave, cuntun sargjent che cuntune vuiscje al indicave al pilote dulà che al veve di zirâ… Toni si gjoldeve chel lagut di gnot, li stelis, i pôi e il pinsîr de fantate more…

La vuere nucleâr no jere mai tacade. I agns a jerin passâts. Une domenie Toni al torne li dal vecjo cjasâl di piere, come a volê fâ un salt ta so passât. Ma nol ricognòs plui il puest. I pôi no son plui… il lagut nol è plui e tal so puest al è un cjamp di golf, il cjasâl butât jù e tornât a fâ sù a tipo moderni… a son i cjavai par fâ ecuitazion e difûr si notin un trê cuatri SUV di sioronons.
Toni al à ancjemò dentri di sé il ricuart dai siei amîs, i Baldo, i Bonato, i Faraone… e un puest dentri dal so cûr al è ancje par chê fantate dal vecjo cjasâl che e cjalave i militârs… ancjemò Toni si insumie di chê biele gnot stelate… ta chei vincj agns di bielis aspietativis… chei mês che si zuiave di vuere…
di Checo Tam

3 coments:

Anonimo ha detto...

Biele Checo,cemut che i ricuarts a ti ripuartin sui puescj indula ca tu ju as vivuts,e cuant tu ju cjatis cambiats a ti sanganin il cur cence plui voe di torna in chei puescj,purtrop ae la vite che misturade cu la etat e va cirì la zoventut pierdude. lussian

Anonimo ha detto...

Checo, tant timp indaûr ma a no ti dîs cuant, su lis culinis dai cjistiei romans dongje Rome, o stevin fasint esercitazions radio militârs intun incjampament di tendis dulinvie il mês di Fevrâr. No 'nderin fantatis moris li dongje, ma un grum di frêt di gnot chel si. Par fortune che ta un cjasâl daprûf a vendevin pan, salam, e butilions di blanc dai cjistiei, e cun chel a tu ti paravis dal frêt tant, ch'a tu podevis lâ fûr de tende in mudantis. Di che volte a no soi plui tornât di chês bandis; a mancjavin lis moris! Bepi

Anonimo ha detto...

Vin blanc dai cjastiei, Bepi? Vinum bonum, vinum bonum, vinum generosum! Reddit hominem animosum! Mi visi che di soldàt in manovre dongje Cerneglons il convent nus dave cjocolate licuide come agarole plene di muscjins e cordiàl chimic in buste. Par furtune che un cjapitani mostacjon une dì nus clama' disint "Ragazzi, è arrivata la pappatoia" e cussì o jemplarin lis gavetis di bon poleç arost!
CT

O varès alc di dî

Ti sêstu visât di firmâti? :)